Matagataga tapu a le Malo Tele i le auai o teritori a Amerika i le li’o o motu o le Pasefika (Pacific Islands Forum)

Pago Pago - AMERIKA SAMOA

I se fa’atagana mai i le malo o Amerika, sa mafai ona auai atu ai taitai o le teritori o lo’o i lalo o le latou va’ava’aiga i le Fonotele a ta’ita’i o malo o le Pasefika (Pacific Islands Forum-PIF), lea sa faataunuuina ia Iuni 3-5, 2024 ma na mafai ona auai atu ai le afioga i le Lutena Kovana, le tofa La’apui Talauega E.V. Ale ma nisi o ta’ita’i o le malo.

Ae i lea fa’atagana, o lo’o fa’aauau pea ona le auai teritori a Amerika, i palotaga ma faiga faaiuga, i totonu o le PIF.

I se tusi na fa’ao’oina atu e le Failautusi o le Malo Tele, o Antony Blinken, i le kovana o Guam ia Lou Leon Guerrero ma le kovana o le CNMI, ia Arnold Palacios, i le amataga o le vaiaso, sa fa’apea ona fa’alauiloa aloaia atu ai e le Malo Tele le taliaina o talosaga mai i ana teritori, mo le auai atu i le PIF.

O lo’o taumafai Guam, le atu Mariana faapea ma Amerika Samoa, ina ia le gata ina auai i nei fonotaga taua ae faapea foi le iai o so latou leo i mataupu o lo’o soalaupuleina i totonu o nei fonotaga.

E ui ina ua lagolagoina e le Malo Tele ia le auai atu o ona teritori i le PIF, ae peitai, o lo’o fa’aauau pea ona fautuaina e Blinken taitai o teritori, ina ia alo’ese mai i le faia o ni gaioiga e le o gatasi ma o latou tulaga faafaigamalo.

Sa toe faamanatuina mai e Blinken i kovana o teritori, e tusa ai ma le Faavae o le Iunaite Setete ma tulafono faafaigamalo, o le tiute a le malo feterale le taitaia o mataupu faavaomalo, i eria uma o lo’o i lalo o le pule’aga a le Iunaite Setete.  Ma o feutagaiga faavaomalo, e le o se tulaga e mafai ona faia tutoatasi e setete, teritori ma vaega uma e pulea e le Iunaite Setete.

Sa faapea foi ona toe faamanatu mai e Blinken i totonu o lana tusi i kovana o teritori i le Pasefika, ia tulafono faavaomalo talu mai le 2011, lea ua ave’esea mai i luga o le latou uepesite.

O le 1971 sa faavaeina ai le PIF ma o se faalapotopotoga autu lea i malo o le Pasefika, i le faavaeina o tulafono faavaomalo ma fefaatauaiga.  Ma ona o le fa’aauau pea ona avea ma se faalapotopotoga malosi i totonu o le vasa Pasefika, ua faapea ona a’afia i fetauaiga a malo tetele.

Sa faalua ona talimalo le faigamalo a Biden i taitai o le PIF i le vaitaimi o fonotetele a taitai o le Pasefika ma Amerika, lea sa faataunuuina i le Fale Pa’epa’e i le 2022 ma le 2023.

Afai ae taliaina e le PIF ia le talosaga a teritori mo le avea ma totino o lenei li’o, o le a faapea ona fa’atulagaina e le malo o Amerika ia gaioiga e mafai ona auai ai ona ta’ita’i, ona e le mafai ona o latou auai i feutagaiga o mataupu faavaomalo.

Na fa’aalia e Leon Guerrero lona agaga fa’afetai i le Malo Tele, mo le lagolagoina o le talosaga a Guam ma sa ia ta’ua le fa’aauau pea tasi le manulauti o nei fonotaga, e o gatasi ma mataupu o lo’o tula’i mai ma sa ia ta’ua le tatau ona galulue faatasi o motu o le Pasefika, e fofoina nei faafitauli o lo’o tutupu mai i totonu o atunuu ma motu eseese.

Sa ta’ua e le kovana a le CNMI, o Arnold Palacios, e ui ina e le o iai se leo o teritori i totonu o nei fonotaga i le taimi nei, ae peitai, o lo latou auai, o le a mafai ona fesoasoani i le u’una’ia mana’oga tutusa a motu o le Pasefika faapea ma le galulue faatasi.

I le taimi nei, e 18 motu o le Pasefika o lo’o aofia i totonu o le PIF, e aofia ai Ausetalia, le atu Kuki, Setete Aufaatasi a Micronesia, Fiti, Kiribati, Nauru, Niu Sila, Niue, Palau, Papua Niu Kini, le atu Malesala, Samoa, le atu Solomona, Tonga, Tuvalu ma Vanuatu.