Molia ni leoleo o le falepuipui mo fanau talavou i le sauaina o se tasi o alii talavou

Pago Pago - AMERIKA SAMOA

O se vaitaimi lata mai, na molia ai ni leoleo o lo’o leoleoina ia le falepuipui mo fanau talavou, i le sauaina o se alii talavou o lo’o i lalo o le latou leoleoga, ma o se tulaga ua faapea ona fa’atula’ia ai ni popolega i le malu puipuia o fanau talavou i totonu o lea nofoag, faatasi ai ma le auala o lo’o mata’ituina ai lenei nofoaga mo fanau talavou.

O i latou ua lokaina i lenei mataupu, ua aofia ai Nick Sekai, Maureen Saupo, Fiafia Fiafia ma Chris Auvele ma e ta’i $500 ua fa’atulagaina e totogia, ina ia mafai ona tatalaina ai i latou mai i le falepuipui, a’o fa’agasolo a latou fa’amasinoga.

Ua fa’apea ona mataina lenei mataupu, talu ai se ripoti mai i le sui Faatonusili o Falepuipui, i le tele o fa’asea ua o’o atu ia te ia, e tusa ai ma amioga a leoleo o lo’o leoleoina le nofoaga o lo’o tu’uina iai fanau talavou, e tuli ai a latou faasalaga, pe faatalitali ai a latou faamasinoga.

E tusa ai ma fa’amaumauga a le faamasinoga, sa amata ona alia’e nei fa’afitauli, ina ua sola se alii talavou sa taofia i le JDC (Juvenile Detention Center), ia Ianuari 12, 2025 ma ina ua toe maua atu lea alii talavou, sa o latou lokaina o ia i totonu o lona sela, ae latou te le’i tu’ua JDC. 

Ae e tusa ai ma le fa’amatalaga a lenei alii talavou, ina ua tu’umuli ‘ese atu leoleo, sa faapea ona ta ina o ia e le alii leoleo o Fiafia, i le va o pa o lona sela, ma lapataia o ia (alii talavou), e faatali pe a o atu leisi vaega.  

Sa ta’ua e le alii talavou, le te’a o le lima minute talu ona faia le faamatalaga a Fiafia, ae o latou ulufale atu ma Sekai, Saupo ma seisi pagota, e le masani iai le alii talavou.

Na ta’ua e le alii talavou le fa’atonuina o ia e talai ‘ese uma ona lavalava, ma sa lokai ona lea o ona lima.  Ona tatu’i lea o ia, ma i’u ai ina ona pa’u i lalo.

Ma sa faapea ona tososina e se tasi o leoleo ia ona lima, ae o lo’o taofiofi e le pagota ia ona vae, o se tulaga na ia matua’i lagona ai le tiga o lona tino.  Sa ta’ua foi e le alii talavou, le pu’eina o sona ata vitio e leoleo, i le taimi sa faia ai nei tulaga uma, ia te ia.

Ina ua mae’a, sa faapea loa ona aveina o ia i seisi potu sa iai seisi foi leoleo, lea o lo’o masalomia, sa sasaina o ia i pakete uga, ae po faatolu o ia e seisi leoleo, i ona foliga.  

Ona o le mamafa o sauaga sa faia i lenei alii talavou, sa ia ta’ua ai lona manatu, e pule i lona ola.

I le tolu aso mulimuli ane, sa faapea ona alu atu ai ia se alii leoleo, o Chris Auvele i lona sela ma tu’i fa’atolu ona foliga, lea sa manu’a ai ona foliga ma pa ai lona isu.

O le aso na soso’o ai, sa faamatalaina ai loa e le alii talavou ia le sauaina o ia, i se isi leoleo ma faapea ai loa ona failaina se ripoti e saili ai se faamasinoga tonu e faasaga i le sauaina o lenei alii talavou, a’o i totonu o le falepuipui a fanau talavou.