Manumalo Fialupe Lutu i le fa’aiuga le tumau Palota Itumalo Sua #1

Ua fa’amaonia mai i le fa’aiuga le tumau o le faiga palota Fa’apitoa a le Itumalo o Sua #1, le manumalo o le sui tauva tama’ita’i ia Fialupe Felila Fiaui Lutu, i le aofa’i o le palota e 94 mai le aofaiga atoa o tagata palota e 357 o lo o i totonu o le lola palota a le itumalo.

Mai sui tauva e to’a 6 na tausinio i le nofoa o le itumalo, o le afioga a Tuifagalilo P. Vele na sosoo ai ana palota e 72; o Tuialofa Fa’alae Lauatuaa Tunupopo e 64 ana palota; Laloniu P. Maloa e 57 ana palota; o Uele Fale Uele e 50 ana palota; ma Ketesemane Meaole e 20 ana palota.

I le mae’a aloaia ai o le palota faapitoa sa alo atu i ai le itumalo i le aso 24 Oketopa, na tuuina mai ai loa e le Komesina o le Ofisa o Palota, afioga Uiagalelei Lealofi se tusitusiga mai lona Ofisa, e fa’ailoa aloaia mai ai le fa’aiuga le tumau a le itumalo.

Ina ia tusa ai ma tulafono tau palota, o le tuana’i ai o aso e 7 talu mai le aso na mae’a ai le faiga palota, o le aso Lua lea o le vaiaso fou, aso 31 Oketopa i le itula e 4:30 i le afiafi, e aloaia ai loa le fa’aiuga o le palota e pei ona tuuina mai.

O le faletua ia Fialupe, o lo o avea ma Failautusi o le maota o sui, ma ua silia i le 40 tausaga o lana auaunaga i le Fono Faitulafono a Amerika Samoa.

O se tulaga lelei mo ia le tofiga fou pe afai ae aloaia le fa’aiuga o le sailiga tofi a le itumalo, e le gata ua masani i le fa’atautaiga o galuega a le maota o sui, ae sili ai fo’i le tele o lona silafia i tulaga o tulafono e fa’afoe ai galuega fa’a faipule.

E pei ona silafia, o le nofoaga o le itumalo o Sua #1, na avanoa ina ua fa’amavae le susuga a Puleleiite Li’a Tufele Jr i nai masina ua mavae atu, ina ua filifilia o ia e le Kovana ia Lolo Matalasi Moliga e avea ma Pulesili o le Ofisa o Fesootaiga a Amerika Samoa (ASTCA).