Lokaina se tina i le maliu o se tamaititi 4 tausaga, i se fa’alavelave tau taavale

Pago Pago - AMERIKA SAMOA

Ua molia nei se tina e 39 tausaga mai i le afioaga o Mapusaga Fou, ona o se fa’alavelave tau ta’avale na tula’i mai i le aso 19 o Fepuari, 2024, lea na maliu ai se tamaititi e 4 tausaga.

O le moliaga o lenei tina, e aofia ai se Faitauga e tasi, o le fa’ao’o o le maliu i se tagata, e ala i se ta’avale, i le vasega ‘D’ o solitulafono mamafa, lea e mafai ona fa’asala ai se tasi i le o’o atu i le lima (5) tausaga, po o se sala tupe e o’o atu i le $5,000, po o fa’asalaga uma e lua.

E $5,000 le tinoitupe faatulagaina e mafai ona tatalaina ai le ua molia, mai i le falepuipui, e fa’atali ai lona faamasinoga.

(O le a le lomia suafa o i latou ua a’afia i lenei fa’alavelave, ona o le puipuiga o fanau o lo’o a’afia).

E tusa ai ma fa’amaumauga a le malo i lenei mataupu, o le afiafi o le aso 19 o Fepuari, na maua ai se valaau a le Ofisa a Leoleo i Tafuna, mo se fesoasoani, ina ua so’aina e se ta’avale ia se tamaititi i luma o le faleoloa a le TMJ, ma aveina atu ai i le falemai.   

Ae peitai, e taunu’u atu si nei alo i le falema’i, ua maliu o ia.

Na aga’i atu leoleo i le falema’i i Faga’alu (LBJ) mo le su’esu’eina o lenei mataupu.

E tusa ai ma lipoti a foma’i, na maliu lenei alo ona o se manu’a i lona ulu, lea sa tau i le pito i luma o le ta’avale.

O lo’o ta’ua i fa’amaumauga a le malo e faapea, ina ua fa’atalanoaina e leoleo ia le tua’a o le atalii lea ua maliu, i lea lava afiafi, sa ia faamatalaina e faapea, sa fai se latou taga lavalava ma nai ona alo e to’alua i le fale ta lavalava a le TMJ.  Ma na o la kolosia le auala ma si ona atalii ua maliu, ma nofonofo i luma o se fale na fai muamua ai se fale’aiga, ae na fa’afuase’i ona toe tamo’e lona atalii aga’i i le fale ta lavalava.

Sa ta’ua e lenei tama, lona va’aia o se pikiapu lanu uliuli, o masau atu aga’i i luga, ma sa ia taumafai e tamo’e atu e lavea’i mai lona atalii, ae ua tuai.

Sa faamatala foi e lenei tama e faapea, na oso mai i fafo ia le aveta’avale (le ua molia) ae sa iai pea i totonu o le ta’avale ia lona to’alua.

Ma o lo’o ta’ua foi i fa’amaumauga a le malo, ia le taumafai o le aveta’avale e fesoasoani ina ia fa’asaoina le ola o le atalii ua maliu.

Sa aveina le ua molia i le Ofisa Tutotonu a Leoleo ma e tusa ai ma lona fa’atalanoaina, sa ia ta’ua lo latou aga’i atu i lo latou fale i Mapusaga Fou ma lona to’alua ma si a la fanau, ma ina ua latalata atu i le faleoloa a le TMJ i Pavaiai, sa ia tu e faatali le solomuli mai o se ta’avale mai i le faleoloa.

Ma sa ia ta’ua foi e faapea, ina ua amata ona ia fa’aoso lana taavale, na fa’afuase’i ona ia va’aia le tamaititi 4 tausaga i luma o lana taavale, ma sa na’o lona ulu na ia iloa atu.  O le taimi lena na alaga ai lona to’alua ‘Auoi’, ae ua tuai ona taofi lana ta’avale.

Sa faamatala foi e le ua molia, ina ua tupu le fa’alavelave, sa ia oso i fafo ma lana ta’avale ma alu atu e fesoasoani, ae ua si’i e le tua’a o le tamaititi, ia lona atalii i tafatafa o le alatele.

Sa ta’ua foi e le ua molia, lona ta’uina atu i matua o le atalii ua maliu, e na te le i va’ai i le tamo’e atu o le la tamaititi i luma o lana ta’avale.

O se ta’avale a ni alii se to’alua na iai i le taimi o le fa’alavelave, na faatopetope atu ai lenei tamaititi i le falemai.

Ae o lo’o ta’ua foi i faamaumauga a leoleo, o le aveta’avale a le pikiapu uliuli sa valaauina le 911 mo se ta’avale falema’i, e fa’afetaui le ta’avale o lo’o aveina atu ai le tamaititi.  Ma na ia faamatalaina foi e faapea, na o latou afe i luma o maketi tafa ala i Malaeimi e toe fai CPR i le tamaititi, ma toe fa’aauau atu i le falemai, ae e le’i o’o atu lava ta’avale a le falemai.

I le mae’a ai ona fa’atalanoaina le ua molia, sa ia faia ai sana molimau tusitusia ma ia malaga ai i lona aiga i lea aso.

Ae peitai, i su’esu’ega mulimuli ane a le ofisa a leoleo, lea sa maua mai ai ata vitio mai i le faleoloa a le TMJ, o lo’o ta’ua ai i faamaumauga a le malo e faapea, na fa’aalia i ia ata vitio le le’i tu o le ta’avale a le ua molia, ae se’i pasi pe solomuli se ta’avale, e pei ona ia ta’ua i lana molimau.

E le gata i lea, o lo’o fa’aalia i ata vitio, le agai sa’o o le ta’avale na tupu ai le fa’alavelave, e aunoa ma le alu lemu pe tu mo seisi taavale.