Loka se alii i le solivale o fanua ma fale a se aiga

Pago Pago - AMERIKA SAMOA

O le aoauli o le aso 24 o Mati, 2025, na valaau atu ai se tina i le Ofisa a Leoleo i Tafuna mo se fesoasoani, mo sana tama teine o lo’o i le latou fale, ae o lo’o iai se alii o lo’o fealua’i i fafo o le fale, e foliga mai o lo’o taumafai e ulufale faamalosi i totonu o le fale.

E taunu’u atu leoleo, ua sola le alii, ae peitai, sa toe maua ina o ia i se taimi mulimuli ane, ma lokaina ai o ia.

Ina ua taunu’u leoleo i le nofoaga na tupu ai le fa’alavelave, sa o latou mua’i talanoa ma le tina na valaau i le ofisa a leoleo.  Sa ta’ua e le tina le valaau atu o lana tama teine (le tamaitai na a’afia i lenei mataupu), ma ta’u atu ia te ia, le iai o se tagata i totonu o le latou fale.  O lo’o tu’itu’i I le faitoto’a i le fogafale muamua.  

Sa faapea foi ona tu’uina atu e lea tina, i leoleo, ia se ata vitio o le alii na i totonu o le latou fale, ma fa’amaonia ai e leoleo, o le susuga ia Johnny Talia.

Na toe agai atu loa leoleo e sailia Talia i lona fale, ma e taunu’u atu leoleo, o lo’o fealua’i mai Talia i fafo o le fale a lona tuaoi.  Ina ua fa’ailoa atu e leoleo ia Talia ia le mafuaaga o le latou o’o atu, na faapea ona sola ese ia Talia, ae tuliloaina ai o ia e leoleo.

Ma a’o taumafai leoleo e loka o ia, sa taumafai le na molia, e se’i ia loka a leoleo.  Ma na fa’aauau ona pisa  leotele le alii, sa amata ai ona o mai i fafo ia tuaoi.  Ma sa ta’ua i totonu of fa’amaumauga a le faamasinoga ia le malosi o le manogi pia o le na molia.

O se taimi mulimuli ane, na fa’atalanoa ai e leoleo ia le tamatai na a’afia, ma sa ia fa’amatalaina lona fa’alogoina o se leo e le masani ai, i totonu o le fale, a’o ta’ele.  Sa ona manatu, o lona tuagane laititi lea ua fo’i atu mai i le aoga ae peitai, ina ua savali mai i fafo, sa ia va’aia ai ia Talia.

O lo’o tu Talia i fafo o le faitotoa ma tauanau atu o ia e sau i fafo.  Sa ta’ua e le tamaitai na a’afia, ia lona palauvale mai ia Talia ma faatonu e alu ‘ese, ae musu le alii.  O lona fefe tele, na ia vala’au ai loa lona tina, e siaki le latou masini pu’e ata lea e i fafo o le fale, ma sa tauanauina e le tamaitai ia lona tina, ina ia faatopetope mai i le fale.

Sa ta’ua foi e le tamaitai na a’afia, na fa’ailoa atu e a latou tuaoi le ulufale foi e Talia, o a latou fale.

O moliaga na faia faasaga ia Talia, na aofia ai le Solivale o fale ma fanau e aunoa ma se faatagana, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o fa’asalaga uma e lua.

O le moliaga lona lua, o le tete’e i le avefa’apagotaina e leoleo, o se vaega ‘A’ i solitulafono mama, e mafai ona nofosala ai i le falepuipui i le tausaga atoa, po o se sala tupe e $1,000; po o fa’asalaga uma e lua.

E $3,000  na fa’atulagaina mo le tatalaina o le na molia, e faatalitali ai lona faamasinoga.