Lua mataupu ‘ese’ese – tolu teineiti a’afia i sauaga fa’afaiaiga ma le fa’amalosi i totonu o latou lava aiga

Pago Pago - AMERIKA SAMOA

E tusa ai ma fa’amaumauga a le faamasinoga, o le aoauli o le aso 6 o Me, 2025, na fa’afeso’ota’i ai e le sui Puleaoga a se aoga tulaga muamua, ia le Ofisa a Leoleo i Fagaitua, ma ripotia iai se le faia e se tama matua e 61 tausaga, ia ni uiga mataga i sona alo tamaititi talavou (teineititi #1).

Ae na avea lea ma tulaga na tatalaina ai le faitoto’a, i seisi foi teinetititi na a’afia foi i ia tulaga e tasi, ae ua molia ai lona tama mo’i.

[Ua le lomia e le Samoa News ia suafa o i latou na a’afia, aua le puipuiga o teineiti na a’afia, ona e talavou i la’ua.]

E 11 tausaga o le teineititi muamua, lea sa ia faamatalaina le faalavelave na tupu ia te ia, i lona faiaoga, ona faapea lea ona fa’ailoa atu e le faiaoga, ile pulea’oga.

Ina ua fa’atalanoaina e leoleo ia le tina o le teineititi 11 tausaga, sa faamatalaina e le tina, ia le vaavaaia e le na molia (tama matua) o lana fanau uma e to’alima, pe a o ma lona to’alua, e faigaluega.  Sa ta’ua foi e le tina ia le leai o sona iloa, o tupu se tulaga i le va o lana teineititi ma le na molia, aua e le i faamatalaina atu e lana tama, ia se tulaga na tupu.

Na ta’ua foi e le tina o le teineititi 11 tausaga, lona le fiafia tele i lona alo na a’afia, ona ua alu faamatala lenei mea sa tupu, i lona faiaoga ma leoleo, ae le faamatalaina atu ia te ia.

Ina ua mae’a ona fa’atalanoaina e leoleo ia le tina o le teineititi sa a’afia, na faapea ona o latou fa’ailoa atu i le tama fai a le teineititi (le na molia) e tusa ai ma le su’esu’ega o lo’o faia, ona o tu’ua’iga mai lona afafine fai.

Ae e tusa ai ma le faamatalaga a le na molia, sa ia fa’ailoa atu i leoleo, e leai se tulaga na tupu i le teineititi, ae e tatau ona o leoleo, e su’esu’e le fa’alavelave na tupu i le ‘niece’ a lona to’alua, lea sa masani ona nofo i le latou fale ia Aperila 2025.

Na ta’ua e le na molia, o le ‘niece’ a lona to’alua, sa faia iai e lona tama moni ia ni uiga mataga.  Ma sa faataunuuina ‘ese’ese ia su’esu’ega i lea tu’ua’iga.

Sa fa’afeso’ota’iina e leoleo ia le vaega e gafa ma le puipuiga o fanau iti (CPS), e tusa ai ma mataupu o lo’o faia iai a latou su’esu’ega.  Na tu’uina atu le teineititi 11 tausaga i a’ao a le vaega a le CPS, aua lona puipuiga.

Ae na te’ena e le tama matua ia tu’ua’iga sa faia e le teineititi 11 tausaga ma sa ia ta’ua foi ia lona le manatua, o se taimi, na ia tu’uina atu ai i le teineititi 11 tausaga, ia se tupe, ina ua alu atu i lona fale e aumai le telefoni a lona atalii, sa fafaga le ma’a, i lona fale.

Sa te’ena foi e le na molia, ia lona faia o se faamatalaga tusitusia ma na tu’umuli ese atu o ia, ina ua mae’a le latou talatalanoaga ma leoleo.

Ae i sesisi mataupu, sa faapea ona sailiili ai e leoleo ia tu’ua’iga na faia e le na molia, e faatatau i le ‘niece’ a lona toalua ma lona tama moni.  E 15 tausaga o le matua, o le teineititi lona lua.

Sa fa’amaonia e leoleo, le nonofo faatasi o le ‘niece’ a le fafine ma lona tama ma le to’alua a lona tama, i se vaega o Aperila 2025.  Ma sa tu’ua e le teineititi le latou aiga, ona o faalavelave na tupu i le va o ia ma lona tama (lea na molia).

Faatasi ai ma lea fa’amatalaga, sa aveina ai loa e leoleo su’esu’e, ia le teineititi lona lua, i le latou ofisa ma na vala’auina foi ia le vaega a le CPS, lea na o latou ave’eseina atu le teineititi lona lua, i lalo o le latou puipuiga.

O le aoauli o Me 7, 2025, sa faatalanoaina ai e leoleo ia le teineititi lona lua, i le Ofisa a Leoleo i Tafuna.

Ma e tusa ai ma le ripoti a le teineititi lona lua, o le uluai vaiaso o Ianuari 2025, sa faapea ona tago atu ai lona tama ia te ia, a’o latou momoe ma lona tuagane e 16 tausaga faapea ma se tausoga tamaitai e 15 tausaga (lea foi na a’afia i tulaga o le faia o amioga mataga).

Ma na taofia le gaioiga a le na molia, ina ua fa’alogoina le alu atu o lona uso, mai i le potu.

Sa ta’ua foi e le teineititi lona lua, sa ia faamatalaina le faalavelave na tupu, i lona ‘uncle’, ma sa fesiligia e lona ‘uncle’ ia lona uso (le na molia) ae sa tagi le na molia ma ‘ai’oi i se faamagaloga, ma ia ta’ua, e le toe tupu lea tulaga.

Ae peitai, i le aso 24 o Aperila 2025, na toe tupu ai foi seisi faalavelave, i le va o le teineititi lona lua ma lona tama.  Ma o le aso na soso’o ai, sa faamatalaina ai e le teineititi, i lona ‘aunty’ (o le tina lea o le teineititi muamua), ia le tulaga na faia e lona tama ia te ia.

I le faatalanoaga o le teineititi lona lua, sa ia faamatalaina ai le fai atu o lona tausoga ia te ia (teineititi lona lua), ia le faia foi e le alii lona lua, ia uiga mataga ia te ia (tausoga).  Sa fa’ailoa atu e le teineititi lona lua, ia le teintititi lona tolu, na a’afia, lea e latou te nonofo faatasi.

O le aoauli o Me 9, 2025, sa fa’atalanoaina ai e leoleo ia le alii lona lua, lea na molia.  Ma sa ia fa’amaonia, i leoleo, ia lona fa’amalosia ma faia o ni uiga mataga i lona afafine, faapea ai ma le teineititi lona tolu.  E le’i lokaina le alii lona lua, i le taimi na mae’a ai le faatalanoaina o ia.

Faatasi ai ma faamatalaga mai i le teineititi lona lua, sa faapea loa ona agai atu leoleo, e saili mai le teineititi lona tolu, na a’afia i lenei mataupu.  Ma sa faapea foi ona tu’uina atu le teineititi lona tolu, i lalo o le puipuiga a le CPS.

E le’i ta’ua i fa’amaumauga a le malo, pe sa lokaina i la’ua na molia.

O le tama matua na molia, e 61 tausaga le matua, ae o le alii lona lua, e 49 tausaga le matua.

I su’esu’ega a leoleo sa faataunu’uina, na fa’amaonia ai le nonofo faatasi o le teineititi muamua ma lona tina ma lona tama fai, ae tuaoi ma le tama matua na molia, o le ‘step-grandfather’.

E tusa ai ma le faamatalaga a le teineititi muamua, i leoleo, na ia manatua le tupu fa’atolu o le faalavelave i le va o ia ma lona ‘step-grandfather’, i le fale a lona ‘step-grandfather’, lea na molia.

O le taimi muamua na tupu ai le faalavelave, o le tausaga e 2023, a’o i le vasega 3 le teineititi na a’afia.  O le fa’alavelave lona lua na tupu i le tausaga na soso’o ai (2024), ina o vasega 4 le teineititi na a’afia.  Ma le fa’alavelave na tupu ia Me 4, 2025, i le afiafi o le aso Sa, ina ua alu i le fale a lona ‘step-grandfather’, e faanoi mai se masima.

Sa ta’ua e le teineititi na a’afia, sa ia fai atu i lona ‘step-grandfather’, na alu atu e aumai se masima, ae tago mai le toeaina ma toso atu lona lima ma ta’ita’i o ia i le umukuka ma tu’u atu ia te ia se tupe ($1), ma ona faia ni uiga mataga i le teineititi.

Na ta’ua e le teineititi, ia lona tago ma toso ‘ese ia lima o le na molia, ma ia tamo’e i fafo ma le fale.

Ma sa ta’ua e le teineititi, ia lona faamatalaina i lona tina, ia le tupu faalua o lenei fa’afitauli, ae peitai, e le’i talitonu lona tina ia te ia.  Ae ina ua tupu faatolu loa, sa tago loa le teineititi i le faamatala i sana uo mai i le aoga.  

O moliaga a le ‘step-grandfather’, na aofia ai Faitauga 1 & 3 i le Faia o Sauaga Mataga, i lona tulaga muamua – o se vaega ‘D’ i solitulafono mamafa, e mafai ona nofosala ai i le falepuipui, e le silia ma le lima tausaga, po o se sala tupe, e le silia ma le $5,000; po o faasalaga uma e lua.

Atoa ai ma moliaga e 2 & 4 – o le faia o se tulaga e a’afia ai le saogalemu o fanau iti – o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

E $5,000 se vaegatupe na fa’atulagaina, e mafai ona tatalaina ai le na molia, mai i le falepuipui, e faatalitali ai lona faamasinoga.

O moliaga a le tamaloa lona lua, na aofia ai ia Faitauga 1, 5, 8 & 13: Faiga faa Sotoma – o se vaega ‘B’ i solitulafono mamafa, e mafai ona nofosala ai i le falepuipui, e le silia ma le 15 tausaga.

Faitauga 2, 6 & 9:  Faiaiga ma tagata o le aiga (toto) – o se vaega ‘D’ i solitulafono mamafa, e mafai ona nofosala ai i le falepuipui, e le silia ma le lima tausaga; po o se sala tupe, e le silia ma le $5,000; po o faasalaga uma e lua.

Faitauga 3, 7, 10 & 12 – Faia o ni tulaga e a’afia ai le saogalemu o fanau – o se vaega ‘A’ i solitulafono mama, e mafai ona nofosala ai i le falepuipui, e le silia ma le tasi tausaga, po o se sala tupe, e le silia ma le $1,000 po o faasalaga uma e lua.

Faitauga 4 – Faamalosi tamaitai – o se vaega ‘B’ i solitulafono mamafa, e mafai ona nofosala ai i le falepuipui, e le silia ma le 15 tausaga.

Faitauga 11 – Faia o sauaga faiaiga i lona tulaga muamua – o se vaega ‘D’ i solitulafono mamafa, e mafai ona nofosala ai i le falepuipui e le silia ma le lima tausaga, po o se sala tupe e le silia ma le $5,000; po o faasalaga uma e lua.

E leai se tupe na fa’atulagaina, e tatalaina ai le na molia.