Molia I le faatupu vevesi, faia o uiga mata I se tamaitai talavou ma le umia o fualaau faasaina

Pago Pago, AMERIKA SAMOA

O se ali’i e 40 tausaga le matua mai Tafuna, na taofia faapagota e Leoleo i le masina na te’a nei, ona o tuuaiga i lona faia o ni gaioiga e lepeti ai le nonofo filemu o aiga tuaoi, ua molia nei e le malo i isi moliaga faaopoopo, e aofia ai le faia o uiga mataga i se tamaitai talavou atoa ai ma le umia faasolitulafono o fualaau faasaina.

O le masina na te’a nei na tula’i ai le susuga a Matthew Fa’aaliga i luma o le Fa’amasinoga Faaitumalo, e tali I ona moliaga e lua, e aofia ai le moliaga e tasi o le talepe fale i le tulaga muamua faapea ai ma le moliaga e tasi o le tagofia o itutinosa o se tamaitai i le tulaga muamua, o le vaega lea o solitulafono e mafai ona faasala ai se tasi i le Toese mo le umi e le silia i le 7 tausaga, pe faasala foi i le salatupe e le silia i le $5,000, poo le faasala fo’i i faasalaga uma ia e lua; faapea ai ma le moliaga e tasi o le soli fua o le fanua o le isi tagata, o le vaega o solitulafono mama.

I le tagi lona lua faasaga i le ali’i ua molia, ua tu’uaia ai o ia i le moliaga o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o vaega ia o solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, poo le faasala i le salatupe e oo atu i le $20,000; faapea ai ma moliaga mama e 2 o le faaoolima i le tulaga tolu atoa ai ma le faatupu vevesi i  nofoaga faitele. 

E $20,000 lea ua faatulaga e tatala ai Faaaliga i tua mai le Toese i Tafuna. Afai ae tatala o ia i tua, e le mafai ona ia taumafai e faafesoota’i molimau a le malo, e aofia ai ma i latou o loo aafia i lenei mataupu. E le mafai fo’i ona toe taumafai e alu i le nofoaga o loo masalomia na tula’i mai ai le solitulafono.

TAGI A LE MALO

O le po o le aso 12 o Me 2021 i le itula e 11:35 na faafesootai ai e se Tina le Ofisa o Leoleo i Tafuna mo se fesoasoani, faasaga i ni alii se to’afa o loo faia se latou inugapia i le fale a le latou tuaoi ma pisapisao ai. Na taua e le Tina i Leoleo le palalauvale o isi alii e to’alua ma tau’ai solo atigi fagupia i luga o le alatele, ma le leo o le musika ua leotele naua ae ua leva le po.

Na taua atili e le Tina i Leoleo lona vaaia o le isi alii e to’atasi mai le inugapia o loo fealualu solo i fafo o le fale ma se agaese i lona aao taumatau, ae o loo fa’aauau pea lava lona laulau vavale ma pisapisao solo.

Na vave gaioiga a Leoleo ma latou taunuu ai i le nofoaga o loo taua o loo tula’i mai ai le faafitauli. Na taunuu Leoleo ma latou molimauina ai alii e to’alua o loo saofafa’i i tua o le keli o se pikiapu lanu uliuli o loo paka i luma o le fale o loo masalomia le faia ai o le inugapia. O le isi vaaiga na molimauina e Leoleo, e to’atasi se alii na vaaia o loo taatia i luga o le mutia i fafo o le fale o loo pisapisao ma laulauvavale, ae o le isi alii o loo fealua’i i luma o le alatele ma le agaese i lona lima. 

Na aga’i atu isi Leoleo ma taumafai e faato’afilemu le alii o loo fealua’i solo ma le agaese, mulimuli ane sa pu’e faapagota o ia ma taofia i lalo o le vaaiga a Leoleo, ae o isi Leoleo na aga’i atu i le alii o loo taatia i luga o le mutia ma latou iloa ai, o loo manu’a le ulu ma foliga o lea alii ma ua lilofia ona foliga i le toto.

Na faafesoota’i le vaega a le EMS ma auina atu ai loa le alii na manu’a i le Falema’i o le LBJ i Fagaalu mo togafitiga, ae auina atu le alii na fealua’i a le agaese i le Ofisa o Leoleo i Tafuna mo suesuega. O le alii na fealua’i ma le agaese i lona lima, o ia lea o Matthew Fa’aaliga, le ali’i e 42 tausaga le matua o loo molia i lenei mataupu.

Na fesiligia fo’i e Leoleo alii e to’alua na saofafa’i i tua o le keli o le pikiapu sa paka i luma o le fale na tula’i mai ai le faalavelave, ma mafai ai ona maua e Leoleo ni isi faamatalaga e faatatau i le faalavelave sa tula’i imai.

A o le i auina atu le ali’i o Fa’aaliga i le Ofisa o Leoleo mo suesuega, na faia se siaki faapitoa i lona tino mo fualaau faasaina poo ni a’upega mata’utia, ma maua ai e Leoleo i le taga o lona ofuvae se pepa iila o loo i ai vaega o le pauta pa’epa’e.  I suega na faia e leoleo I lenei pauta pa’epa’e, na faamaonia ai, o vaega ia o le pauta faasaina o le aisa. 

Na faaauau le siaki a Leoleo ma latou maua ai i le isi taga o le ofuvae a le ua molia se tamai pepa iila o loo afa i lau laau mamago, ma I suesuega a leoleo, na faamaonia ai o nei lau la’au, o le ituaiga o laau faasaina, o le Mariuana.

Na taua e se molimau i Leoleo e faapea, sa faia se inuga pia a ni ali’I se to’afa I totonu o le fale ma na lagonaina le pisapisao ma le laulauvavale mai o nei alii I totonu o le fale.  E le’I umi ae aga’I atu loa iai se tagata I le fale lea.  Ma o lenei tagata, o se tama e nofo I le aiga tuaoi ma sa aga’I atu e talanoa I le ua molia I le tulafono, e tusa ai ma se faalavelave na tula’I mai I le po ua mavae, lea e faapea, na alu atu ai Fa’aaliga I totonu o le latou fale ma ia taumafai e faia ni uiga mataga I le afafine e 16 tausaga, a lenei tama.

Na ta’ua e le tamaloa lenei I leoleo, na avea lona talanoa atu ia Fa’aaliga ma itu na ita ai ma savali ai I tua o le nofoaga sa fai ai le latou inugapia, ma fo’I mai ma se paipa u’amea.  Na ta’ua e le tamaloa le ova o le fa’asuaava o Fa’aaliga, na iloa gofie lava I lana talanoa ma ana taga sa fai.  Na ta’ua e le tamaloa lona vave alu ‘ese ina ua ia mautino e iai le faalavelave o le a tula’I mai

Ina ua toe fo’i mai Fa’aaliga i luma o le vaega tonu sa tu atu ai le Tamaloa, ua leai se isi, ae o loo tu atu ai se tagata. Sa manatu Fa’aaliga i lona mafaufau, o le Tamaloa lava lea o loo tula’i atu i luma o le fale, ma ia sasaina loa le ulu o le tagata lea i le paipa u’amea atoa ai ma le faaoolima i ai e ala i lona kiki ona foliga. Ae na te’i Fa’aaliga ina ua ia toe iloa mulimuli ane, o lana uo na latou inupia lea e manu’a.

Na fesiligia e Leoleo ia Fa’aaliga e tusa ai o lenei faalavelave, ma ia faamaonia ai lona faaoolima i le ali’i na manu’a e ala i lona fa’aaoga o se paipa u’amea e sasa ai lona ulu. Na taua e le ua molia e faapea, sa i ai lona manatu o le Tamaloa lea na alu atu ia te ia ma faamisa ai, o ia lea o loo tu atu i luma o le fale i le pogisa i le taimi na fo’i mai ai ma le u’amea i lona lima. 

Faatoa ia iloaina lava e ese le tagata o loo manu’a ina ua palasi i lalo le tagata na manu’a ma faamaonia ai loa, o lana lava uo lea ua toe aafia ia te ia.

Na ioeina fo’i e le ua molia fualaau sa maua ia te ia, o fualaau faasaina sa maua o meatotino a ia na faatau mai i se tasi o ana uo ave pasi mai Tafuna.