Molia i le faaleagaina o se taavale ona o le puipuiga o lona fanua

Pago Pago - AMERIKA SAMOA

O le aso 3 o Aukuso, na valaau ai se tamaitai i le Ofisa a Leoleo i Tafuna e ripotia ai se tamaloa na tata’eina le fa’ata o lana taavale.

Ma e tusa ai ma faamaumauga a le malo, ina ua taumafai leoleo e ave faapagota le alii ua molia, le susuga ia Pelefoti Sagapolutele, ae tete’e le alii.

Ina ua agai atu leoleo i le nofoaga na tupu ai le faalavelave, sa o latou talatalanoa ma le tina na aafia.  Sa faamatala e le tina i leoleo, na o la malaga atu ma lona toalua i Iliili e su’e se fale fai taavale.  

Ma na savali mai le ua molia i le la taavale, na manatu le ulugalii na aafia, o le inisinia lea.

Ae peitai, Ina ua o’o mai le ua molia i le taavale, na amata ona palauvale mai i le ulugalii na aafia ma faatonu i la’ua, e o ese ma le fanua.

Ona savali lea o le ua molia, i le itu a le avetaavale ma tu’i le faamalama o le taavale.  O iina na faatopetope ai loa ona toe solomuli i tua le taavale a le ulugalii ma aafia ma valaau loa leoleo.

Sa faapea loa ona agai atu leoleo ma lokaina mai loa le ua molia ae e pei ona ta’ua i totonu o faamaumauga a le malo, na tete’e atu le ua molia, i leoleo.

Ma na i’u ai lava Ina toe valaauina nisi leoleo ina ia mafai Ona fesoasoani i le lokaina mai o le ua molia.

Sa faamatalaina e le ua molia i leoleo, o lona fanua e faasa ai tagata, ma o lana gaioiga na faia, sa faia e puipuia ai lona fanua.

E lua moliaga ua molia ai nei Sagapolutele, e aofia ai;

Faitauga 1:  Faatupu Vevesi i nofoaga faitele, o se vaega B o solitulafono mama , e mafai ona nofosala ai mo le ono masina, po o se sala tupé e $500; po o faasalaga uma e lua.

Faitauga 2:  Faaleagaina o mea totino i lona tulaga e lua, o se vaega B o solitulafono mama, e mafai ona nofosala ai mo le ono masina, po o se sala tupe e $500; po o faasalaga uma e lua.

E $500 le vaegatupe sa faatulagaina e tatalaina ai le ua molia, e faatalitali ai lona faamasinoga