Loka se tamaloa i lona taumafai e titina le ua o lona to’alua

Pago Pago - AMERIKA SAMOA

Sa lokaina i le aso 15 o Novema, 2024 ia se tamaloa sa tu’ua’ia i lona taumafai e titina le ua o lona to’alua, e tusa ai ma fa’amaumauga a le malo.  

Na molia le tamaloa i le Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai i le o’o atu i le tausaga atoa, po o se sala tupe e $1,000; po o faasalaga uma e lua.

Faapea ma le moliaga o le Faatupu Vevesi i totonu o le aiga – o se vaega e ‘C’ i solitulafono mama, e mafai ona nofosala ai i le falepuipui i aso e 15, po o se sala tupe i le va o le $150 ma le $300; po o faasalaga uma e lua.

E $30,000 le vaega tupe na faatulagaina e mafai ona tatalaina ai le ua molia mai i le falepuipui.

E tusa ai ma fa’amaumauga a le malo, na mafua ona tupu lenei fa’alavelave ina ua mana’o le tamaloa e la te faiaiga ma lona to’alua, ae peitai, sa le’i mana’o ai le tina.  Ma na avea lea ma tulaga sa le fiafia ai le ua molia ma ia taumafai e titina le ua o lona to’alua.

Sa ta’ua i fa’amaumauga a le malo le taumafai o le tina e u’una’i ese le ua molia, ae peitai, sa le mafai ona sa saofai le ua molia i luga o lona manava ma ina ua matapogia le tina, sa manatu le ua molia, ua maliu o ia.

O lea na tago ai le ua molia, i le tu’i fa’alua ia le papatua o le tina ma na mafai ona toe te’i ma ai le tina, ma sola ‘ese mai ai mai le ua molia, agai i le potu moe a matua a le ua molia, ae peitai, na toe oso atu le ua molia, ma toe pu’e mai le tina ma toe amata ona titina o ia.

Na tamomo’e maim atua o le ua molia ma taumafai e toso ese le ua molia mai i lona to’alua, ae tago mai le ua molia, i le toe toso atu le vae o le fafine.

Ina ua taunu’u atu leoleo i le nofoaga na tupu ai le faalavelave, na molimauina le nofo mai o le tina i  luga o le moega, e aunoa ma se minoi a’o manava lemu.  Sa taumafai se tasi o leoleo e ‘eu le lima o le tina ina ia mafai ona tilotilo mai, ae peitai, na fa’aauau lava ona nofo le tina ma sioa i le ‘wall’ o le fale.

Ae ina ua milimili e le leoleo le lima o le tina, na fa’ato’a tilotilo mai o ia ma lue mai lona ulu.

Na faapea loa ona lokaina mai e leoleo le tamaloa ae aveina atu le tina i le Ofisa Leoleo i Tafuna ina ia mafai ona togafitia o ia e le vaega a le EMS ma aveina ai i le falemai mo ni isi togafitiga.

Ina o taumafai leoleo e fa’atalanoaina le ua molia, sa musu e tali ni fesili a leoleo.

Na aofia foi i fa’amaumauga a le malo, le tupu so’o o faalavelave faapenei i totonu o le aiga ma ua avea le suiga i le tama o le aiga, ma tulaga ua fefe ai ona o lona ola ma le soifua o lana fanau.