Molia ni alii se to’aono ona o se misa i se fale kalapu

Pago Pago - AMERIKA SAMOA

O le 1:00 i le vaveao o le aso 4 o Me, 2025 na tula’i mai ai se fa’alavelave i se fale kalapu, na a’afia ai ni alii e to’aono mai i Tafuna, na aofia ai Kananafou Savea, Siaosi Leaea, Ierome Epati, Tamahero Galu, Kiuga Wells ma Leuma Wells.

E tusa ai ma fa’amaumauga a le faamasinoga, sa fasi e Savea, Galu, Epati, Leuma ma Kiuga Wells faapea ma Leaea, ia ni alii se to’alua i totonu o le fale kalapu.

Sa mafai ona fa’amaonia e leoleo ia i latou uma na molia, e ala i ata vitio sa pu’eina e le masini pu’e ata a le fale kalapu faapea ai ma ata sa faasalalauina i luga o upega tafa’ilagi.

Na fa’aalia i ata vitio, ia Leuma Wells, sa ia tatu’i ina ma kiki ina ia se tasi na a’afia, ona ia tosoina lea o se tasi i fafo o le fale kalapu ma fasi ai.  Ina ua mae’a ona fasi e Leuma ia le tagata lona lua, sa ia faapea ona ia toe fasiina seisi alii.  Ma ina ua savali atu seisi alii i fafo, sa faapea ona kola mai e Leuma ma tu’i le gutu o lea tagata.

O Savea, sa va’aia lona fasi ina o se alii ma ina ua mae’a lea, sa ia oso atu ma fusu ma so’o se tasi na tau atu iai.  O Epati, sa va’aia lona fasi ina o se alii ma ina ua mae’a, ona ia liliu mai, i le fasi seisi alii.

Ae o Galu sa va’aia i ata vitio, o ia futi ina le ulu o se alii ma tatu’i ona foliga.  Ona ia savali atu lea i fafo o le fale kalapu, ma fesoasoani ia Leuma, i le fasiga o seisi alii.

Na va’aia Kiuga Wells o tu’i fa’alua ia foliga o se alii, ona ia kiki ina fa’aono lea o le itu , o foliga o lea alii.  Ma a’o taumafai lea alii e sulufa’i atu i totonu o le falekalapu, sa tago Kiuga Wells i le togi i se fagu pia.

O Leaea na va’aia i ata vitio, o fesoasoani ia Galu i le fasiga o seisi alii.

Ma e tusa ai ma faamatalaga a i latou sa fasi e i latou ua molia, na pei o le ‘emo o le mata le tupu o le faalavelave, ma sa le mafai ona o latou fa’amaonia, po o ai sa fa’ao’olima ia i latou.

O i latou na a’afia sa faapea ona manunu’a mitimiti, se’ia vagana le to’atasi sa fai sina tuga o lona manu’a i lona mata taumatau ma lona isu.

Ae to’atasi le na manu’a sa ia toe ave i tua lana tagi e faasaga ia i latou na molia.

O moliaga a Kananafou Savea, o le Faatupu Vevesi i nofoaga faitele – o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

E $300 se vaegatupe na fa’atulagaina e mafai ona tatalaina ai i tua mai i le falepuipui, a’o faagasolo lana mataupu i le faamasinoga.

O Siaosi Leaea, Ierome Epati, Tamahero Galu ma Kiuga Wells, e ta’i lua a latou moliaga.

Faitauga 1:  Faatupu Vevesi i nofoaga faitele – o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

O Siaosi, Ierome ma Tamahero sa tu’uina iai le ta’i $300, e mafai ona tatalaina ai i tua mai i le falepuipui, a’o fa’agasolo a latou fa’amasinoga.  Ae o Kiuga, e $700.

O Leuma Wells, sa molia i moliaga, e pei ona molia ai leisi to’alima, ae na toe fa’aopoopo iai ma moliaga e lua, o le Fa’ao’olima i lona tulaga e tolu - o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

E $500 le vaegatupe sa tu’uina ia Leuma, e mafai ona tatalaina ai o ia mai i le falepuipui, a’o fa’agasolo lana mataupu i luma o le faamasinoga.