Masalomia le tupu o le vevesi i Futiga ona ua poloka e se tagata le auala

Pago Pago - AMERIKA SAMOA

O le vaveao o le aso 9 o Aukuso, 2024, na vala’au mai ai se alii i le Ofisa a Leoleo i Tafuna, ma ripotia mai ai le susuga ia John Matagilele, i lona polokaina o le auala i Futiga faapea lona fealua’i solo ma palauvale leotele.

Na faapea ona agai atu leoleo i le nofoaga na tupu ai le faalavelave ma valais ai, i luge o le auala, i tafatafa tonu o le faleoloa o le US Mart, ia ni laina ma’a o faalava i le auala.

Sa faamatalaina e nisi na iai i le taimi na tupu ai le faalavelave, le faia o se inuga pia a Matagilele i tafatafa o le faleoloa, i le po atoa ae fa’ai’u i lona polokaina o le auala, e aunoa ma se mafua’aga.

Na taumafai leoleo e saili ia Matagilele i lena vaveao ae peitai, sa le’i maua le alii.

Ona sa talitonu leoleo, o lo’o tauaveina e le ua molia, ia se a’upega, o lea na fa’aauau ai pea ona leoleoina e sui malu o le malo ia lea vaega o le alatele.

Ma na fa’atonuina foi e leoleo se tasi o alii na iai i le nofoaga na tupu ai le faalavelave, ina ia fa’afeso’otai atu le Ofisa a Leoleo i Tafuna, pe a toe fo’i ifo ia Matagilele i le fale.

O le 4:16 i lea lava taeao, sa faapea ona valaauina ai e le aiga o Matagilele ia le ofisa a leoleo, ina ua toe taunu’u le ua molia.  Ma sa faapopoleina le aiga, ona o le utlaga o lona mafaufau, na iai i lena taimi.

Na faapea ona toe agai atu leoleo i le fale o le aiga a Matagilele ma ave faapagotaina ai loa o ia, ma aveina atu o ia i le ofisa a leoleo i Tafuna, mo le fa’aauauina o le latou suesuega.

Sa moliaina Matagilele i le Faatupu Vevesi i Nofoaga Faitele, o se vaega ‘B’ o solitulafono mama, e mafai ona nofosala ai i le 6 masina i le falepuipui, po o se sala tupe e $500; po o faasalaga uma e lua.

E $500 se vaegatupe na faatulagaina e mafai ona tatalaina ai le ua molia, e faatalitali ai ona faamasinoga.