Molia e se alii lona lava uso, i le gaoi

Pago Pago - AMERIKA SAMOA

O le taeao o Iuni 1, 2024, na valaau ai le susuga ia Pele Finau i le Ofisa a Leoleo i Tafuna, mo se fesoasoani e tusa ai ma le gaoia o se latou masini faamama (power washer).  Ma na masalomia ai le uso e 23 tausaga a Pele, o Tevita Finau.

E tusa ai ma faamaumauga a le malo, ina ua taunu’u leoleo i le fale o le aiga a Pele, sa vaaia ai ni alii se to’atolu ma se tamaitai se to’atasi, i luma o le fale.  I le talatalanoaga a leoleo ma Pele sa ia faamatalaina ai, le alu atu o lona tama e momoli o ia i lana galuega, ae valaau atu lona tuafafine, ua osofaia e lona uso, o Tevita, ia lo latou fale.

Ma na faapea loa ona o la toe fo’i mai i le fale ma lona tama.  Ma ina ua o la taunuu mai, sa o la va’aia le malepe o le faitoto’a o le latou fale, e pei na kiki e seisi, ma ua le mafai ona toe tapuni.

Sa faamatala foi e Pele e faapea, o lo’o ia iloa o lona uso na faia lea tulaga, aua o taimi uma lava e sau ai i le latou fale, e tago lava gaoi meatotino mai i le fale, ma fa’atau atu i isi tagata.

Sa ta’ua foi e Pele le fa’ailoa atu e se tasi o a latou tuaoi, ia te ia, lona vaaia le talepeina e Tevita o le faitoto’a o le fale ma toso mai i fafo ia le ‘power washer’.

Sa faapea foi ona fa’atalanoaina e leoleo ia le molimau ma sa ta’ua e le molimau, a’o tu tu i luma o lona fale, sa ia va’aia le ua molia, o lo’o savali i totonu o le fale a lona tama.  Ma sa ia lagona foi se pa’o mai i le fale o le tua’a a le ua molia ma ina ua savali atu le molimau e va’ai po o le a le mea o tupu, ae ona ia va’aia ai le matala ole faitoto’a ae o lo’o u’una’i mai i fafo e le ua molia, ia le ‘power washer’.

Na va’aia foi e le molimau ia le tu’uina e le ua molia, ia le ‘power washer’ i totonu o se uilipaelo, ona toso lea agai i le auala, ma tu’u i totonu o se taavale, lea na masalomia, e ona e le susuga ia Sulu Atina’e.

Na faapea loa ona aga’i atu leoleo e saili le alii o Tevita ma ina ua latalata atu i le faleoloa a le P&F, sa va’aia ai le savali atu o lenei alii, agai i se maketi i leisi itu auala.  Ma o iina na lokaina mai ai o ia e leoleo.

Ina ua fa’atalanoaina e leoleo ia le ua molia, sa ia faamatalaina le faatonuina o ia e lona uso e alu e fa’atau ia le ‘power washer’ ina ia maua ai se tupe e fai ai lona aso fanau.  Ina ua iloa e le ua molia, ua o ese lona uso ma lona tama mai i le fale, sa ia alu atu loa ma ave le ‘power washer’.

Sa faamatala foi e le ua molia, lona aveina o le ‘power washer’ ma faatau atu ia Atina’e mo le $25.  Na faapea loa ona aga’i atu leoleo mo le su’eina o Atina’e i lona fale, ae peitai, sa fa’ailoa ifo iai e lona ‘Aunty’, n ausu le alii i le taeao e piki ana tagata faigaluega ma e le i toe fo’I atu i le fale.  Sa fesiligia foi e leoleo ia le uo tamaitai a Atina’e, ae peitai sa ia ta’ua foi le malaga ese atu o Atina’e e piki ana tagata faigaluega, ae e le’i toe fo’i atu.  Sa faatonuina loa le ‘Aunty’ ma le uo tamaitai ina ia fautuaina Atina’e e fa’afeso’o atu le Ofisa a Leoleo pe a toe fo’i ifo i le fale.

Ma o le taeao lava lea na valaau atu ai Atina’e i le Ofisa a Leoleo i Tafuna ma fesiligia le mafuaaga o lo’o saili ai o ia e leoleo.  Sa fautuaina o ia e leoleo ina ia malaga atu i lo latou ofisa e fai sana faamatalaga.

Ma na ta’ua e Atina’e, ina ua taunu’u i le ofisa a leoleo, na alu e piki mai ana tagata faigaluega mai i Pavaia’i ma asia nisi o lona aiga.  Ae ona va’aia ai le ua molia, o lo’o tu i autafa o le auala ma sana uilipaelo, o lo’o iai le ‘power washer’.

Na fesiligia e Atina’e ia le ua molia po o le a lana mea o fai, ae tali le alii o Tevita, pe fia mana’o ia Atina’e e faatau lana ‘power washer’.  Na fai atu iai Atina’e, e na o le $25 lana tupe o iai ma sa faapea loa ona faia le fesuiaiga a le to’alua lea.

O lo’o ta’ua foi i faamaumauga a le malo le faamaonia e le uso a le ua molia, ma lona tama, le leai o se la faatonuga na faia i le ua molia, e alu e fa’atau le ‘power washer’.

Ua molia nei le alii o Tevita i moliaga e tolu;

Faitauga 1:  Faomea i lona tulaga e lua – o se vaega ‘C’ o solitulafono mamafa, lea e mafai ona nofosala ai i le falepuipui i le le sili atu ma tausaga e fitu (7) po o se sala tupe e le silia ma le $5,000; po o faasalaga uma e lua.

Faitauga 2:  Gaoi – o se vaega ‘C’ o solitulafono mamafa, e mafai ona nofosala ai i le falepuipui, e le sili atu ma le fitu (7) tausaga, po o se sala tupe e $5,000; po o faasalaga uma e lua.

Faitauga 3:  Faaleaga o mea totino, i lona tulaga e tolu – o se vaega ‘B’ o solitulafono mama, lea e mafai ona nofosala ai i le falepuipui i le o’o atu i tausaga e ono (6) po o se sala tupe e $500.

E $2,000 le vaegatupe sa faatulagaina e mafai ona tatalaina ai le ua molia mai i le falepuipui, e faatali ai lona faamasinoga.