Lokaina se tamaitai ma molia i le fa’ao’olima i lana uo tama

Pago Pago - AMERIKA SAMOA

O lo o ua nei i a’ao o leoleo ia se tamaitai e suafa ia Hilda Luki, o lo o ua molia i le faatupu faalavelave i nofoaga faitele faapea ma le fa’ao’olima, ona o se faalavelave na tulai mai i le taeao o le aso 4 o Ianuari, 2024.

E tusa ai ma faamaumauga a leoleo, o lo o ta’ua ai le valaauina e se alii leoleo ia lo latou ofisa i Tafuna mo se fesoasoani ona o se tamaitai o lo o masalomia i lona fa’ao’olima i lana uo tama i tafatafa o le alatele, i luma o le faleoloa a le Family Mart i Nu’uuli.Ina ua 

Ina ua taunu’u leoleo i le nofoaga na tupu ai le faalavelave, na va’aia e leoleo ia le leoleo lea valaau atu i lo latou ofisa, faatasi ma seisi o le aiga a le tamaitai ua molia i lenei faalavelave, o lo o tau taofiofi mai ia Luki.  Sa aveina e leoleo ia Luki ma lana uo i le ofisa leoleo mo le fa’aauauina o a latou su’esu’ega.

Ua ta’ua i faamaumauga a leoleo e faapea, a’o agai atu le alii leoleo lea na lipotia lenei faalavelave, i le galuega i lea taeao, sa ia va’aia ia kolaina mai e Luki o le ofu a lana uo tama ma fa’aauau ona po lea alii i ona foliga ma lona tino.  Ae o le taimi lea, o lo o solimuli lava le uo tama a Luki, ae o lo o fa’aauau pea ona fasi mai o ia e Luki.

Na faapea loa ona afe i tua le taavale a le alii leoleo ma savali atu agai atu ia i laua nei, ae ina ua latalata atu le alii leoleo, sa ia lagonaina le faafefeina faatolu e Luki o lana uo tama, i le fasiotia o ia.  O lea na valaau ai loa lea alii leoleo i le ofisa a leoleo, mo se fesoasoani.

Na faamatala e le tuafafine a le uo tama a Luki e faapea, a’o ia aga’i atu i lana galuega i lea taeao, sa ia vaaia ia Luki le fasiga e Luki o lona tuagane, ma sa kolosi e lona tuagane le auala ae peitai, sa mulimuli atu iai Luki ma u’u mai le ofu a lona tuagane ma fa’aauau ona tatu’i lona tuagane.

Sa ta’ua e le tuafafine le u’una’i ese e lona tuagane o Luki ae peitai, sa palauvale Luki i lona tuagane ma faapea atu, o le a ia fasia o ia.

O lo o ta’ua foi i faamaumauga a leoleo se faamatalaga  a le alii o lo o a’afia i lenei mataupu, e faapea, sa faatopetope atu i le faleoloa ona o lo o timu, ae peitai, na ita lana uo teine, le tamaitai o Luki, ona o lona (le uo tama) le tautala atu ia te ia (Luki), ma o le mea lea na mulimuli atu ai Luki i lana uo tama, ma faatali i fafo o le faleoloa.  Ina ua toe foi mai fafo le uo tama a Luki mai totonu o le faleoloa, ae o lo o faatali atu i fafo ia Luki.

Sa ta’ua e le uo tama a Luki le po ina o ona foliga ma tua o lona ulu, ma sa le amana’ia e le alii lea ia gaioiga a Luki o lo o fai, ae peitai, na mulimuli atu Luki ia te ia ma fa’aauau pea ona po o ia.  Sa ta’ua foi e lenei alii lona taumafai e u’una’i ese atu ia Luki ma kolosi le alatele, ae peitai, sa mulimuli atu lava Luki ia te ia ma toso atu lona ofu ma po ona mata.

O sina taimi mulimuli ane, na feosofi atu ai loa le tuafafine o lenei alii faapea ma se alii leleo ma taofi ia Luki mai i lona faaoolima i lana uo tama.  Ae o le taimi lea ua amata ona vaovao gata ia le tamaitai o Luki ma palauvale.

Sa faamatala e le uo tama a Luki e faapea, e le o se taimi muamua lea ua faia ai e lenei tamaitai ia nei tulaga ia te ia, ma e tupu so’o le alu atu o Luki i lona fale ma faamisa atu ia te ia.

Na faamaonia e Luki ia lona faaoolima i lana uo tama ae sa ia ta’ua foi le po ina e lana uo tama, o tua o lona ulu.

Sa lokaina loa Luki ma molia i moliaga o le Faaoolima i Nofoaga Faitele lea e mafai ona nofosala ai se tasi i le falepuipui, i le o’o atu i le ono (6) masina, po o se sala tupe e $500; po o fa’asalaga uma e lua.  Faapea ma le moliaga o le Fa’ao’olima i lona tulaga e tolu, lea e mafai ona faafalepuipui ai se tasi i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

E $300 le tupe faatulagaina e mafai ona tatalaina ai i tua le ua molia, mai i le falepuipui, e fa’atali ai lona fa’amasinoga.