Loka se tamaloa na sauaina lona atalii ona o se $20

Pago Pago - AMERIKA SAMOA

O le taeao o le aso 30 o Ianuari, 2025, na fa’afeso’ota’i ai e se faufautua a se aoga tulaga muamua ia le Ofisa a Leoleo i Tafuna, ona o se tamaititi a’oga e 10 tausaga, na usu atu i le aoga i lena taeao ma ni manu’a i ona foliga.

Ma ina ua su’esu’eina le tino atoa o le tamaititi a’oga, sa molimauina le iai o ni manu’a i luga o lona tino atoa.

E taunu’u atu leoleo i le a’oga na tupu ai le faalavelave, ae ua mae’a ona taunu’u ia le vaega a le EMS ma o lo’o latou togafitia mai le tamaititi na a’afia.

Ina ua feiloai leoleo ma le tamaititi na a’afia, i totonu o le potu na iai ma lona tina, sa molimauina e leoleo le le gata ina mumu, ae na fula le itu taumatau o foliga a le tamaititi a’oga.

Sa faamatalaina e le faiaoga na ripotia le tulaga o le tamaititi aoga i le ofisa, ina ua amataina le vaega, sa ia va’aia le nofo o le tamatiti i lona nofoa ae tu’u lona ulu i luga o lana kesi.  Ma na ta’ua e le faiaoga, lona alu atu ma fesiligia le tamaititi po o iai se mea o tupu, ae na tali mai seisi tamaititi o le vasega, o lo’o manu’a lona tino.  Ma sa faamatalaina e le tamaititi na a’afia, i lona faiaoga, le sasaina o ia e lona tama.

 Na ta’ua e le faiaoga lona va’aia o le fula ma le mumu o foliga a le tamaititi na a’afia ma ia aveina ai loa le tamaititi i le ofisa, lea na fa’afeso’ota’i ai loa e le faufautua a le a’oga ia le ofisa a leoleo.

Sa faapea ona aveina fa’atasi atu le tamaititi na a’afia ma lona tina matua i le ofisa a leoleo mo le fa’aauauina o su’esu’ega a leoleo.  Ae na aveina atu matua o le tamaititi i leisi taavale a leoleo.

Ina ua fa’amaumauina e leoleo ia manu’a a le tamaititi, na aofia ai manu’a i lona lima taumatau, o lona papatua ma le itu taumatau o ona foliga.  Ma ona o le ogaoga o ona manu’a i lona lima taumatau, sa le mafai ai e le tamaititi na a’afia ona tusia lana molimau, o le mea lea na sa tusia ai e se leoleo, i luma o lona tina matua.

I le faamatalaga a le tamaititi na a’afia, na fo’i atu i le fale, ina ua tu’ua le a’oga ma sa faatonuina o ia e lona tama e fai ana feau, lea na aofia ai le fufuluina o ipu, faamamaina o le fale ma le kukaina o le alaisa, ae e le’i alu e moe.

Na ta’ua e le tamaititi na a’afia le fafaguina o ia e lona tama, e sau e ‘ai ma ina ua uma le latou mea’ai, na ia toe fo’i e moe.  Ae na ia lagona le talanoaga a ona matua i luga o le telefoni ma le fesiligia e lona tama ia lona tina, e uiga i se tupe e $20 lea ua ave’esea mai i totonu o lana ato tupe.

Sa ta’ua e le tamaititi lona lagonaina o le leo ita a lona tama, ma e le’i umi ae alu atu lona tama i totonu o lona potu ma sasa ai o ia, lea na aofia ai ma le tatu’i ina o lona tino ma ona foliga e lona tama.

Na fa’aalia e le tamaititi na a’afia i leoleo, e le o se taimi muamua lenei ua fasi ai o ia e lona tama.  O isi taimi, e sasa ai o ia i fusipa’u, o se’evae po o la’au piliati (cue stick) ma e iloa e lona tina le sauaina o ia, ae na te le taofia lona tama.

Ina ua fa’atalanoaina e leoleo ia le tua’a a le tamaititi na a’afia (lea na molia), sa ia ta’ua le iai o sona talitonuga, o lona atalii na gaoia le $20 mai lana ato tupe.  Ma sa ia taumafai e a’oa’i lona atalii.  Ae na ia fa’amaonia ia lona le iloa pe na faafia ona ia po ina ma tatu’i ina lona atalii.  Sa ia fa’amaonia foi lona fa’aaogaina o se fusipa’, e a’oa’i ai lona atalii pe a le fa’alogo.

O lea aoauli na fa’afeso’ota’i ai e leoleo ia le ofisa e puipuia fanau iti (Social Service CPS) ma ina ua taunuu nisi o la latou aufaigaluega, na faapea ona fautuaina le tina o le tamaititi na a’afia, ina ia ‘aua ne’i toe fa’afeso’ota’i lona alo, ma ua faailoa atu e le tamaititi na a’afia, e fia nofo ma ona ‘grandparents’.

Ina ua fa’atalanoaina le tina a le tamaititi na a’afia, sa ia ta’ua le vala’au atu o lona to’alua a’o faigaluega ma fa’ailoa atu ia te ia, sa na ia (tamaloa) sasaina le la tamaititi.  Na fa’amaonia e le tina lona le siakiina o lona alo ina ua manava atu i lea po.

O le aso na soso’o ai, na valaau atu ai ona matua ia te ia, ma fa’ailoa atu ai le aveina o lona alo i le ofisa a le puleaoga.  Ma sa ia ta’ua lona fautuaina o lona toalua i taimi uma, e taofi lona sasaina o lona alo.

O moliaga ua faia faasaga i le tua’a a le tamaititi na a’afia, na aofia ai ia le Faatupu Vevesi i totonu o le aiga, faapea ma le Fa’ao’olima i lona tulaga e tolu, atoa ai ma le moliaga o le faia o se tulaga na a’afia ai le saogalemu o fanau iti.

O le moliaga o le fa’atupu vevesi, o se vaega ‘C’ i solitulafono mama, e mafai ona nofosala ai i le falepuipui, i le o’o atu i aso e 15, po o se sala tupe e $300; po o faasalaga uma e lua.

Mo moliaga o le fa’ao’olima ma le faia o tulaga e a’afia ai le saogalemu o le fanau, o ni vaega ‘A’ i solitulafono mama, e mafai ona nofosala ai ile ta’i tausaga, i le falepuipui; po o le ta’i $1,000; po o faasalaga uma elua.

E $3,000 se vaegatupe na fa’atulagaina e mafai ona tatalaina ai i tua le na molia, e faatalitali ai lona fa’amasinoga.