Loka se alii ina ua taumfai e susunu se faatauoloa i le vai vevela

Pago Pago - AMERIKA SAMOA

O le taeao o le aso Kerisimasi 2024, na valaau ai se tamaitai i le Ofisa o Leoleo mo se fesoasoani, ina ua alu atu le susuga ia Iopu Loe i totonu o le latou faleoloa ma faia uiga taufa’amata’u faasaga ia te ia, ma nisi o le latou aufaigaluega.

Sa mafai ona fa’aalia e leoleo, le ua molia, o le susuga ia Iopu Loe.

Na ta’ua e le tamaitai sa valaau mai i le ofisa a leoleo, le alu atu o Loe i le latou faleoloa (Shining Star) ma amata ona palauvale leotele.

Sa taunu’u leoleo i lena taeao ma talatalanoa ma le tamaitai sa valaau mai i le ofisa a leoleo ma sa fa’aalia e le tamaitai i leoleo, ia le fa’asuaava o Loe i le taimi na alu atu ai i le latou faleoloa.

Na fa’aali ifo foi e le tamaitai i leoleo, ia ata vitio mai i le masini pu’e ata a le faleoloa ma na molimauina ai e leoleo ia le amioga a le ua molia.  Sa fa’ailoa atu foi e le tamaitai mai i le faleoloa, i leoleo, le faasaina o Loe mai i le latou faleoloa, talu ai lona alu atu ma faaleaga oloa ma meatotino i totonu o le faleoloa.

Sa faamatalaina foi e le tamaitai le alu atu fa’afuase’i o Loe i lea aso ma fa’afefe o ia i le susunuina o ia i se vai vevela, pe afai e le fai faalelei o ia (le ua molia).  Ma na ia (le ua molia) faailoa atu foi i le tamaitai mai i le faleoloa, e le o ia (le na molia) o se gaoi.  Ma sa faapea foi ona ia palauvale leotele solo i totonu o le faleoloa.

Ona tago lea o Loe ma si’i i luga le tane vai vevela ma fa’afefeina ai o ia.  O iina na valaau ai loa e le tamaitai mai i le faleoloa, ia leoleo, mo se fesoasoani.  Ma ina ua iloa e Loe ua valaau leoleo, sa ia tu’ua loa le faleoloa.

Na fa’asino ifo e le tamaitai mai i le faleoloa, i leoleo, le ulufafo atu o Loe mai i le faleoloa, i le faitoto’a pito i tua.  O iina na agai atu ai leoleo mo le sailiga o le ua molia.

Sa maua atu e leoleo ia le ua molia, o nofonofo mai i se faleo’o i tua o le faleoloa, ma nisi alii se to’alua.  Ma na molimauina e leoleo ia le mumu o mata a le ua molia, ae o lo’o ia u’uina se apa pia i lona lima.

Na faapea ona faailoa atu iai e leoleo, o le a aveina o ia i le ofisa a leoleo mo le faia o se latou su’esu’ega.

Ae ina ua tu mai i luga le ua molia, sa molimauina le tautevateva o le ua molia ma lona fai mai i leoleo, e leai sana mea sese na faia.  Sa lagonaina e leoleo le malosi o le manogi pia o le alii.

A’o taumafai leoleo e lokaina mai lima o le ua molia, sa ia taumafai e se’i ese ona lima.  Ae na i’u ina mafai e leoleo ona taofiofi o ia ma lokaina ona lima ma tu’uina o ia i totonu o le taavale a leoleo ma aveina atu loa o ia i le ofisa a leoleo.

O moliaga na molia ai Loe, na aofia ai le Faatupu Vevesi i totonu o le aiga ma le Fa’ao’olima i lona tulaga e tolu, o vaega ‘C’ i solitulafono mama, e mafai ona nofosala ai i le falepuipui i le ta’i sefululima aso, po o se sala tupe e ta’i $300; po o faasalaga uma e lua.

Faapea ai ma le Solivale o fanua e aunoa ma se faatagana, o se vaega ‘B’ o solitulafono mama, e mafai ona nofosala ai i le ono masina, po o se sala tupe e $500; po o faasalaga uma e lua.

E $2,000 se vaegatupe na fa’atulagaina e mafai ona tatalaina ai le ua molia, e faatalitali ai lona faamasinoga.