Manu’a sui Aumaga a Faleniu i se a’upega maai i le taimi o le Leoleoga

Pago Pago, AMERIKA SAMOA - 

E toatasi se alii ua taofia i le Toese i Tafuna ma ua molia e le malo o Amerika Samoa, ina ua masalomia i lona fa'aaogaina o se tama'i naifi e faao'o ai ni manu'a tuga i se sui o le Aumaga o le afioaga a Faleniu. 

O le ali’i o Vaueli Moananu, lea ua molia i le moliaga o le faaoolima i le tulaga muamua, o le vaega A o solitulafono mamafa, lea e mafai ona faasala ai se tasi i le Toese mo le olaga atoa, po o le faa falepuipui i le va o le 10 ma le 30 tausaga.

E $25,000 le vaega tupe lea ua fa’atulaga e tatala ai i tua Moananu.

Afai ae tatala o ia i tua, e le mafai ona ia toe taumafai e faafesoota’i le alii na aafia i lenei mataupu po o nisi fo’i o lona aiga, a ia avea o ia ma tagatanu’u e tausisi i tulafono uma a le malo, ma ia fesootai vava lalata ma lana loia i taimi uma a o faagasolo ai taualumaga o lana mataupu.

O le vaiaso nei lea ua faamoemoe e faia ai le ulua’i iloiloga o lenei mataupu i luma o le afioga i le Faamasino ia Elvis P. Patea.

TAGI A LE MALO

E pei ona taua e le malo i le latou tagi, o le faalavelave lea na tula’i mai i Faleniu i le po o le aso 18 o Setema 2020  na mafua ai ona manu’a tigaina se sui o le Aumaga a Faleniu ma faanatinati atu loa i le falema’i, ae taofia ai i le Toese i Tafuna se isi fo’i tagata mai Faleniu lava.

O le po lea na maua ai e le Ofisa o Leoleo i Tafuna se telefoni mai se tasi o le afioaga o Faleniu, e talosagaina ai se fesoasoani ona o se sui o le Aumaga o lo o manu’a i se a’upega maai.

E to’atele Leoleo na tali atu i le valaau faapea ai ma sui o le EMS. Ina o aga’i atu ta’avale a Leoleo sa latou fetaui ma se taxi o lo o aumai ai le sui o le Aumaga na manu’a ma le faamoemoe e faafetaui le ta’avale a le EMS mo se fesoasoani.

I le taunuu atu o le ta’avale a Leoleo i Faleniu na taofi mai e nisi o sui o le Aumaga o loo tumu tumu i le Fale o le Aumaga ma o iina na vaaia ai e Leoleo le to’atele o sui o le Aumaga o loo latou liolioa se tagata o loo nofo i luga o le mutia.

Na iloa mulimuli ane e Leoleo, o le ali’i o loo saofa’i i lalo, o ia lea o Vaueli Moananu, le ali’i ua molia i lenei mataupu. Na vaaia e Leoleo le pisia o se vaega o le laei a Moananu, i le toto, atoa ai ma se fula i le itu agavale o lona alafau e foliga mai na osofa’i e se tagata.

O le mae’a ai ona faailoa ane e sui o le Aumaga i Leoleo o le faalavelave sa tula’i mai, na loka ai loa e Leoleo lima o Moananu ma taofia loa o ia i totonu o le ta’avale. Na manino fo’i Leoleo i faamatalaga na maua mai i sui o le Aumaga, e to’alua molimau na la vaai tino lava i le taimi o le fa’alavelave. O molimau fo’i ia na auina atu e Leoleo i le Ofisa i Tafuna mo suesuega atili e uiga i lenei mataupu.

A o le i fesiligia e Leoleo ia Moananu, na muamua siaki o ia e sui o le EMS ma fautuaina ai loa le tatau ona auina atu o Moananu i totonu o le Falema’i mo nisi togafitiga faaopoopo ia te ia, ona o le tulaga maualuga o lona toto i le taimi lea.

Na taua e le molimau muamua i Leoleo i lana fa’amatalaga tusitusia e faapea, o ia sa savali e aga’i i le fale faatoa uma a latou koleniga. A o savali aga’i atu i le fale, sa ia vaaia Moananu o savali mai ma se naifi e u'u i lona lima, ma ia vaaia le ta tui e Moananu o le sui o le Aumaga. Na ta'ua e lea molimau lona faanatinati atu i le vaega tonu o loo tauivi mai ai Moananu ma le sui o le Aumaga ma le faamoemoe e fesoasoani e aveese le naifi mai le lima o Moananu, peita’i na faateia o ia ina ua faliu mai Moananu ma taumafai e osofa’i o ia i le naifi, o le mafua’aga lea na ia tuua ai loa Moananu ma le sui o le Aumaga ae tamo’e saoasaoa i le latou fale ma ta’u i lona uso matua le faalavelave ua tupu.

O le taimi lava na maua ai e le uso matua le faamatalaga  e uiga i le faalavelave, na ia tula’i ma tamo’e i le vaega tonu o loo tula’i mai ai le fa’alavelave ma ia fesoasoani ai loa e aveese le naifi mai le lima o Moananu.

O le uso matua lea ua ta'ua o le molimau lona lua, ma sa ia faamatalaina i leoleo e faapea, a o le i tula’i mai lenei faalavelave, sa i ai o ia i le Fale Aumaga i le taimi na faatonu ai e le sui o le Aumaga ia Moananu e alu i le fale ua ta le Sa a le nu’u. Sa i ai se faafitauli laititi na tula’i mai i le va o Moananu ma le sui o le Aumaga lea ua manu'a.  Ae sa ta'ua e le molimau lona lua, sa ia faatoa tula'i ma alu i lona fale, ina ua aga'i atu Moananu i lona fale.

Ae na faateia o ia ina ua tamo’e atu lona uso laititi ma valaau atu mo se fesoasoani, o Moananu lea ua ia ta tui le sui o le Aumaga i le naifi. Na tia’i e le molimau mea uma lava sa faia ae tamo’e saoasaoa loa i le vaega o loo tula’i mai ai le faalavelave, ma ia vaaia ai Moananu o loo ia ta tui le sui o le Aumaga i le naifi.

E le i toe faatali le moilmau lona lua ae na ia alu atu loa ma tu’i Moananu ma mafai ai loa ona mamulu ese le naifi mai lona lima. O le taimi fo’i lea na faafesootai ai loa Leoleo mo se fesoasoani.

O le mae’a ai ona faia o siaki mo Moananu ona o le tulaga faaletonu i lona toto maualuga, na ia talosaga ai loa i Leoleo sa i ai i le Falema’i mo se avanoa e faia ai sana faamatalaga e tusa ai o le faalavelave e pei ona tula’i mai.

Na taua e Moananu e faapea, e fetaui lava le ta o le logo o le Sa mo tamaiti aoga i le itula e 9:00 i le po, ae o'o atu loa ma lana savaliga i luma tonu lava o le Fale o le Aumaga. Sa ia faalogo i se sui o le Aumaga (le alii na manu’a) o valaau atu ia te ia e alu i le fale ua ta le Sa, peita’i sa ia tali mai i ai e le o ia o se tamaititi aoga la'a alu ai fua i le fale. O le vavao lea ua ta e faapitoa mo tamaiti aoga.

Sa toe tali mai le alii lea ua manu'a ia Moananu ma faapea atu, pe tagata matua pe tamaitiiti aoga, ua tatau ona alu i le fale ona o lea ua ta le Sa a le nu’u.

Na ta'ua e Moananu lona le fiafia i lea faamatalaga, o le mafua’aga lea na la fetalia’i ai pea ma le alii na aafia seia o'o loa i lona faalogo mai ua fai le tala a le alii na manu’a i isi sui o le Aumaga, e aua le popole e faasala Moananu ma tuu i ai le avanoa na te totogiina ai se salatupe.

Na taua e Moananu i Leoleo le oso vave a’e i luga o lona ita ina ua ia faalogo i le faamatalaga a le sui lea o le Aumaga, ma ia toe manatua ai taimi ua te’a na ia totogiina ai fo’i le salatupe e $300 i le nu’u, e mafua mai i le ali’i lava lea.

O lona ita tele na alu atu ai loa i le fale ma faasasa’o i le vaega sa i ai le naifi ma aveese mai. Sa ia fai i lona to’alua e nofo faalelei i le fale ma tausi le la fanau.

Na savali sa’o mai lava Moananu i le vaega o loo nofonofo atu ai le sui o le Aumaga na aafia ma ia ta tuiina loa o ia i le naifi. Sa umi se taimi o la tauivi i le naifi seia oo lava ina mafai ona ia ta tui ina o ia.

Na taua atili e Moananu i Leoleo e faapea, a'o pisi e ta tui le sui o le Aumaga na valaau atu ia te ia, na faateia o ia ina ua pasasa le tu’i i ona autaliga ma mamulu ese ai loa le naifi mai lona lima.