Loka se tamaloa ma molia i lona faamalosia o lona afafine fai

Pago Pago - AMERIKA SAMOA

O lo’o ta’ua i fa’amaumauga a le malo, le o’o atu o se tina i le Ofisa a Leoleo i Tafuna, i le aso 19 o Aukuso, 2024 e ripotia le masalomia o le faamalosia o sona alo tamaitai e 14 tausaga, e lona tama fai.

[O le a le lomia suafa o i latou ua molia ma a’afia i lenei mataupu, aua le puipuiga o fanau iti.]

E tusa ai ma faamaumauga a le malo, o le taaeo o le aso 19 o Aukuso na taunu’u ai le tina o le teineititi 14 tausaga, i le Ofisa a Leoleo, e faaulu lana tagi, ae o le aoauli o le aso lava lea, sa faatalanoaina ai e leoleo le tamaitai na a’afia.

Ua molia ai nei le tamaloa i moliaga e aofia ai;

Faitauga 1 & 3 - Sotoma (Sauaga i totonu o Aiga), o se vaega ‘B’ o solitulafono mamafa, e mafai ona nofosala i le 15 tausaga aga’i i luga, ma se sala tupe e le silia ma le $150; po o faasalaga uma e lua.

Faitauga 2 - Faamalosi teine (Sauaga i totonu o Aiga) - o se vaega ‘B’ o solitulafono mamafa, e mafai ona fa’afalepuipui ai i le va o le lima ma le sefululima tausaga, po o se sala tupe e le i lalo ifo ma le $150; po o faasalaga uma e lua.

Faitauga 4 - Taofiofi faasolitulafono (Sauaga i totonu o Aiga) - o se vaega ‘C’ i solitulafono mamafa, e mafai ona nofosala ai i le fitu tausaga, po o se sala tupe e le sili atu ma le $5,000; po o faasalaga uma e lua.

E $25,000 se vaegatupe na faatulagaina e tatala ai i tua le ua molia, e faatalitali ai lona faamasinoga.

O lo’o ta’ua i totonu o faamaumauga, le faamatalaina e le tamaitai na a’afia, i leoleo, o Iulai 2024 sa faatonu ai e le ua molia ia le tuagane laititi a le tamaitai na a’afia, e alu i fafo e salu le vao.  Ona lokaina lea e le ua molia ia faitoto’a o le fale, ma faatonu o ia (tamaitai na aafia) e la te o i totonu o le potu a lona uso. 

Na ta’ua e le tamaitai na a’afia lona tali atu ‘leai’ i le ua molia, ae peitai, sa tago le ua molia, i le u’una’i o ia (tamaitai na a’afia) i totonu o le potu moe ma amata ona faia e le ua molia, ia uiga mataga ma faamalosia le tamaitai na a’afia.

Sa faamatala foi e le tamaitai le fa’afefeina o ia i le oti, e le ua molia, pe a ia ta’uina i lona tina le mea sa tupu.

Na ta’ua foi e le tamaitai na a’afia, le faatonuina o ia e lona tina i le aso 18 o Aukuso, e alu e faavevela le latou meaai.  Ma sa faamatalaina e le tamaitai, lona vaaia o le ua molia, o tu i le faamalama i fafo o le umukuka ma valaau mai ia te ia, e alu atu.  

Sa tali iai le tamaitai, e leai, ona alu lea loa i le faamatala i lona tina le mea sa tupu.

O le aso 19 Aukuso, na fa’atalanoaina ai e leoleo ia le ua molia ma sa ia fa’amaonia ia ripoti i lona faia o amioga mataga ma le faamalosia o lona afafine fai, i le tau mafanafana o le 2021.

Sa faamatalaina foi e le ua molia, ia lona toe faia foi o ia tulaga mataga i le teineititi, i le afiafi o le aso 6 o Iulai, 2024.