Molia ni ali’i se to’alua i le talepe fale ma le gaoi

O le vaiaso na te’a nei na pu’e fa’apagota ai e Leoleo ni ali’i se to’alua ona o tu’uaiga i lo la auai lea i le osofaiga o se Faleoloa i Tafuna i le amataga o le masina na te’a nei.

O ali’i e to’alua ua molia nei e aofia ai Sooupu Kalapu ma Vincent Agafili. O le aso Gafua o le vaiaso na te’a nei na tutula’i ai i laua nei i luma o le Fa’amasinoga Fa’aitumalo mo le la ulua’i iloiloga.

O le ali’i loia sili lagolago ia Jason Mitchell o lo o tula’i mo le malo i lenei mataupu, ae o le ali’i loia fautua lagolago ia Bob Stuart o lo o tula’i mo Kalapu ma Agafili.

O loo molia Kalapu i moliaga mamafa e 2 e aofia ai le talepe fale i le tulaga lua ma le moliaga o le gaoi. O Agafili o lo o tu’uaia i moliaga e 2 o le talia lea o oloa na ave faagaoi faapea ai ma le tete’e atu i Leoleo ao taumafai e pu’e fa’apagota o ia.

E $10,000 lea ua fatulaga e tatala ai i tua Kalapu, ae $5,000 e tatala ai i tua Agafili. O le aso Tofi o le vaiaso nei i le itula e 10:30 lea ua fa’atulaga e faia ai le ulua’i iloiloga o lenei mataupu.

Na teena e le Fa’amasinoga le talosaga na faaulu e le loia a i laua ua molia, mo se avanoa e mafai ai ona fa’aitiitia le tupe e tatala ai i tua i laua. Na talosaga Stuart ina ia faaitiitia le tupe e tatala ai Kalapu i le $2,000, ae faaitiitia le tupe e tatala ai i tua Agafili i le $1,000.

I le mae’a ai ona iloilo e le Fa’amasinoga o faafinauga a itu e lua, na tuuina mai ai loa le faaiuga e teena ai le talosaga ina ia faaitiitia tupe e tatala ai i laua i tua. E talitonu le Fa’amasinoga, o lo o talafeagai pea lava vaega tupe ua mae’a ona fa’atulaga ma le mamafa o solitulafono o lo o tu’uaia ai i laua.

TAGI A LE MALO

E pei ona taua e le malo i le latou tagi e fa’apea, i le amataga o le masina na te’a nei na logoina ai e le pule o le Faleoloa a le Lin Kim Mart i Tafuna le Ofisa o Leoleo mo se fesoasoani, i le mae’a ai lea ona ia iloaina o se faaletonu i totonu o lona Faleoloa.

Na taua e le pule o le Faleoloa i Leoleo e faapea, ina ua usu mai i le taeao o le aso 4 o Aokuso 2019 e tatala lona faleoloa, sa ia maitauina ai le faitoto’a pito i tua ua malepe, atoa ai fo’i ma le faamalama ua tatala ese luva e 5. Sa ia maitauina fo’i i le vaega e teu ai oloa le tele o pusa oloa ua aveesea mai le nofoaga sa i ai.

Na siaki e le Pule o le Faleoloa le masini pu’eata ma maua ai gaioiga sa mafai ona pu’eina i le itula e 3:43 i le vaveao o le aso lava lea, o se tagata e fusi atoa lona ulu o loo fealua’i i totonu o le faleoloa.

Na tuuina atu e le Pule o le Faleoloa i Leoleo le kopi o le ata sa pu’eina e le masini a le Faleoloa, ina ia mafai ai ona fesoasoani ia latou sueseuga.

E pei ona taua i suesuega a Leoleo, e tele naua oloa na aveese ma gaoia mai i totonu o le Faleoloa. O nisi o ia oloa e aofia ai pusa saimini e 10, lea e ova i le $80 le tau aofa’i; e 2 pusa ga’o o le ituaiga o le Wesson oli e tusa ma le $165 lona tau aofa’i; 2 pusa o pepa ‘ai e taua o le ‘onion rings’ e tusa ma le $92.40 le tau aofa’i; faapea ai ma le tele o mea’ai tu’u apa e silia ma le $250 lo latou tau aofa’i.

A o galulue Leoleo i le tau sailia o ni fa’amatalaga e uiga i lenei fa’alavelave, sa fa’afuase’i ona aga’i atu se tagata ma ia faailoa i Leoleo, o lo o i ai ni fa’amatalaga o lo o ia te ia e ono fesoasoani i le latou suesuega o lo o fa’agasolo e uiga i lenei mataupu.

Na taua e le molimau lea e fa’apea, i se tasi o aso ao faia le latou inugapia ma ana uo i le fale o se tasi o ana uo, na faafuase’i ai ona alu atu Kalapu ia te ia ma fesili atu, pe mana’o e fa’atau sana pusa ga’o fai mea’ai o le ituaiga o le ‘Wesson oil’.

Na taua e le molimau lea i Leoleo e fa’apea, e tusa ai o le fa’amatalaga a Kalapu ia te ia, e 2 pusa ga’o na o atu ma ona matua mai le maliu a le latou aiga sa faia, o pusa ga’o sa fa’atau atu e kuka ai mea’ai o le maliu, peita’i ua le uma ona fa’aaoga, o le mafua’aga lea na tufa ai loa i le aiga pusa sa totoe.

Na aga’i atu Leoleo ma latou pikiina mai Kalapu mai lona fale, ae auina atu i le Ofisa o Leoleo i Tafuna mo suesuega. Ina ua fesiligia o ia, sa ia ta’utino ai i Leoleo ma faamaonia lona osofaia o le Faleoloa o Lin Kim Mart ae gaoia le tele o oloa sa i ai.

Na taua atili e Kalapu i Leoleo e fa’apea, o le tele o oloa sa ia gaoia sa ia tuuina atu lea i le ali’i o Vincent Agafili, o ia fo’i lea e ana le ta’avale na fa’aaoga e la’u ese mai ai oloa mai le taimi na gaoia mai ai.

O oloa uma sa gaoia e pei ona taua e Kalapu, o lo o i ai uma i le fale o Agafili.

E 2 aso talu ona tuana’i le fa’atalatalanoaina e Leoleo o Kalapu, ae latou aga’i atu loa ma piki mai le susuga a Agafili.  Ina ua taumafai Leoleo e loka lima o Agafili, sa tafiti solo o ia ma taumafai e tete’e atu i Leoleo. Mulimuli ane, sa mafai lava ona loka e Leoleo ona lima ma taofia ai loa o ia i lalo o le vaavaaiga a Leoleo.

Ina ua fesiligia o Agafili, sa ia ioeina ai le fa’aaogaina o lana ta’avale a la’u ese mai ai oloa sa gaoia mai e Kalapu mai le nofoaga o loo i ai le Faleoloa na a’afia, ae la’u uma atu i lona fale. Sa ia taua atili fo’i e fa’apea, o nisi o oloa sa mafai ona fa’atau ma la vaelua ai ma Kalapu i le tupe, ae o isi oloa sa teuina lava i lona fale mo le fa’amoemoe e fa’aaoga mo ia ma lona aiga.