Lokaina ma tu’ua’ia se alii i le fa’asuaava ma lona taumafai e titina lana uo teine ma’itaga

Pago Pago - AMERIKA SAMOA

O le aoauli o le aso 18 o Oketopa, na o’o atu ai se tina ma’itaga i le Ofisa a Leoleo i Fagatogo, e ripotia lana uo tama, i le fa’ao’olima ia te ia, i luma o sona alo e tasi le tausaga.

[Ua le lomia suafa o i latou na a’afia ma molia i lenei faalavelave ona o le puipuiga o fanau iti faapea le tina na a’afia.]

E tusa ai ma faamaumauga a le malo, e o’o atu lenei tina i le ofisa a leoleo, sa mafai ona molimauina e leoleo ia ni ma’osia i le ua o le tina.  Ma na faamatalaina e le tina ia le sauaina o ia e le ua molia, i totonu o le la fale i Fagatogo, a’o tu lona alo e tasi le tausaga, i ona autafa.

Sa faamatalaina e le tina na a’afia, sa fo’i atu lana uo tama i le latou fale i le po o le aso 17 o Oketopa, ua fa’asuaava.  Ae o le taimi lea ua amata ona tapena ai o la moega ma si ona alo laititi, ae ulufale atu le ua molia i totonu o le potu ma taoto atu i o la autafa.

Ae na ta’ua e le tina lo la tu tu i luga ma lona alo, ona o le malosi o le manogi pia o le ua molia, ae le gata i lea, ua le fiafia le tina ona sa folafola atu le ua molia, e le toe tago i se pia.

Na faamatala e le tina lona taumafai e savali i fafo o le potu, ae tago mai le ua molia i le opo atu o ia mai tua ma o’omi lona manava ma u’una’i o ia i lalo.

Ma sa taumafai le tina e tu mai i lalo, ae toe ‘a’apa atu le ua molia ma toe togi o ia i lalo.

Ona tu lea o le ua molia i ona luga ma taumafai e titina lona ua ma toeititi a matapogia ai.  Ae o le taimi atoa lava na tupu ai le faalavelave, o lo’o tu lava lona alo e tasi le tausaga, i ona autafa, ma ‘e’e.  

I se talitonuga a le tina, ana leai le ‘e’e o si ona alo ma le pa’o o le sauaina o ia, i lea aso, semanu e uma ai iina lona ola.  Aua na mafai ona tamomo’e atu ai le uso matua a le ua molia ma lona tuafafine, ma toso ese mai le ua molia.

Na fa’ailoa atu e le tina na a’afia, i leoleo, lona fefe tele ona o lenei mea ua tupu aua o se taimi muamua lea ua o’o ai le sauaina o ia e lana uo tama, i lea tulaga.

O le po lava lea na aveina atu ai le tina ma’itaga i le falema’i, e le tuafafine matua a le ua molia, mo le siakiina o ia.

Ina ua mae’a ona fa’atalanoaina e leoleo ia le tina na a’afia, sa faapea loa ona agai atu leoleo ma lokaina mai le ua molia ma ina ua faatalanoaina o ia e leoleo, sa ia fa’amaonia lona taumafai e titina le ua o lana uo teine, ae o le taimi lena o lo’o fa’asuaava ai.

O moliaga a le na molia, e aofia ai le Faatupu Vevesi i totonu o lona aiga (sauaga i totonu o le aiga), o se vaega ‘C’ o solitulafono mama, e mafai ona nofosala ai i le o’o atu i aso e sefululima, po o se sala tupe i le va o le $150 ma le $300; po o faasalaga uma e lua.

Faitauga e 2:  Fa’ao’olima i lona tulaga e tolu (sauaga i totonu o le aiga), o se vaega ‘A’ o solitulafono mama, e mafai ona nofosala ai i le falepuipui i le tausaga atoa, po o se sala tupe e $1,000; po o faasalaga uma e lua.

E $50,000 na fa’atulagaina e mafai ona tatalaina ai le ua molia, e faatalitali ai lona faamasinoga.