Lu’i e se alii ona ia se faifeau

Pago Pago - AMERIKA SAMOA

I le aso 3 o Novema, 2023, na lokaina ai se alii ina ua masalomia lona fa’atupu vevesi i totonu o se falesa ma taumafai e lu’i le faifeau.

Ua molia nei le susuga ia Etuini Taotofi i le Faatupu vevesi i nofoaga faitele, lea e mafai ona fa’asala ai i le falepuipui mo le ono (6) masina, po o se sala tupe e $500; po o faasalaga uma e lua.

Faatasi ai ma moliaga e lua i le Faao’olima i le tulaga e tolu (Vasega A & Vasega C).  I le vasega A, e mafai ona fa’asala ai Taotofi i le tasi tausaga i le falepuipui, po o se sala tupe e $1,000; po o fa’asalaga uma e lua.  I le vasega C, e mafai ona faasala ai Taotofi i le falepuipui mo le 15 aso, po o se sala tupe e $300; po o fa’asalaga uma e lua.

 E tusa ai ma fa’amaumauga a le malo, na vala’au e se tasi e suafa ia Mata Daupaki, ia le ofisa a leoleo i Tafuna i le aso 3 o Novema, 2023, e ripotia iai se alii fa’asuaava o lo o faapisa ma laulauvavale i luma o se falesa Tonga, i Vaitogi.

O lo o ta’ua foi i fa’amaumauga a le malo le lagonaina e le aufaigaluega a le ofisa a leoleo ia le pisa o Taotofi, a o talanoa ma Daupaki.

A’o agai atu leoleo i Vaitogi, sa mafai ona feiloai ma Daupaki i luga o le alatele i Vaitogi ma sa faamatalaina e Daupaki ia le fa’alavelave o lo o tupu.  Sa faasino atu foi e Daupaki ia se ta’avale o lo o paka i luma o le falesa EFKAS i Vaitogi, ma fa’ailoa atu i leoleo, o lo o nofonofo ai i totonu ia le ua molia.

Na iloa atu e leoleo le solomuli o le ta’avale, e foliga mai o le a agai atu i luga o le alatele, ma o latou fa’aolaina loa a latou sailini e taofi ai le ta’avale.  Ae na liliu le ta’avale i se auala galue, ma o iina na fa’aaoga ai e leoleo a latou masini fa’aleotele e fa’atonuina ai le aveta’avale, e taofi le ta’avale.

Ina ua savavali atu leoleo i le taavale, sa o latou va’aia se tamaitai o saofai i luma o le nofoa i tafatafa o le aveta’avale, ma sa fesiligia o ia, po o fea Taotofi.  Sa ta’ua e le tina lea, o lona alo ia Taotofi, ma o lo o nofo i le nofoa pito i tua.  Na faapea loa ona ave’ese mai e leoleo ia Taotofi mai i totonu o le ta’avale ma lokaina o ia, ma ave atu i totonu o a latou ta’avale leoleo.

E tusa ai ma le fa’amatalaga a le molimau, o Daupaki, o le alii o Taotofi o lona ‘nephew’ ma sa alu atu fa’asuaava i le gaioiga a le latou lotus a fai, ma amata ona faapisa ma laulauvavale ai.  Ma sa ta’ua e Daupaki, na taumafai le faifeau e ave’ese o ia mai i totonu o le falesa, ae peitai, na lu’i e Taotofi e la te fufusu.

Ma sa faapea ona fesoasoani atu seisi e suafa ia Tala, e vaovao le misa, ae tau ai le tu’i i lona fatafata, e tusa ai ma le fa’amatalaga a Daupaki.

Na faamatala foi e Daupaki, sa ia fesoasoani foi e tau vaovao le vevesiga a le ua molia ma le faifeau, ae fa’asaga mai Taotofi i le tau tu’i o ia, ma o iina na o mai ai loa le aiga o Taotofi ma ave’ese atu o ia.

Sa aveina e Daupaki ia leoleo i le mea o iai le susuga ia Tala po o Tala Latu, lea na a’afia i lenei fa’alavelave.

Ma sa fa’amatala e Latu, a’o fai le gaioiga a le latou ekalesia, na ia fa’alogoina se tasi o fa’aumu.  Ma ina ua ia savali mai i le pito i luma o le falesa, na ia va’aia ai o taumafai le ua molia e fasi le faifeau, o iina na ia ave’eseina atu ai le ua molia, ae tu’i ai o ia e le ua molia.

Ina ua aveina atu Taotofi i le ofisa a leoleo, sa musu e fai sana faamatalaga e uiga i le faalavelave na tupu.

Ua taofia nei o ia i le toese e fa’atalitali ai lona fa’amasinoga.

O lo o ua ta’ua foi i fa’amaumauga a le malo, o le po lava na tupu ai lenei fa’alavelave, na fa’atoese ai Latu i leoleo ma ia fa’ailoa atu i leoleo, lona fa’amagaloina o Taotofi i le tu’i ina o ia, ma e leai sana tagi e faia fa’asaga I le ua molia.