Loka se tamaloa ina ua tu’ua’ia e lona toalua i le faia o gaioiga taufa’amata’u

Pago Pago - AMERIKA SAMOA

O le po o Fepuari 19, 2025 na vala’au atu ai se tina i le Ofisa a Leoleo i Tafuna, ma ripotia ai se tamaloa o lo’o sauaina ma faaleagaina ni meatotino a lona toalua.

E tusa ai ma fa’amaumauga a le faamasinoga, sa ta’ua e le tina na valaau atu i le ofisa a leoleo, le fa’atupu vevesi o le susuga ia Penehuro Siaki i totonu o lona aiga.

Sa faapea ona agai atu leoleo i le nofoaga na tupu ai le faalavelave ma na fa’asino ifo iai e le tina sa valaau i le ofisa a leoleo, ia le fale o lo’o faatupu vevesi ai Siaki.

E savali atu leoleo i le fale, ae vala’au mai iai ni tagata, o la ua sola Siaki ma faasino agai i tua o le fale.  Na faapea ona tamomo’e atu leoleo ma tuliloaina le na molia, ma ina ua maua o ia i tafatafa o le Paradise Pizza i Nu’uuli, sa faapea loa ona lokaina mai o ia ma tu’uina i totonu o le taavale a leoleo.

Ae na agai atu isi leoleo ma fa’atalanoaina le tina na valaau i le ofisa a leoleo mo se faamatalaga au’ili’ili o le fa’alavelave na tupu.  Ma na fa’amatalaina e le tina lea, le taunu’u atu o Siaki i le fale, ae ua fa’asuaava, ma amata ona tau upu ma lona toalua.  

Ma sa ta’ua e le tina na valaau i le ofisa a leoleo, o se taimi mulimuli ane, na o latou faalogoina ai se pa’o leotele mai i le potu na soso’o atu.  Ina ua sau i fafo e vaai po o le a le mea o tupu, na ia maua mai ai Siaki o ‘e’e ma palauvale ma taumafai e fasi lona toalua.

Sa ta’ua e le tina na valaau i leoleo, lona oso mai ma taumafai e taofiofi Siaki, ae ta’ita’i le to’alua a Siaki i totonu o le potu, a’o fa’aauau ona fa’aleagaina e Siaki ia meafale i totonu o le potu.

E le gata i lea, na ta’ua e le tina na valaau i leoleo, le tupu so’o o faalavelave faapenei i le va o Siaki ma lona tausoga (le to’alua a Siaki).

Ina ua fa’atalanoaina e leoleo ia le to’alua a Siaki, sa ia faamatalaina le amataina o le la misa ona ua le fiafia Siaki i le mea’ai.  Sa faamanino e le to’alua a Siaki, e tupu so’o ia nei ituaiga faalavelave i totonu o le la aiga, pe afai o lo’o fa’asuaava ia le na molia.  E masani ona ia fa’afefeina o ia.

Na molia ia Siaki i moliaga e tolu, na aofia ai le Faao’olima i lona tulaga e tolu, o le Faatupuvevesi faapea ma le moliaga i le Faaleagaina o meatotino i lona tulaga e tolu.

O le moliaga o le fa’ao’olima, o se vaega ‘C’ i solitulafono mama, e mafai ona nofosala ai i le falepuipui mo le sefululima aso, po o se sala tupe e $300; po o faasalaga uma e lua.

O le molia i le fa’atupu vevesi ma le fa’aleagaina o meatotino, o ni vaega ‘B’ i solitulafono mama, e mafai ona nofosala ai i le ono masina, po o se sala tupe e $500; po o faasalaga uma e lua.

E $500 se vaegatupe na faatulagaina e mafai ona tatalaina ai le na molia, e faatalitali ai lona faamasinoga.