Maua meaalofa Pepe o le Tausaga Fou & Pepe Uma e soifua 2019

O le tolu ai lenei o tausaga ua faimeaalofa le Kamupani o oloa si'i atoa a le Pacific Independent Distributors Inc i pepe o le Tausaga Fou, ae ua si'itia fo'i i lenei tausaga le tele o lea foa'i.

Ua tumau le taua'aoina lea o le Ulua'i Pepe o le Tausaga Fou o le meaalofa faapitoa, ae ua le tu'ua ai le alolofa tele atu o i latou i pepe uma lava ma latou tina i lea taimi taua o le soifuaga.

"O lenei le fa'amoemoe o le Pacific Independent Distributors Inc, i lona pulega, taupulega ma le aufaigaluega ina ia toe fa'afo'i atu se manuia i nai o tatou aiga lautele, e aofia ai i lenei taumafaiga, o tina ma pepe fou. O se tautua ua naunau i matou e fa'ataunu'u mo le tolu ai lenei o tausaga, ae o lea fo'i ua fa'atulaga ina ia taua'aoina i pepe uma e soifua i lenei tausaga,” o se tala lea a le tama'ita'i pule o le Pacific Independent Distributors, Christa Nancy Satele.

O le Pepe o le Tausaga fou 2019 o le tama na soifua ia Ianuari 1, 2019 ona matua o Sarai Vaoga ma Na'asona Moemoe o Utulei ma Tafuna. O le la'ua Ekalesia o le Word of Life i Tafuna, ma ua le mafai ona pu'ea se ata o lenei ali'i ma nai ona matua. Peita'i, ua tula'i nai matua talavou e la te talia ma le fiafia le meaalofa tele ua taua'aoina mo le pepe, Nashon Miracle Emmanuel Matiti Talimaiilagi Moemoe.

E to'afa sui o le Pacific Independent Distributors sa o'o ane ma le foa'i ina ia tauaaoina i matua ua la'ua mauaina le fa'ailoga o lenei tausaga ma tufatufaina fo'i ato fa'ameaalofa ua mae'a i ai i totonu pusa Huggies ma isi mea uma e fa'aaoga mo pepe fou. O i latou na masi'i ane ma meaalofa e 25 ato ua fa'atumu Huggies ma ona oloa eseese mo pepe fou e aofia ai le aufaigaluega ia Noel Mamea, Faiesea Salavea; Tulili Kelemete ma Christa Satele.

O sui o le Maota Gasegase i Fagaalu sa taliaina lea meaalofa tele e aofia ai le Peresetene o tama'ita'i Tausima'i i le LBJ Medical Center Tofiga Tufele Liamatua ma RN Vasati Agae, fa'atasi ai ma le ali'i foma'i Dr. Zutu Isana ma tama'ita'i tausima'i i le Potu mo Failele: RN Yunis B.Moran ma LPN Nelma Godinet-Sefo.

"A'o lenei fo'i meaalofa ia fa'amama avega atu i se popole ma le tigaina o feagai ai ma tina uma o lo'o tigaina i lona vaitau o le fanauina o pepe fou i le atunu'u, ma o se toe fa'afo'i atu lea o se manuia ua  faia e le Pacific Independent Distributors i tagata o Amerika Samoa i lenei tausaga,” o se fa’amatalaga lea a le Pacific Independent Distributors.

Ua fa'ailoa mai e ta'i 25 ato nei o meaalofa ua i ai i totonu e saunia ma fa'ao'o i le Nursery a le falema'i, peita'i afai ua matauina ua mana'omia nisi ato pe a tele atu pepe e soifua mai i masina ta'itasi nai lo le 25 lea, e mafai ona fa'ailoa atu ia i latou ma toe fa'ao'o mai a le suiga o lo'o mana'omia.

Fa'afetaia fo'i le agaga ua mafua ai lenei foa'i taua ma ua talia fo'i ma le fiafia e tina uma sa auai i le potu o talavai tau tina lea foa'i taua.

Mai Samoa tutoatasi ua lipotia mai ai e 15 pepe o le Tausaga Fou 2019.