Maua i totonu o se ta’avale i luga o le alatele ia se a’upega e le’i lesitalaina ma pulu fana

Pago Pago - AMERIKA SAMOA

O le taeao o le aso 31 o Me, 2024, na taofia ai e sui malu o le malo na galulue i le afioaga o Avau, ia se taavale na agai mai i le itu i Sisifo o le motu, ona o le le’i faia o se fusipa’u a le pasese.

Ina ua agai atu leoleo i le taavale, sa tu’uina mai ai e le aveta’avale sana laisene avetaavale mai Hawaii, ma lona suafa, o Dell Foster.

Sa nofo malamalama sui malu o le malo, ua mae’a ona lapata’iina le alii avetaavale i le aso 20 Me, e tusa ai ma le faafoeina o se taavale i totonu o Amerika Samoa, ma ia faia sona laisene aveta’avale lotoifale, ona e sili ma le 30 aso lea ua faamoemoe e iai i totonu o le teritori.

Ma na fautuaina loa le ua molia, o le a aveina e leoleo le taavale, ona e leai sana laisene avetaavale lotoifale.

E tusa ai ma fa’amaumauga a le malo, sa faatonuina le ua molia ina ia sau i fafo ma le taavale, liliu agai i le taavale ma tu’u ona lima i luga.  Sa faapea ona ave’ese e le ua molia ia sana ato sa tautau i lona tauau ma oso mai i fafo o le taavale.  Na fa’aauauina e leoleo a latou gaioiga i le sailia o ni a’upega i le tino o le ua molia ma tu’uina o ia i totonu o le taavale a leoleo.

Ae e le’i lokaina le ta’avale a le ua molia, na va’aia e sui malu o le malo ia le ato a le ua molia, o lo’o taatia i le nofoa pito i tua ma na fa’amaonia e le ua molia, lana ato lea ma o lo’o mana’o e ave atu.  Ae ina ua tago atu le leoleo e u’u mai le ato, na foliga mai o se fana sa i totonu.  Ma fesiligia ai loa le ua molia po o se fana, na tali mai le ua molia, ioe.

E tusa ai ma faamaumauga a le malo, na tatalaina e leoleo ia le ato ma maua ai se fana ua iai totonu ia pulufana faatasi ai ma nisi pulufana sa taatia i totonu o le ato.  Sa aveina e leoleo ia le fana, e leai se laisene.

Ae lokaina ma aveina le ua molia i le Ofisa a Leoleo i Tafuna.

Ua molia nei Foster i le moliaga e tasi, o le umia o aupega faasaina – o se vaega ‘A’ i solitulafono mama, e mafai ona nofosala ai i le falepuipui, i le le silia ma le tausaga e tasi (1), po o se sala tupe e o’o atu i le $1,000 po o faasalaga uma e lua.

E $300 le vaegatupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.