Molia ni alii se to’alua i le gaoia o pusa moa mai i se faleoloa i Nu’uuli

Pago Pago - AMERIKA SAMOA

Ua molia nei ni alii se to’alua, e aofia ai le susuga ia Sefo Pati, e 29 tausaga mai Samoa ma Pako Levao, e 19 tausaga ma o se Nesionale a Amerika, i le Gaoi ma le suia o se laisene a se ta’avale sa o la fa’aaogaina.

Ua mafua nei moliaga ona o se fa’alavelave na tula’i mai i le afiafi o le aso 4 o Fepuari, 2024, ina ua fa’afeso’ota’i e le pule o le faleoloa o le Lucky 7, i Nu’uuli, ia le Ofisa a Leoleo i Tafuna, e tusa ai ma ni pusa moa ua gaoia mai i lona faleoloa.  Ma ina ua su’esu’eina ia ata vitio a le faleoloa, sa fa’amaonia ai, o Pati ma Levao lea sa fai ma la’ua le amioga, o le gaoia o pusa moa.

Sa molimauina i le ata vitio a le faleoloa, le la’eiina e Pati o se ofutino ‘aloha’ ma se ofuvae pu’upu’u lanu meamata.  Na iloa foi le tofu o alii ma pe’a i o la a’ao, a’o la la’uina ni pusa mo’a se lua mai i le fulisa na i fafo o le faleoloa.  Ma sa molimauina foi i le ata vitio, le toe aveina e Pati o nisi pusa moa se lua.

Sa faapea foi ona va’aia i le ata vitio, le ulufale o Levao i le totonu o le faleoloa, ma toe fo’i mai i fafo ma nisi pusa moa se lua.

E pe a ma le ono (6) pusa moa na ave’esea mai i le faleoloa i lea aso.  O le tau a le pusa moa e tasi, e $16.99, ma e tusa ai ma faamaumauga a leoleo, o le tau aofa’i o oloa na gaoia i lea aso, e $101.94.

Sa ta’ua foi i le lipoti le taumafai o se tasi o le aufaigaluega e taofia le taavale na sosola ai Pati ma Levao, ae peitai, sa le’i mafaia.

Sa faapea loa ona logoina uma leoleo ina ia nofouta i se ta’avale o lo o pipi’i ai se laisene e pei ona maua i luga o le ata vitio mai i le faleoloa.

Ma o le aso 5 o Fepuari, 2024, na agai atu ai leoleo i Taputimu, i le maota o le tagata e ana le ta’avale lea na va’aia i luga o le ata vitio a le faleoloa ma maua atu ai e leoleo ia Pati ma Levao.  Na maua ai foi i totonu o le ta’avale ia ni mea faigaluega e fa’amama ai taavale, o sikukalaiva e lua ma se fa’ava’a o se laisene taavale.

Ina ua su’esu’eina e leoleo ia laisene sa pipi’i i le ta’avale pa’epa’e (SUV) lea sa sosola ai Pati ma Levao, na faamaonia ai, o le laisene lea o lo’o pipi’i i le ta’avale, o se laisene mo se pikiapu F-250, lea na vaaia e leoleo, o paka i tafatafa o se mago, ae o lo o pipi’i ai foi seisi laisene.

Na fesiligia e leoleo ia le pule o ta’avale nei e lua, ae tali mai Pati ma Levao, o la e tofa.  Ae peitai, na savali mai e tama matua ma fa’afeiloai leoleo .  Ma sa fa’ailoa atu iai e leoleo i le tama matua, ia le tulaga o le o’o atu atoa ai ma le fesuia’iga o laisene o ta’avale nei e lua, ma sa fa’ate’ia ai le tama matua.

Sa faapea loa ona aveina e leoleo ia Pati ma Levao i le latou ofisa mo le fa’aauauina o a latou su’esu’ega, lea sa faamatalaina ai e Pati, o ia sa faafoeina le taavale i le Lucky 7, ae o Levao o lana pasese.

Sa ta’ua e Pati, sa alu i totonu o le faleoloa ma toe fo’i mai i fafo ma si’i mai pusa moa e lua ia sa i luga o le fulisa i luma o le faleoloa, ma tu’u ia pusa moa i totonu o lana ta’avale.  Ae sau Levao ma si’i mai isi pusa moa e lua.

Na faamatala foi e Pati, sa o la fa’atauina atu ia pusa moa i se faleoloa i Faleniu, i le ta’i $10 lea na maua mai ai se la tupe e $30 ma pusa sikaleti, ona o la fo’i lea i le fale.

Na fa’amaonia foi e Pati, o le po lava lea, na ia ave’esea ai le laisene mai i le pikiapu ma faapipi’i i le ta’avale lea sa la fa’aaogaina (SUV), ona o se popolega ina ne’i maua i la’ua.  Na ta’ua e Pati, e fa’atolu ona o la gaoia, ma Levao, ia ni pusa moa, mai i le Lucky 7.  E la te o ma Levao ma ave pusa mo’a ta’i lua ma o la fa’atauina atu i le faleoloa i Faleniu.

Ina ua fa’atalanoaina e leoleo ia Levao, sa ata le alii ma faapea mai i leoleo, atonu o sana masaga sa faia lea tulaga.  Ae ina fa’amatamata e leoleo ia Levao i ata vitio mai i le faleoloa o le Lucky 7, sa faapea loa ona ia faamaonia, o la’ua ma Pati lea sa fai ma la’ua le amioga lea o le gaoi o pusa moa mai i le faleoloa lea.

Sa faamaonia e Levao le la gaoia ma Pati o pusa moa, ae na te le manatua aso na la faia ai lea tulaga.  Sa ta’ua foi e Levao, na fai atu Pati ia te ia, sa faataga mai e se alii Initia e faigaluega i le faleoloa, e la te aveina ia pusa moa.  Ma o le mafuaaga lea na ia le manatu ai o la faia se mea sese.

I le molimau a le uso matua a Levao, sa ia faamatalaina ai lona masalosalo i gaioiga a Pati ma Levao, e le masani ai, e pei o le faamamaina o le ta’avale i le leva o le po.

Sa faamatalaina e le tagata e ana le ta’avale, o Pati o le to’alua a lona afafine, ma o le aso lea na tupu ai le faalavelave, na faanoi ai e Pati le ta’avale e faatau mai ni pilikaki ma sa la o ma Levao (atalii o le tagata e ana le ta’avale).  E lua itula na o ai, e tusa ai ma le molimau a le pule o le taavale, ae toe fo’i atu ma apa pilikaki e lua.  Ma sa ta’ua e le pule o le ta’avale, o aso uma lava e fa’aaoga ai e Pati ma Levao ia le ta’avale, ae na te le iloa po o fea e o iai.

Na faapea foi ona fa’atalanoaina e leoleo ia le pule o le faleoloa lea e i Faleniu ma sa ia faamaonia lona faatauina o pusa moa mai ia Pati, lea e e masani ona fa’atauina atu ia te ia ia pusa moa mai i a latou faalavelave.  Sa ta’ua foi e lenei faatauoloa, na iai foi se aso na faatauina atu e Pati ia te ia, ni pusa moa e lima (5), o leisi e fa (4) pusa moa na alu atu ma Pati.  Ae o le tau lava lea e na te fa’atauina ai, e $10 i le pusa moa.  

Ae sa le’i manatua e le faatauoloa mai Faleniu ia aso tonu na alu atu faalua ai Pati, i le vaiaso lea o lo’o masalomia ai i le gaoia o pusa moa.

 Ua molia nei Pati ma Levao i moliaga o le Gaoi – o le vasega ‘C’ o solitulafono mamafa, ma e mafai ona fa’afalepuipui ai se tasi i le o’o atu i tausaga e fitu (7), po o se sala tupe e $5,000.

O isi moliaga faaopoopo mo Pati, e aofia ai;

Faitauga e 2:  Gaoi – o le vasega ‘A’ o solitulafono mama, e mafai ona fa’asala ai se tasi i le falepuipui, i le le silia ma le tasi (1) tausaga, po o se sala tupe e le silia ma le $1,000; po o fa’asalaga uma e lua.

Faitauga e 3:  Fa’aaoga faasolitulafono ia Laisene Ta’avale – o se vaega o solitulafono mama, lea e mafai ona fa’afalepuipui ai se tasi i le le sili atu ma le ono (6) masina, po o se sala tupe e le silia ma le $500; po o fa’asalaga uma e lua.

E ta’i $5,000 tinoitupe faatulagaina mo Pati ma Levao, e mafai ona tatala ai i la’ua mai i le falepuipui, e faatali ai o la faamasinoga.