Loka se alii i le fa’ao’olma le tau fa’amata’u i lana uo teine

Pago Pago - AMERIKA SAMOA

O le aso 10 o Novema, 2024, na lokaina ai ma molia, le susuga ia Matagofie Talamoa, I le moliaga o le Faatupu Vevesi i totonu o lona aiga, ona o se fa’alavelave sa tula’i mai i le va o ia ma sana uo teine.

E tusa ai ma faamaumauga a le malo, o le tausoga a le tamaitai na a’afia, sa na fa’afeso’ota’ia le Ofisa a Leoleo i Tafuna e tusa ai ma lenei faalavelave a na fa’ailoa atu foi e le tausoga i sui malu o le malo, o lo’o iai le tamaitai na a’afia i lona fale, i le taimi lea.

Sa faapea loa ona agai atu leoleo i le fale a le tausoga ma fa’atalanoaina ai le tamaitai na a’afia.

Ma sa ia faamatalaina i leoleo, a’o ia sauna atu mo galuega, sa ia fesiligia lana uo tama e uiga i fa’amaumauga a lona ‘niece’.  Ae tali mai le ua molia, ua mana’o e faamae’a le la mafutaga.

O le tali a le tamaitai ia Talamoa, o le a ia ripotia o ia (Talamoa) i leoleo, aua e tele mea o lo’o ia (Talamoa) faia, o lo’o ona (tamaitai) nofo malamalama ai.

Ma na avea lea faamatalaga a le tamaitai na a’afia, sa ita ai Talamoa, ma ia tago i le u’u mai se atopa’u ma togi ai lana uo teine ma tau i lona ulu.  Ona soso’o atu lea ma ana itu i foliga o lana teine.

Na ta’ua e le tamaitai na a’afia, o lana fa’alogo i lena taimi, e pei o le a maliu.  Ae ina ua taumafai e tu i luga, na fa’anofo o ia i lalo e Talamoa ma fai atu iai o le a ia (Talamoa) saisaia o ia i se maea.  Ma loka uma faamalama ae tu’u ai o ia i totonu o le potu seia maliu o ia.

Sa faapea foi ona faatonuina e Talamoa ia lana uo teine, ina ia aua nei alu i fafo ma le potu. Ma o lona fefe tele, sa le minoi ai.

I le afiafi na faatonu ai e le ua molia ia lana uo teine ina ia kuka se meaai ae ina ua tali mai lana uo i le mea’ai o le a ia kukaina, na tali atu le ua molia, e le fia ‘ai ai i lea mea’ai ma ia lafoina mai ni tala tau fa’amata’u i lana uo teine.

O le taimi na moe ai le ua molia, sa faapea ona sola ese mai ai loa lana uo teine mai i le fale, ae sulufa’i atu i le fale a lona tausoga, lea na valaau i leoleo.

Sa fa’amaumauina ia manu’a o le tamaitai na a’afia, na aofia ai lalo o lona mata taumatau, o lalo o lona ‘auvae, ma le fula o lona mata tauagavale.  Na faapea ona valaauina ia le vaega a le EMS mo le togafitia o le na a’afia.

Na faapea foi ona logoina le Matagaluega mo le tautua ma alagamanuia a tagata lautele (DHSS) mo se fesoasoani i le puipuiga o le tamaitai na a’afia.

Ae peitai, e pei ona ta’ua i faamaumauga a leoleo, na fiu leoleo e saili Talamoa, ae e le’I maua o ia.  Ma e le’i ta’ua i totonu o faamaumauga a leoleo, le nofoaga ma le aso, na avefaapagotaina ai le ua molia.

O le moliaga o le Faatupu Vevesi i totonu o le aiga, o se vaega ‘C’ o solitulfono mama, e mafai ona nofosala ai  le falepupui, i le o’o atu i aso e 15, o se sala tupe e $300,000; po o faasalaga uma e lua.

E $1,000 na fa’atulagaina mo le tatalaina o le ua molia, e faaatali ai ona faamasinoga.