Misia matua fanau ua mae’a ona fa’atauto e avea ma fitafita taua

O lagona o le misia o fanau mai le avea ai ma fitafita o le taua i se taimi o i luma, na fa’aalia e le to’atele o matua o ali’i ma tama’ita’i e to’a 31 lea na fa’atautoina i le aso Lulu o le vaiaso nei, e avea ma fitafita o le taua i le lumana’i.

“E ui o le tautoga ua leva ona latou moemiti i ai, o galuega fo’i ua uma ona a’oa’oina ai i latou e tautua ai i le malo tele, ae a oo mai loa i lagona fa’amatua ona misia lea o si o’u afafine mai totonu o le aiga”, o lagona ia mai le Tama ia Lagofa’atasi Pusa o Iliili, e fa’atatau i lona afafine lea ulufale atu nei i totonu o le vaega a le US Army.

E eseese uma lagona na mafai ona fa’aalia e matua na lolofi atu e molimauina le fa’atautoina o alo ma fanau, i latou ua i’u filifiliga e ulufale atu i vaega ‘au a le US Army. E le gata o matua, o uo ma paaga sa molimauina lenei sauniga atua, ae sa maua fo’i le avanoa o Tuaa matutua (grandparents) o ni isi o fitafita e auai atu ai mo le molimauina o le isi laasaga maualuga ua la’asia e fanau.

O le itula e 4:00 i le afiafi o le aso Lulu na fa’ataunu’uina ai le sauniga e fa’atauto ai fanau ua pasi suega ma la’asaga muamua e ulufale atu ai i le US Army. O i latou sa fa’atautoina, o se vaega lea mai le to’a 80 o i latou ua mae’a ona pasia suega ulufale, lea na mafai ona maua mai i le polokalame e fa’atosina mai ai tagata e tautua i le Ami a le malo tele.

O le alii fitafita ia Maj. Ulisses Tymes na gafa ma le sauniga o le fa’atautoina o fitafita, ae o le tama’ita’i kapeteni ia Capt. Carneen Cotton na saunoa i le saunoaga autu o le aso.

O le sui o le Ofisa o le Ami Faaleoleo a le atunu’u, SFC. Shaun Salanoa na fai ma fofoga o le polokalame e fa’afeiloaia matua ma le auvalaaulia na mafai ona fa’atasi atu e molimauina lenei sauniga taua.

Na taua e Capt. Cotton i lana saunoaga faapitoa i fitafita o le lumana’i e fa’apea, o le fa’atautoina ai o i latou, ua manino mai ai lo latou la’asia o le isi la’asaga o le olaga e avea ai ma fitafita o le taua.

“O lea ua uma ona tuuina atu lau tautoga, e te puipui le Faavae o le malo o Amerika, ma e tele aua la’asaga taua e te mafai ona e ausia e mafua mai i le tautoga ua e faia. O lea ua amata nei le olaga fa’a fitafita mo oe. E i ai fo’i matafaioi taua e tatau ona e fa’atinoina, ae sili ai i lo na mea uma, ia maua le galulue fa’atasi ma lau vaega i soo se taimi,” o se vaega lea o le lauga a Capt. Cotton.

Ina ia avea ai i latou ma fitafita e tutumau ma mataalia i le galuega, sa ia fautuaina i latou ina ia tumau pea i le tino malosi, ae sili ai le malosi o le talitonu i le Atua e maua mai ai le atamai. Sa ia taua fo’i e fa’apea, e ia i taimi latou te lagona ai le vaivai ona o tulaga faigata o koleniga, peita’i e mana’omia le fa’atino o mea uma ma le loto fiafia.

“Aua nei galo e i ai faafitauli o le galuega, ae mana’omia tele le galulue fa’atasi ina ia mafai ai ona foia ia fa’afitaul. E tatau fo’i ona outou mafaufau i mea lelei e fa’atupu ai le naunau e tautua,” o le isi lea saunoaga a Capt. Cotton.

Sa ia faafetaia le agaga ua mafua ai ona filifili nisi e avea ma fitafita o le taua, e pei o le saili o manuia e atia’e ai aiga, fa’aauau ai aoaoga mo le lumana’i, poo le maua ai fo’i o le avanoa e alu atu ai i fafo, ae poo a lava mafua’aga ua ala ai ona latou filifili e avea ma fitafita, ia latou manatua o lea ua latou filifili ma tauto e avea ma fitafita.

O se tasi o itu sa ia faamamafa i lana saunoaga, o le va feagai o le fitafita ma lona aiga.

“O le avea o oe ma fitafita e le o se avanoa na maua fua, ae na maua ina ua e finau ma taumafai i ai. O se avanoa taua tele lea mo oe e te tautua ai mo le malo o Amerika ma lou atunu’u. Aua ne’i galo lou aiga, a maua sou avanoa fai ma fesootai i lou aiga, o lo o naunau fo’i i latou e fia fesootai atu ia te outou,” o le saunoaga lea a Cotton.

I le avea ai fo’i o ia ma fitafita, sa ia faailoa ai i fanau ua faatauto le taua tele o le fesootai ma matua. Sa ia faafetaia matua i le loto tele ona o taimi faigata o le a aga’i mai, i le motusia lea o mafutaga ma fanau.

Na taua e le ali’i o Michael Punivalu o Utulei i le Samoa News e faapea, ua leva tele ona ia naunau e fia tautua i Ami, a o lea ua tu’uina atu e le Atua le avanoa ia te ia, e le gata e tautua ai lona aiga, ae maua ai fo’i le avanoa e fa’alautele ai le olaga aoaoina.

E faapena foi i le tamaitai o Dorothy Taua o Tafuna, sa ia taua fo’i i le Samoa News lona fiafia ina ua mae’a ona fa’atautoina o ia e tautua ai i vaega ‘au a le malo tele. O lona fa’anaunauga o lo o i ai, ia maua se auala e fesoasoani ai i le atina’eina o lona aiga.

Na taua e le Tina o Taufa’anu’u Isaako lagona faigata o le misia o si ana tama teine o Tulili lea ua mae’a ona fa’atauto. E ui e faigata le misia o fanau, ae o le miti lea ua leva ona vaai mamao i ai Tulili, o le fia tautua lea i totonu o le malo ma le atunu’u e ala i le avea ma fitafita.

Na tuuina mai e le susuga a SFC. Salanoa se lu’i i tupulaga talavou a le atunu’u e le o i ai ni galuega poo aooga foi i le taimi nei, ina ia aga’i atu i le Ofisa a le Ami i le Laufou i Nuuuli, e su’e ai le suega ulufale ina ia maua ai le avanoa e tautua ai mo le atunu’u ma aiga.

Saunoa Salanoa e fa’apea, e tele naua avanoa o loo maua e tupulaga talavou, e tatau fo’i ona latou fa’aaoga tatau ia avanoa taua.