Maua fualaau faasaina i le ali’i na pu’e faapagota i le faaoolima

Pago Pago, AMERIKA SAMOA

O le ali’i e 30 tausaga le matua lea na pu’e faapagota e Leoleo i le masina na te’a nei, ona o tu’uaiga i lona faaoolima lea i se ali’i sa moe i se Fale Faatali pasi, atoa ai ma lona faafefe o isi tagata i luga o le alatele e aofia ai ma se ali’i Leoleo po, ua molia nei i lona umia faasolitulafono o fualaau faasaina, ina ua maua e Leoleo fualaau faasaina i totonu o le taga o lona ofu i le taimi na pu’e faapagota ai o ia.

Ina ua fesiligia e Leoleo le susuga a Teofilo Mapu e tusa ai o tu’uaiga faasaga ia te ia, na ia taua ai e faapea, na mafua ona ia faia nei gaioiga faasolitulafono, o le tiga o lona loto i le mea leaga sa faia e matua o lona to’alua ia te ia, o le ufiufi lea o le mafutaga faapouliuli a lona to’alua ma se tasi o ali’i o le nu’u, ae leai ma se isi na talanoa atu ia te ia ma lana fanau.

E pei ona taua e le malo i le latou tagi e faapea, o le po vaveao o le aso 20 o Iuni, 2021 i se vaega o Tafuna, na vili ai e ese ali’i Leoleo po i se tasi o Fale Teuoloa i Tafuna le Ofisa o Leoleo i Tafuna mo se fesoasoani, faasaga i se ali’i na alu atu ma lafo atu upu tau faamata’u ia te ia. E le gata i lea e pei ona taua e le Leoleo po i Leoleo, na faaoolima fo’i le ali’i talavou lea i se tagata sa moe i le Fale Faatali pasi o loo faafesaga’i ma le nofoaga o loo galue ai.

E to’atele Leoleo na tali atu i le valaau ma amata loa a latou sailiga mo le ali’i ua molia, peita’i e malama ane lava le taeao e lei maua e Leoleo le ua molia. 

Ina ua fesiligia e Leoleo po e tusa ai o lenei mataupu, na taua aie le Leoleo e faapea, e masani lelei lava i le ali’i ua molia, o le susuga lea ia Teofilo Mapu, o se ali’i e nofo i Ottoville. O le mae’a ai ona faia e Mapu o gaioiga tau faamata’u faasaga i le ali’i Leoleo po, na tamo’e atu ai loa o ia i le auala e aga’i atu i Fagaima ma faigata ai loa ona maua o ia e Leoleo.

Na taua e le Leoleo po i Leoleo Suesue e faapea, na faateia o ia pe tusa o le itula e 5:16 i le taeao o le aso e pei ona taua, ae ona vaaia se ali’i mitiafu mumu o loo tu atu i luma o le faitoto’a o le pa e ulufale atu ai i totonu o le lotoa o le Fale Teuoloa a le kamupani o loo galue ai i Tafuna. O gaioiga a Mapu atoa ai ma lana talanoa ma iloa ai e le Leoleo po, e ‘ona le ua molia.

Na lafo e Mapu upu tau faamata’u i le Leoleo po atoa ai ma lona lu’iina o ia la te fufusu. Na toe tago Mapu i le atigi fagupia sa uu i lona lima ma togi i totonu o le lotoa ma nuti ai i luga o le sima. Na taumafai le Leoleo po e tatala le faitoto’a ae sau i fafo i le ali’i ua molia peita’i na faliu le ua molia ma tamo’e ese mai le nofoaga lea. O le taimi lava fo’i lea na vili ai loa e Mapu Leoleo mo se feosoasoani.

A o le i tula’i mai le vevesi i le va o le Leoleo po ma Mapu, na taua e le Leoleo po lona vaaia o Mapu o loo talanoa ma se alii sa nofonofo i le Fale Faatali pasi o loo faasaga mai i le isi itu o le auala. Talu ai e fai sina pogisa o le taimi lea o le vaveao, na faigata ai i le Leoleo po ona ia iloa tonu gaioiga a Mapu sa faia i le ali’i sa nofonofo i le Fale Faatali pasi. 

Pau le molimau a le Leoleo po i Leoleo, sa i ai le taimi na ia vaaia ai le tu’i e Mapu o le tagata sa nofonofo i le Fale Faatali pasi, ae lei manino lelei lana vaai i isi gaioiga na tula’i mai.

A o pisi Leoleo e tau saili ni molimau e uiga i lenei mataupu, na vaaia ai e Leoleo se ulugali’i o loo faatali pasi i le magatolu e aga’i i Fagaima. O le ulugali’i, o ni tagata faigaluega i le kamupani i’a, o loo faatali le pasi e usu ai i le galuega. 

Na maua le avanoa e fesiligia ai e Leoleo le ulugalii pe na la vaaia se tagata miti afu mumu o tamo’e atu i le itu o le auala e aga’i i Fagaima. Na tali le ulugali’i, e i ai le alii mitiafu mumu na ia faamata’uina i laua i luga o le ala, ma ia ave faamalosi ai loa le tupe o le la pasese e $3.

Na taua e le ulugali’i e faapea, ao la tutu i luma o le Faleoloa e faatali le la pasi, na la vaaia se tagata o savali mai i luma o le NAPA. Na afe le tagata lea i le fale faatali pasi ma la vaaia ai ua talanoa la tagata lea ma le tamaloa o loo nofonofo ai i le fale faatali pasi. E le i umi ona talanoa ae vaaia loa e le ulugali’i ua tu’i e le ali’i mitiafu mumu le tagata sa nofonofo i le fale faatali pasi ma palasi. E lei umi se taimi ae vaaia loa le savali o le ali’i lea aga’i i le isi itu o le alatele ma talanoa ma le Leoleo, faatoa tamo’e atu ai loa i le auala e aga’i atu i Fagaima.

Ina ua taunuu atu le ali’i mitiafu mumu i le vaega na tutu ai le uluga’ii, sa ia fesili i le uluga’ii mo se sikaleti ma se tupe, ae na tali i ai le ulugali’i, toe lava o le $3 o le la pasese i le pasi mo le galuega. Na faamata’u e le ali’i mitiafu mumu le ulugali’i e avatu le tupe manu na te lei faia se mea leaga ia te i laua. O le fefefe o le ulugali’i na mafua ai loa ona la fetagofi ua ave le $3 i le ali’i mitiafu mumu. 

O le ali’i mitiafu mumu, o ia lea o Mapu, le alii ua moila i lenei mataupu.

Na aga’i mai Leoleo ma latou maua ai le ali’i sa nofonofo i le fale faatali pasi o loo manu’a ona foliga e aofia ai ma lona ulu. Na faanatinati ese atu le alii na manu’a i le Falema’i o le LBJ i Faga’alu mo togafitiga, ma taofia ai o ia i le aso e tasi, faatoa te’a mai ai i tua i le aso na sosoo ai, o le aso fo’i lea na maua ai le avanoa o Leoleo Suesue e fesiligia ai o ia e tusa ai o le faalavelave na tula’i mai.

Na taua e le ali’i na manu’a e faapea, o ia na moe i le fale faatali pasi ina ua ova lona ‘ona i le po ua tuana’i, ae na faateia o ia i se taimi o le vaveao ina ua fafagu e se tagata o ia i luga. Na ala i luga ma ia vaaia ai se ali’i o loo ia ofuina se mitiafu lanu mumu o loo tu i ona luga ma se fagupia o loo uu i lona lima. Na fesili le ali’i mitiafu mumu ia te ia pe i ai se sikaleti poo se tupe, ae na tali i ai, e le o i ai sana sikaleti poo se tupe.

Ao saofa’i i luga o le sima o le fale faatali pasi, na taua e le alii na aafia le faateia o ia ina ua tu’i e le alii fai mitiafu mumu lona gutu ma palasi atu ai i tua. Na toe tatao atu le isi tu’i malosi ma aafia ai le isi itu o lona auvae ma alu atu ai lona ulu ma tau i luga o le sima. Ao taatia le alii na aafia i luga o le sima, na ia lagona le ta kiki e le ali’i lea o lona tua ma lona manava.

Na matapogia mo sina taimi ona toe malamalama lea o lona vaai, ma ia iloa ai ua leai lana ato tupe sa i totonu o le taga o lona ofu o loo i ai pepa taua ma le tupe e $53.

Na fiu Leoleo e saili le susuga a Mapu ae ua le maua lava o ia. Ae i le tuana’i ai o vaiaso e lua talu ona tulai mai le faalavelave, na logo ai loa e le ali’i Leoleo po le Ofisa o Leoleo i Tafuna, e faatatau ia Mapu lea o loo ti’eti’e i tua o le keli o se pikiapu lanu moana o loo aga’i atu i luga o le auala i Tafuna.

Na tuliloa e Leoleo le pikiapu lanumoana ma latou taofia ai i luma o le Fale Taalo i Tafuna, le VA Stadium. E to’alua ali’i na tietie i tua o le keli o le pikiapu, o le tasi o i laua nei o le susuga a Apineru Mapu. Na pu’e faapagota e Leoleo ia Mapu ma auina atu loa i le Ofisa i Tafuna mo suesuega. 

Ina ua saili e Leoleo le tino o Mapu, na latou maua i ai ni paipa tioata e 2 o loo i ai vaega o le pauta faasaina o le aisa. Ina ua fesiligia e Leoleo ia Mapu e tusa ai o tu’uaiga faasaga ia te ia, na ia ioeina ai tu’uaiga uma faasaga ia te ia. Sa ia taua i Leoleo lona le fiafia i matua o lona to’alua, i le taumafai e ufiufi le mafutaga faalilolilo a lona to’alua ma se tamaloa o le nu’u.

O le masina na te’a nei na tula’i ai Mapu i luma o le Faamasinoga Faaitumalo. Ua molia o ia i le moliaga o le umia faasolitulafono o vaega o le pauta faasaina o le aisa; tasi le moliaga o le faaoolima i le tulaga lua; tasi le moliaga o le faomea i le tulaga lua; tasi le moliaga o le gaoi; o vaega uma ia o solitulafono mamafa, faapea ai ma moliaga mama e 4 faasaga ia te ia.

E $20,000 lea ua faatulaga e tatala ai i tua le ua molia.