Loka ni alii se to’atolu sa onana ma faatupu misa i luga o se pasi

Pago Pago - AMERIKA SAMOA

O le aoauli o le aso 20 o Fepuari, na valaau atu ai se avepasi i le Ofisa a Leoleo i Fagatogo, e ripotia ni alii se to’atolu o lo’o fa’amisa i se tasi o ana pasese.

I su’esu’ega a leoleo, sa fa’aalia ai le faia e Ierusalema Tonia ia ni uiga taufa’amata’u, i se tasi o le pasese, ma ia faatonuina le pasese e alu i lalo ma le pasi.  Ae o le taimi lea o lo’o ‘e’e ma palauvale mai iai ia Aperaamo Tonia, ma taumafai e lu’i le pasese e la te fufusu.

O Ierusalema ma Aperaamo sa molia fa’atasi ma Sauao Filimalo, i lenei fa’alavelave.

O Faganeanea i se fale fa’atali pasi, na taofia ai le pasi ma oso ai i lalo le pasese na a’afia, ma mulimuli atu ai Ierusalema ma Aperaamo, ae taunu’u atu ai foi ma leoleo.

E taunu’u atu leoleo sa faatonu mai i le ofisa autu e agai atu i lenei faalavelave, ua mae’a ona lokaina e nisi leoleo sa taunu’u muamua i le nofoaga na tu ai le pasi, ae o le taimi lea, o lo’o u’uina e Ierusalema ma Aperaamo ia ni taga pepa o tumu i ni apa pia.  Sa taumafai le alii o Aperaamo e savali ese atu i leisi itu o le alatele, ae na taofia mai o ia e leoleo.

Ae sa faapea ona toe taunu’u atu ma nisi leoleo faaopoopo ma ave faapagotaina ia Sauao Filimalo. Ma aveina fa’atasi atu ai lea o i latou e to’atolu, i le ofisa a leoleo i Fagatogo mo le fa’aauauina o su’esu’ega.

Ona o le onana o nei alii, aemaise lava Ierusalema ma Aperaamo, sa fa’afaigata ona faatinoina tiute a leoleo mo le fa’atalanoaina o latou, faapea ma le tau fa’afilemu i totonu o potu sa fa’atalanoaina ai.

O lo’o ta’ua i ripoti le faia o le inuga pia a Ierusalema ma Aperaamo i luga o le pasi.  Ma a’o taumafai leoleo e fa’atalanoaina i la’ua, sa mumusu e fa’alogo ma nonofo faalelei, ma fa’aauau ona manana’o i leoleo e faia ni a la feau faapea ai ma lo la faia o ni fa’amatalaga e le manaomia.

E tusa ai ma le fa’amatalaga a le pasese na a’afia, sa ia faatuina le pasi i Fagatogo, e sau ai i le latou aiga.  Ina ua taunu’u le pasi i Utulei, sa tu ai ma piki mai ai Ierusalema, Aperaamo ma Sauao.  Sa ta’ua e le pasese na a’afia, sa amata ona fai atu faamatalaga a nei alii ia te ia.

Na ia ta’ua le ‘e’e atu o Ierusalema ia te ia, e alu i lalo ma le pasi.  Ae palauvale atu ia Aperaamoa ma lu’i o ia e la te fufusu.  E ui ina sa fai atu le pasese na a’afia e soia, ae peitai, sa fa’afefeina o ia e Ierusalema i le oti.

Ina ua o’o mai le pasi i Faganeanea, sa taofi loa e le pasese na a’afia ma fai atu ia i latou e toatolu ua molia, e o mai i lalo ma le pasi.  Ae peitai, na mulimuli mai ai i lalo ma nisi o le pasese.

O le taimi lea, na va’aia ai e se leoleo ia le faapotopotoga i le fale faatali pasi, ma alu atu ai e su’esu’e le mafuaaga, lea na iloa ai le fa’asuaava o i latou e to’atolu ia na molia.

Sa fa’ailoa atu e le pasese na a’afia i leoleo, e leai se gaioiga a Sauao sa fai atu ia te ia, i luga o le pasi.

O lea na ona molia ai Sauao i le inu pia i se nofoaga e fa’asa ona taumafa ai ‘ava malolosi, o se vaega ‘B’ i solitulafono mama, e mafai ona nofosala ai i le falepuipui, i le o’o atu i masina e ono, po o se sala tupe e $500; po o faasalaga uma e lua.

Ae o Ierusalema ma Aperaamo, na molia i le Fa’atupu Vevesi i nofoaga faitele faapea ma le Taumafaina o se ‘ava malosi, i se nofoaga e faasaina ona taumafa ai ‘ava malosi.  O nei moliaga e lua, o ni vaega ‘B’ o solitulafono mama, e mafai ona nofosala ai i le falepuipui, e o’o atu i le ta’i ono masina, i le moliaga.  Po o se sala tupe e ta’i $500; po o faasalaga uma e lua.

E ta’i $500 vaegatupe na fa’atulaga mo i latou e to’atolu, e mafai ona totogi e tatalaina ai i latou, e faatalitali ai a latou faamasinoga.