Molia se alii 18 tausaga i le fa’a’olima ma le faatupu vevesi

Pago Pago - AMERIKA SAMOA

I le aso 8 o Aukuso, 2024 na fa’afeso’ota’i ai e se molimau ia le Ofisa a Leoleo i Tafuna e tusa ai ma se alii talavou o fealuai ma se pate pesipolo, ma e foliga mai o lo’o tau fa’amata’u i ni fanau iti.

Sa faapea ona agai atu leoleo i le nofoaga na tupu ai le fa’alavelave ma lokaina mai le susuga ia Nicky Failauga.

Na faapea foi ona fa’atalanoaina e leoleo ia molimau ma faatonuina e agai atu i le ofisa a leoleo mo le fa’aauauina o su’esu’ega.

E tusa ai ma le faamatalaga a se tasi o teineititi 9 tausaga na a’afia i lenei fa’alavelave, sa ia ta’ua ai le fealua’i fa’ata’amilo o le ua molia, i lo latou fale ma u’u se pate pesipolo.  Ma na ta’ua e le teineititi, e foliga mai sa fai ma tilotilo le ua molia i totonu o faamalama, e vaai po o iai seisi i totonu o le fale.

Ae o le taimi lea, o lo’o la iai ma lona uso i fafo o le fale ma sa agai atu foi le ua molia ma taumafai e sasa la’ua i le pate.  Ae na laki ona sa o la tamomo’e ma lona uso laititi i totonu o le fale ma loka le faitoto’a ae lalafi.

Peitai, na taumafai le ua molia e u’una’i le faitoto’a ma sasa i le pate pesipolo.  Sa faapea foi ona ‘e’e atu le ua molia, e tatala le faitoto’a ma palauvale.

Ae na mafai ona tamo’e atu so la ‘Aunty’ gugu i le fale o le latou tuaoi mo se fesoasoani.

Na faamatalaina foi e le teineititi 6 tausaga, lo la iai i fafo o le fale ma lona uso matua, ae fa’ata’amilo atu ia le ua molia ma taumafai e u’u mai lona lima ma sasa o ia i le pate pesipolo.

Ae sa mafai ona o la sosola i totonu o le fale ma loka le faitoto’a ae na sasa e le ua molia ia le faitoto’a ma valaau atu ia i la’ua e tatala le faitoto’a.  Na ta’ua e le teineititi 6 tausaga lo la fefefe ma lona uso matua, ae na mafai ona o la sosola mai i fafo i leisi itu o le fale.

Na mafai e leoleo ona fa’atalanoaina le ‘Aunty’ gu gu, e ala i le fesoasoani a le tina o teineititi sa a’afia.

Ma na faamatalaina e le ‘Aunty’ le fai o ni ana galuega i fafo o le fale, ae ona va’aia le tuliloaina atu e le ua molia o nai ona tei laiti e to’alua, lea sa tamomo’e atu i totonu o le fale ma loka mai le faitotoa.

Sa faamatala foi e le ‘Aunty’ le taumafai o le ua molia e alu i totonu o le fale, ma lona sasaina o le faitoto’a i le pate pesipolo.

O lea na ia tamo’e ai fa’atopetope atu ai i totonu o le fale ma aumai nai ona tei i fafo, ma o latou sulufa’i atu ai i le fale o le latou tuaoi, mo se fesoasoani.

Sa faamatalaina foi e seisi molimau sa iai i le taimi na tupu ai le faalavelave, lona va’aia o le ua molia, o tu i autafa o le alatele ma se pate pesipolo, ae fa’asaga aga’i i le fale o le aiga na a’afia i le faalavelave.  

O le taimi na savali atu ai loa le ua molia i le fale o le aiga na a’afia, na savali atu ai loa le molimau i totonu o lona fale ma fai mai lona mitiafu.  Ae fetaui lava lona savali mai i fafo ae tamomo’e atu loa ia le tina ma le fanau e sulufai atu i lona fale.

Ua molia nei Failauga i moliaga e lua;

Faitauga 1&2:  Fa’ao’olima i lona faitauga e tolu – o se vaega ‘C’ o solitulafono mama, e mafai ona nofosala ai i le falepuipui, i le o’o atu i aso e sefulu lima, po o se sala tupe e $300; po o faasalaga uma e lua.

Faitauga 3; Faatupu vevesi i nofoaga faitele, o se vaega ‘B’ o solitulafono mama, e mafai ona nofosala ai i le le sili atu ma le ono masina po o se sala tupe e le silia ma le $500; po o faasalaga uma e lua.

E $1,000 se vaegatupe sa faatulagaina e mafai ona tatalaina ai le ua molia, e faatali ai lona faamasinoga.