Maua tausima’i a le LBJ si'i totogi folafolaina ma totogi o aso livi

Pago Pago - AMERIKA SAMOA

Na atagia le suiga o totogi o tausi soifua a le falema’i o le LBJ Medical Center i a latou siaki i le vaiaso na te’a nei ma o le ova o a latou livi ua uma ona totogi e le falema’i, e latalata le aofa’i i le afa miliona tala.

E silia i le $425,000 le aofa’i lea sa fa’amaonia e le Pule Sili o le LBJ, le tofa ia Moefa’auo Bill Emmsley i le fa’atalatalanoaga ma le Samoa News i le amataga o le vaiaso lenei.

Fa’ailoa e Moefa’auo i le Samoa News ua lata i le afa miliona tala le paketi mo fetu’unaiga o totogi o tausi soifua ma totogi ai o latou aso malolo.

Sa ia fa’amanino e fa’apea ua maua uma e tausima’i a le LBJ le fetu’unaiga o totogi. Ua le gata i lea ua totogiina foi a latou aso livi ua sili. 

“E tatau i tausisoifua le fetuunaiga o totogi - ae latou te leʻi onosaʻi - aua o se vaega uma o le fuafuaga. Ae o le mea sa latou faia sa le’i tatau ai; O lona uiga o la latou aia tatau, ae sa tatau ona latou onosai,” o se fa’amatalaga lea a Moefa’auo.

“E le faapea na tatou ala a’e anapo ma filifili e tuu i ai se siitaga, e leai o se vaega uma lea o le tatou fuafuaga,” o le saunoaga lea a le Pule Sili o le LBJ.

O lea fa’amatalaga a Moefa’auo e fa’atatau lea i tausima’i sa savavali ese ma galuega i le lua vaiaso talu ai ma fa’atupu ai se tete’e fa’asaga i le puleaga a le falema’i.

E pei ona lipotia muamua e le Samoa News, na tuuina atu e tausi soifua se tusi fa’asea ia Moefaauo, lea na aofia ai le tele o fautuaga e aofia ai le fetuunaiga o totogi mo le Pule o Tausima’i, i le tulaga ulufale mo Tausima’i Resitala; Tausima'i Fa'ata'ita'i Laisene; Tausima'i Fesoasoani ma Failautusi Fa'atonu.

"Afai e maua e le aufaigaluega le ... totogi fa’atulaga, matou te le toe talosagaina se taimi ma le afa mo ovataimi, ae o le fua masani o totogi,” o se vaega lea o le tusi a tausima’i. 

E le gata i lea na fai mai le au tausi soifua e tatau foi ona latou maua se siitaga faaletausaga o le 1 pasene; ma le $500 ponesi Kerisimasi po o ponesi faavae i itula faigaluega mo le tausaga.

Sa latou talosagaina fo'i se avanoa e maua ai livi fa'apenei i le ulua'i taimi totogi ia Tesema po'o le sili atu fo'i ona totogi le afa o livi ae tu'u le isi afa e fa'agasolo se'ia o'o ia Mati o le tausaga e soso'o ai.

Fai mai Moefa’auo, "E leai se tasi na vili le ofisa ma

faailoa mai ia te au o latou popolega, leai se mea."