Loka se alii na galue i le TBAS i le gaoi

Pago Pago - AMERIKA SAMOA

Ua lokaina nei ma molia se alii na galue i le fale teutupe a le TBAS, ina ua masalomia i lona gaoia o se tinoitupe e silia ma le $20,000 mai i se tusitupe a se pisinisi lotoifale.

E tusa ai ma faamaumauga a le malo, o le aso 25 o Setema, 2023, na o’o atu ai se tagata faigaluega a le Paramount, i le ofisa a leoleo i Tafuna e faaulu sana tagi, ona o le ave’esea o se tinoitupe mai i totonu o le latou teugatupe i le TBAS, e aunoa ma se faatagana mai i le latou ofisa.  Na faapea loa ona tu’uina atu lenei mataupu i vaega suesue a le ofisa a leoleo (CID) ina ia mafai ona suesue atili le mafua’aga o lenei faafitauli.

Na faamaonia e le tausitupe a le Paramount le toina faalima, e se tasi o tupe mai i le tusitupe a le kamupani, e aunoa ma se iloa e le kamupani.  Ma sa faia lea tulaga e ala i ni siaki le tumau, lea e mafai ona aumai mai i faletupe.  O siaki nei, e leai ni faamaumauga patino e iai i luga, ae tago le tagata faatumu ai le igoa, o le fuainumera o le tusi tupe ma isi faamaumauga faapena.

Na o’o sui o le CID ma feiloai ma le sui Peresetene faapea le COO a le TBAS, ma o iina na mafai ona faamaonia ai le tagata sa gaoia tupe a le kamupani, e ala i le talaina o ni siaki se lima, i le aofaiga e $21,000.00.  Ma na faamaonia foi e Owen Peery, le COO a le TBAS, ua mae’a ona toe tu’u i totonu e le TBAS ia le aofaiga atoa lea i le tusitupe a le Paramount.

O le susuga ia Faamita’i Collins lea ua molia nei i lenei mataupu ma ua mae’a foi ona fa’ate’a o ia mail ana galuega i totonu o le faletupe.

I le aso 10 o Oketopa, 2023, sa o’o atu ai Collins i le ofisa a le CID i Fagatogo mo le faia o sana faamatalaga e tusa ai ma lenei mataupu.

Na ia faamaonia i vaega su’esu’e a leoleo lona gaoia o le tupe mai i le tusitupe a le Paramount, a’o galue o ia i le faletupe.  Na mafai ona ia maua ni siaki le tumau ma sainia ai le toina mai i fafo o tupe i le aso 30 o Aukuso, Setema 5, 12, 15 ma le aso 20.

Sa ta’ua e Collins, e tolu ni siaki sa ia tusia mo sona tausoga.  Ma o nisi tupe sa ia teuina I totonu o se tusitupe a lona tausoga, e aunoa ma le iloa e lona tausoga, ona o lea e ia te ia le ‘debit card’, o le mafuaaga lea na ia tusia ai le siaki i le igoa a lona tausoga.

Ae o le tele o le vaega o le tupe sa ia teuina i lana tusi tupe o lo o i atunuu i fafo.

Ua molia nei Collins i faitauga e lima o le Gaoi – mo siaki e lima sa ia fa’aaogaina e to mai ai tupe i fafo mai i le tusitupe a le Paramount.

O nei moliaga e mafai ona faafalepuipui ai se tasi i le 7 tausaga, o se sala tupe e $5,000 pe o’o atu foi i le $20,000, ia po o faasalaga uma e lua.

E $10,000 le tinoitupe faatulagaina e mafai ona totogi e tatala mai ai Collins i tua e faatali ai lona faamasinoga.