Molia i le faaoolima se alii o loo nofovaavaaia ona o le gaoi

Pago Pago - AMERIKA SAMOA

O le masina na te’a nei na taofia faapagota ai e Leoleo se ali’i o loo nofovaavaaia i le gaoi, ina ua taofi e Leoleo lana ta’avale I le soona alu saoasaoa I luga o le alatele ae maua ai fualaau fa’asaina. 

Na taua e le susuga a Tuileoo Valusaga i Leoleo, o fualaau fa’asaina na maua i lana ta’avale, na fa’atau mai i se alii mai Vaitogi, e masani lava ona alu atu e tulei ma faatau atu fualaau faasaina ia te ia ma ana uo.

Na taua e le malo i le latou tagi e fa’apea, a o tiute ni Leoleo se to’afa i luga o le alatele a le malo i Futiga i le afiafi o le aso 22 o Aokuso 2022, na la molimauina ai se ta’avale pikiapu o lo o sau mai Mesepa e aga’i atu i Faleniu i se saoasaoa e le tusa ma le tulafono.

Na faatino e Leoleo le auala e masani ona fa’atino ma taofia ai loa le ta’avale pikiapu lanu uliuli i luma o se faleoloa i Malaeimi. E to’alua ali’i sa i totonu o le ta’avale, o le susuga a Tuileoo Valusaga, o ia lea o le ave ta’avale, lea fo’i o lo o molia i lenei mataupu, ma le susuga a Aleki Vasa.

Na faailoa e Leoleo ia Valusaga le mafua’aga o le taofia o lana ta’avale ona o le soona alu saoasaoa i luga o le alatele mai maila faatulafonoina, peita’i na finau le ali’i ave ta’avale ia Valusaga fai mai, e le i soona alu saoasaoa lana ta’avale o lea lava sa alu i maila faatulafonoina o le alatele.

Na umi se taimi o finau Leoleo ma le ali’i ave ta’avale, ona talosaga lea o Leoleo i le ali’i ave ta’avale e avatu lona laisene ave ta’avale se’i vaai poo lelei. Na vaaia e Leoleo foliga te’i ma le popole o le ali’i ave ta’avale ao talosagaina lona laisene. E leai se laisene ave ta’avale sa i le alii ave taavale i le taimi na taofia ai lana ta’avale ma fesiligia ai o ia. E o o lava fo’i i soo se isi lava ituaiga pepa e faamaonia ai o ia, e leai ma se mea na maua i le taimi lea.

Na saili e Leoleo le igoa o Tuileoo Valusaga i faamaumauga a le Ofisa o Ta’avale Afi ma faamaonia ai, e i ai le laisene ave ta’avale a Valusaga ae na mae’a lona aoga i le aso 12 o Tesema, 2019.

Talu ai ua le ausia e le alii ave ta’avale tulafono i luga o le alatele, na fa’ailoa ai loa e Leoleo le faaiuga ua faia, o le taofia lea o lana ta’avale i lalo o le vaaiga a Leoleo, atoa ai ma le auina atu o ia i le Ofisa o Leoleo i Tafuna mo isi suesuega atili. E ui na musu le alii ave taavale peita’i na i’u lava ina malie lona loto ma latou malaga atu loa ma Leoleo. Na auina faatasi atu ai fo’i ma le ali’i na to’alua ma Valusaga i totonu o lana ta’avale, le susuga a Vasa.

A o le i auina atu Valusaga i le Ofisa o Leoleo i Tafuna, sa ia tago ma tu’u se ato ta’ita’i lanu enaena i le Leoleo ma lana faaupuga, e ave le ato ia Vasa. Na fesili le Leoleo ia Valusaga poo ai e ana le ato, ae na tali Numia, “o le ato a Vasa o loo i ai le fa’atau i totonu”. Ina ua tu’u atu le ato ia Vasa, sa ia tete’e malosi ma fai i le Leoleo, e le o ia e ana le ato, o le ato a le susuga a Valusaga, o Valusaga fo’i e ana le fa’atau o loo i totonu o le ato ta’ita’i lanu enaena.

Na taunu’u le ta’avale i le Ofisa o Leoleo i Tafuna ona toe alu lea o le Leoleo ma toe ave le ato ia Valusaga ma fai i ai, o loo tete’e le susuga a Vasa fai mai e le o ia e ana le ato. Na finau malosi pea le ua molia ma fai i le Leoleo, e toe fo’i e ave le ato ia Oliva, o ia e ana le ato. O le taimi lea na fai ai loa le Leoleo i le alii ave tavole ua molia, mo se avanoa e su’e ai le ato.

Ina ua tatala e Leoleo le ato, na maua faatau o mea’ai e pei o pepa saimini, apa pisupo e 2, faapea ai pepa keke ma le apa pinati e tasi. Na maua ai fo’i e Leoleo i totonu o le ato ta’ita’i enaena se tamai container plastic lanu pa’epa’e. 

Ina ua tatala le tamai container plastice, na maua ai e Leoleo ni pepa iila laiti se 4 o lo o i ai vaega o le pauta paepae, faapea ai ma se pepa iila laititi se tasi o lo o i ai lau mamago lanu meamata. Sa maua fo’i foi pepa iila laiti e 7 e le o i ai ni mea i totonu, faapea ai straws e 4 ua uma ona ta tipi tulimanu o loo paepae solo ai i totonu o le tamai container plastic lea.

Na faia se suega i le pauta paepae ma faamaonia ai, o vaega ia o le pauta faasaina o le aisa. Na faia fo’i se suega i lau mamago lanumeamata ma faamaonia ai, o vaega ia o le laau faasaina o le mariuana.

Ina ua fesiligia e Leoleo ia Vasa, sa ia faamaonia ai,  o Valusaga o lana uo e masani lava ona la tafafao i le tele o afiafi. E masani ona alu e fesoasoani i galuega a Valusaga i lona fanua ma lana ma’umaga, ae i ai fo’i taimi na te iloa ai o lo o tulei e Valusaga fualaau fa’asaina.

I le aso e pei ona taofia ai le la ta’avale, na taua ai e Vasa le la aga’i atu i le nofoaga o loo fatau ai fualaau faasaina i Vaitogi ma faatau mai ai e Valusaga fualaau faasaina ma le faamoemoe e fa’aaoga mo ia lava. Na ta’utino Vasa, na te le tagofia fualaau faasaina.

E ui na tete’e malosi Valusaga i le ulua’i taimi na fesiligia ai o ia e Leoleo e faatatau i fualaau faasaina sa maua i totonu o le ato, peita’i na ia malie mulimuli ane ai e faailoa i Leoleo faamatalaga uma e uiga i fualaau faasaina.

Na taua e le ua molia, o ia e masani ona alu i se nofoaga i le afioaga i Vaitogi ma Iliili e faatau mai ai ana fualaau fa’asaina e ula ma fa’aaoga mo ia lava. I le aso e pei ona taua, na la o ai ma Vasa i le nofoaga masani lea e faatau mai ai ni fualaau faasaina mo ia ina ua mae’a le la galuega, o le faamamaina lea o lona fanua faapea ai ma le velega o le ma’umaga.

Na tatala i tua Vasa e aunoa ma ni moliaga na faia faasaga ia te ia, sei vagana ai Valusaga na taofia e Leoleo ma molia i le tulafono.

O le masina na te’a nei na tula’i ai Valusaga i luma o le Fa’amasinoga Faaitumalo.

Ua molia e le malo ia Valusaga i le moliaga o le umia faasolitulafono o vaega o le pauta faasaina o le aisa; faapea ai ma le moliaga o le umia faasolitulafono o lau o le laau faasaina o le mariuana; o ni solitulafono mamafa e mafai ona faasala ai se tasi mai le 5 e oo atu i le10 tausaga, pe faasala foi i le salatupe e oo atu i le $20,000, poo le faasala foi i faasalaga uma ia e lua.

E $15,000 le vaega tupe lea ua fa’atulaga e tatala ai i tua Valusaga.

Afai ae mafai ona tatala o ia i tua, e le mafai ona ia toe taumafai e faafesoota’i molimau a le malo, e aofia ai ma le ali’i lea na la to’alua i totonu o lana ta’avale; e le mafai ona ia tuua le atunuu e aunoa ma se faatanaga a le Fa’amasinoga, e le mafai fo’i ona ia toe tagofia fualaau faasaina poo le ‘ava malosi, a ia avea o ia ma tagatanu’u e tausi i tulafono a le malo.

O le taimi o le ulua’i tula’i a Valusaga, na faailoa ai e lana loia lona mana’o e fa’ataunu’u lana ulua’i iloiloga ma le malo.

MATAUPU MUAMUA

O le tausaga e 2018 na ta’usala ai e le Faamasinoga Maualuga ia le alii ua molia nei i le moliaga mamafa o le faaoolima i le tulaga lua ma le gaoi, ma faanofovaavaaia ai o ia mo le 5 tausaga i lalo o tuutuuga e ao ona ia usitaia. O nisi o ia tuutuuga e aofia ai lona tuli o masina e 20 i le Toese i Tafuna, faasa ona ia toe soli se tulafono, faasa fo’i ona ia toe tagofia le ‘ava malosi poo fualaau fa’asaina.

O moliaga e lua e pei ona ta’usala ai Valusaga na afua mai i se inugapia sa faia i le fale o se tasi o ana uo i Tafuna, ma tula’i mai ai loa se vevesi i le va o ia ma le alii na aafia. Na fa’aaoga e Valusaga se u’amea sa i tua o le keli o lana pikiapu ma faaoo ai manu’a i le alii na aafia e ala i lona sasa o lona ulu ma manu’a tigaina ai.

A o ta’atia le ali’i na aafia i lalo ua manu’a, ae na toe savali atu Valusaga ma kiki lona tau’au ma le papatua, toe sosoo atu ai ma isi ana tu’i e 2. Ina ua mae’a, na talepe e Valusaga le ta’avale a le alii na manu’a ae gaoi lana telefoni ma lana ato tupe e silla i le $420 le tinoitupe sa i ai i totonu.