Maliu se ali’i i Pago Pago ina ua taia e se Loli toso container

E 25 tausaga o se ali’i mai le afioaga i Pago Pago na maliu i le aoauli o le aso Faraile na te’a nei, ina ua taia o ia i se Loli toso container na aga’i mai le taulaga mo le fa’amoemoe e aga’i atu i le itu i Sasa’e o le motu.

Na fa’amaonia mai e le Ofisa o le EMS i le Samoa News lenei fa’alavelave i le aoauli o le aso Faraile na te’a nei, ina ua taunu’u atu i ai ona sui ma maua atu i ai se ali’i o lo o ta’atia i luga o le auala a le malo, fa’atasi ai ma ni manu’a tuga i lona ulu ma ona foliga.

“Na maitauina e sui o le EMS lenei ali’i o lo o ta’atia i luga o le auala, e le gata i manu’a tuga sa molimauina i ona foliga ma le itu o lona ulu, ae sa le mafai fo’i ona tali mai o ia ina ua taumafai e feso’ota’i atu i ai”, o se ripoti lea mai le vaega a le EMS.

Na fa’amaonia mai e se sui sinia o le falema’i a le LBJ i Fagaalu i le Samoa News le maliu o lenei ali’i i le taimi na taunu’u atu ai lona tino i le falema’i mo togafitiga.

E le i avanoa le afioga i le Komesina o Leoleo mo le tu’uina mai o se fa’amaoniga e uiga i lenei fa’alavelave, peita’i na fa’amaonia mai e se Leoleo Sinia e le i finagalo e fa’ailoa lona suafa, ona e le fa’atagaina o ia ona talanoa i Tusitala e uiga i mataupu fa’apenei, le mae’a lea ona fesiligia e Leoleo o ni isi o molimau sa i ai i le taimi o le fa’alavelave, mo le aoina mai o ni fa’amatalaga e uiga i le fa’alavelave sa tupu.

E pei ona taua e ni isi o molimau, o le fa’alavelave na tula’i mai i le taimi na aga’i mai ai le Loli toso container mai sisifo e aga’i atu i sasa’e, ae o latou fa’alogoina ai loa se pao leotele, ae ina ua pasi e se atu le Loli, sa vaaia ai le tino o se tagata o lo o ta’atia i luga o le alatele.

E talitonu le Samoa News, o se ata sa pu’eina e le masini pue’ata mai se tasi o Faleoloa e latalata ane i le vaega tonu na tula’i mai ai lenei fa’alavelave, ua fesoasoani tele lea i Leoleo ia latou su’esu’ega o lo o fa’agasolo e uiga i lenei mataupu, ma ua tau tatala mai ai le faalavelave sa tula’i mai, e foliga mai e le i silafia e le ave Loli le taimi na tula’i mai ai le fa’alavelave, ona o le pito i tua o le Loli na a’afia ai le ua molia i le taimi na tula’i mai ai le fa’alavelave.

E mai i lava i le aso Sa na te’a nei, e lei taofia lava e Leoleo le ave Loli sa ia fa’afoeina le ta’avale na mafua ai ona tula’i mai lenei fa’alavelave.