Molia ia Gabriel Tinai fa’ao’olima i lona tuafafine laititi

Pago Pago - AMERIKA SAMOA

Na maua e le Ofisa o Leoleo i Tafuna se telefoni i le aso malolo 10 Iuni mai se ali’i na ia fa’ailoa i leoleo o lona atali’i o lo o fa’atupu vevesi i le latou fale i Pava’ia’i.

I le taunuu ai o leoleo i le nofoaga i le 9:27pm, na matauina ai e leoleo se alii o loo feei i ni tamaitai se toalua na mulimuli ane iloa o ona tuafafine matutua. O lea tagata, mulimuli ane na taʻua o Gabriel Tinai, na fai upu masoa i leoleo ma taʻu atu ma le malosi i leoleo e faapea "e le faatagaina i latou e faalatalata atu ia te ia pe i ai i le fanua."

Sa taumafai loa leoleo e pu’e o ia, ae na tulei e Tinai se tasi o leoleo ma sola ese. Na tuliloa o ia e leoleo ma saisaitia ma a’o momoli atu le ua molia i le vaega o leoleo, sa ia taumafai pea e sola ese. 

O tuafafine e to’alua o Tinai na fa’atalanoaina e leoleo.

E tusa ai ma faamatalaga a tuafafine uma e toalua, o le vevesi na amata i le va o Gabriel ma lo la tuafafine laitiiti i le fale e le mamao mai le mea na matauina ai e leoleo ia Gabriel ina ua taunuu.

Na kiki e le tuafafine laititi le ta’ifau a le aiga na mafua ai ona po e Gabriel ona foliga ma fai atu foi upu masoa ia te ia. Ona fai atu lea o tuafāfine matutua i le tuafafine laʻitiiti e sili pe a moe i le fale o lana uō ona e lē o faaalia e lo latou tuagane ni faailoga o le toʻafilemu i se taimi vave.

A o savali atu le tuafafine laititi e fetaui ma lana uo i autafa o le auala, sa tago atu Gabriel i le fa’avae o le ili u’amea i talaane o le fale ma taumafai e tu’i lona tuafafine laititi, ae laki na fa’auilavea atu ai tuafafine matutua ma taofia o ia mai le faia o lea mea.

Ona ave lea o Tinai e leoleo i le Ofisa o Leoleo i Tafuna, ma sa musu e tuuina atu se faamatalaga i leoleo. Na taofia o ia ma tulai i luma o le faamasinoga i le Aso Lua, Iuni 20, 2023 mo lana uluai iloiloga.

E 3 moliaga faasolitulafono o lo o molia ai o ia - 1 le moliaga o le faatupu vevesi i nofoaga faitele, 1 le moliaga o le faaoolima i le tulaga tolu, ma le 1 moliaga o le tetee i le pueina faapagota.

E $500 le tupe lea ua fa’atulaga e le fa’amasinoga mo Tinai.