Mana’omia le Loia Sili ma le Pule o Femalagaaiga luma Fa’amasinoga

Ua tuuina atu nei se poloaiga a le Fa’amasinoga Maualuga i le Loia Sili a le malo ma le Pule o le Ofisa o Femalagaaiga, ina ia la oo atu i luma o le Fa’amasinoga e tali i fesili e fa’atatau i le mafua’aga ua le maua ai le faila a se ali’i pagota mai Samoa.

O le aso 13 o Tesema lea ua fa’atulaga e le Fa’amasinoga e tatau ona tula’i ai Talauega Eleasalo Ale ma Peseta D. Fuimaono i luma o le fa’amasinoga.

O lea poloaiga na tuuina atu e le afioga i le ali’i Fa’amasino Sili Lagolago ia Elvis P. Patea i le aso Lua o le vaiaso nei, ina ua fiu le fa’amasinoga e fa’atali se ripoti mai le Ofisa o Femalagaaiga e tusa ai le aumau ai i Amerika Samoa o le susuga ia Molieletise Salu.

O le aso Lua o le vaiaso nei na fuafua e lau ai le fa’asalaga a le ali’i o Salu, ina ua ta’usala o ia i le moliaga o le umia faasolitulafono lea o vaega o le laau fa’asaina o le mariuana.

O le ali’i loia fautua ia Michael White na tula’i mo Salu, ae o le tama’ita’i loia sili lagolago ia Laura Garvey na tula’i mo le malo.

Ina ua valaau le mataupu a Salu, na vave ona fa’ailoa e Patea le tauaao lea e le fa’amasinoga o le ripoti sa saunia e le Ofisa Faanofovaavaaia. I totonu o lea ripoti, o lo o fa’ailoa mai ai e le Ofisa Faanofovaavaaia le leai o se ripoti na tuuina atu e le Ofisa o Femalagaaiga ina ua latou talosagaina le faila a Salu.

Na fa’ailoa e le Pulesili o le Ofisa o le Faanofovaavaaia sa i ai i totonu o le potu fa’amasino, susuga Malcolm Polu, ua mae’a ona tuuina atu le talosaga i le Ofisa o Femalagaaiga mo le faila a Salu, ae oo mai lava i le taimi na mae’a ai ona tapena le ripoti e lei toe maua mai lava se tali.

Na vaaia le le fiafia o le afioga a Patea ina ua fa’ailoa atu le tulaga e pei ona tula’i mai, ma ia faia ai loa le poloaiga e aami ai Talauega ma Peseta ina ia oo atu i luma o le Fa’amasinoga. Saunoa atili fo’i Patea e fa’apea, o le aso fo’i lea e iloilo ai e le Fa’amasinoga, pe alaga tatau ona fa’asala i laua i le le usitaia o le poloaiga a le fa’amasinoga sa tuuina atu, tau ala atu i le Ofisa Faanofovaavaaia.

E tusa ai o ni fa’amatalaga sa mafai ona tuuina atu i luma o le fa’amasinoga, o Salu, o se tagatanu’u o Samoa o loo ia umia le ituaiga ID o le ‘P1’. O le ituaiga ID lea e umia e se tasi mai fafo ua i ai sona piitaga i Amerika Samoa nei, peita’i ina ua saili ai faila a lenei ali’i, na manino mai ai, e le o i ai sona faila i le Ofisa o Femalagaaiga.

O loo fia malamalama le fa’amasinoga i le mafua’aga o le umia e Salu o le ituaiga ID lea o le P1, a o lea e le o i ai sona faila i fa’amaumauga a le fa’amasinoga.

TAGI A LE MALO

O le mataupu fa’asaga ia Salu na alia’e mai ina ua maua e se tagata faigaluega a le Aoga Maualuga i Fagaitua se tamaititi aoga o loo ula sana sikaleti mariuana i le lotoa a le aoga i le masina o Novema o le tausaga na te’a nei.

Na logo le ofisa o le aoga i lea mataupu, ma logo ai loa e le ofisa o le aoga le Ofisa o Leoleo.

Ina ua fesiligia e Leoleo le tamaititi aoga poo fea e aumai ai mariuana sa ia te ia, na tali le ali’i lea, na avatu i le tagata e igoa ia Ruben Finau. Ina ua fesiligia e Leoleo ia Finau, na ia taua ai e fa’apea, o mariuana sa ia maua mai i le tagata e igoa ia Salu.

Ina ua fesiligia e Leoleo ia Salu, sa ia taua ai, o mariuana sa avatu e le tagata e igoa ia Spunky ia te ia. Na taua atili e Salu e fa’apea, o nisi o mariuana sa ia fa’atau atu i isi tagata, ae o isi mariuana sa ia tufa fua i ana uo ma se tasi o tamaititi aoga.

O loo taofia pea Salu i le toese i Tafuna i le taimi nei e fa’atali ai le taimi e tula’i ai i luma o le fa’amasinoga i le aso 13 o Tesema mo le lauina o lana fa’asalaga.