Molia ni tama’ita’i sa galulue i le TMO i le la gaoia o le silia i le $70,000

E to’alua ni tama’ita’i sa galulue o ni Talitupe i le Kamupani a le Tautua Mo Oe (TMO) Incorporated ua tu’uaia i lo la ave fa’agaoi o le silia i le $70,000 mai le kamupani sa la galulue ai.

O le vaiaso na te’a nei na tutula’i ai i luma o le Fa’amasinoga Fa’aitumalo ia Malia One ma Inosiaolouaiga Pauga. E ta’i lua moliaga mamafa o loo molia ai i laua, o le gaoi atoa ai ma le ave faagaoi o ni tupe sa tuuina atu i lalo o le la vaavaaia. O ia moliaga e mafai ona fa’asala ai se tasi i le toese i le moliaga e tasi mo le umi e le silia i le 7 tausaga, pe fa’asala fo’i i le salatupe e le silia i le $5,000, poo faasalaga uma fo’i ia e lua.

O le tama’ita’i loia fautua lagolago ia Anna Wells na tula’i mo One ma Pauga, ae o le tama’ita’i loia sili lagolagao ia Christy Dunn na tula’i mo le itu a le malo i le taimi o le ulua’i iloiloga.

E $40,000 lea ua fa’atulaga e le afioga i le ali’i Fa’amasino ia Fiti Sunia e tatala ai i tua ia One, ae $35,000 mo Pauga.

Afai ae mafai ona tatala i laua i tua, ua fautuaina ina ia aua ne’i o la toe taumafai e fa’afesoota’i molimau a le malo, pe la te toe soliina fo’i se tulafono, a ia avea i laua ma tagatanu’u lelei e tausisi i tulafono a le malo i taimi uma.

Na teena e Sunia le talosaga a Wells mo se avanoa e fa’aitiitia ai i le ta’i $10,000 le tupe a tatala ai i tua i laua ua molia.

Saunoa Sunia e fa’apea, o le tupe ua mae’a ona fa’atulaga e le fa’amasinoga, ua talafeagai lea ma le matuia o le solitulafono sa fa’atinoina.

MALIA ONE

I le tagi a le malo fa’asaga ia One o loo taua ai e fa’apea, i le aso 28 o Setema o le tausaga nei, na fa’agasolo ai le su’eina o tupe a le kamupani o le TMO e se Su’etusi fa’apitoa. O le mae’a ai o le galuega sa fa’atinoina e le Su’etusi, na manino mai ai loa le tele o le eseesega o tupe o loo maua i fa’amaumauga a le kamupani, ma le tupe o loo teuina i ana teugatupe.

O le fa’amaonia ai i suesuega a le kamupani o se aafiaga i tupe ma fa’amaumauga, na tuuina atu ai loa sa latou tagi i le Ofisa o Leoleo fa’asaga ia One ma Pauga. I faamaumauga sa maua mai ai i le suesuega a le Suetusi, e tusa ma le $36,109.04 le aofa’i o le tupe na gaoi e One i totonu o le 9 masina.

O le gaioiga e faia e One e pei ona maua i suesuega a le kamupani, na te oomi le ki o le masini, ona fa’afoliga lea e sese le gaioiga sa faia, ma ia aveese mai ai le tupe mai totonu o le masini.

O le fa’agasologa lea o masina ma le aofa’i o tupe o loo tu’uaia sa gaoi e One: Ianuari - $1,120.14; Fepuari - $2,069.03; Mati- $2,282.67; Aperila - $5,389.18; Me - $8,278.03; Iuni - $5,559.86; Iulai - $5,836.00; Aokuso - $3,448.00; Setema - $3,448.86.

Ina ua fesiligia e Leoleo ia One i lona aiga i Fogagogo, sa ia ioeina ai lona ave fa’agaoi o tupe mai le TMO ao galue ai o se Talitupe. Sa ia ta’utino fo’i e fa’apea, sa ia iloaina lava e le sa’o le gaioiga sa ia faia, ae ona o lona le mautonu i tulaga fa’aletonu o le tamaoaiga o lona aiga, na mafua ai loa ona ia faia lea tulaga.

INOSIAOLOUAIGA PAUGA

I le tagi fa’asaga ia Pauga o loo taua ai e le malo e fa’apea, i le aso 8 o Novema na te’a nei, na feiloa’i ai Leoleo ma le Su’etusi a le TMO e tusa ai o le ripoti na mafai ona tu’u fa’atasi mai fa’amaumauga a le Kamupani.

E tusa ai o lea ripoti e pei ona taua e le Su’etusi a le Kamupani, o Pauga sa galue i le TMO talu mai le masina o Fepuari o le tausaga nei o se Talitupe. I le va o Aperila ma Setema, na ave fa’agaoi ai e Pauga se vaega tupe mai le kamupani.

O lo o tu’uaia e le malo ia Pauga i lona ave fa’agaoi lea o se vaega tupe mai le TMO e tusa a le $33,831.35. O le fa’agasologa lea o masina ma le aofa’i o tupe o loo tu’uaia sa gaoi e Pauga: Fepuari - $3,917.97; Mati - $1,426.82; Aperila - $3,735.34; Me - $7,932.79; Iuni - $6,683.97; Iulai - $4,673.29; Aokuso - $2,320.75; Setema - $3,140.42.

Ina ua fesiligia e Leoleo ia Pauga e uiga i lenei mataupu i lona aiga i Vailoa, sa ia ioeina ai lona ave fa’agaoi o tupe mai le TMO. Sa ia fa’atoese fo’i i Leoleo e tusa ai o lana gaioiga sa faia.