Loka i le fa’atupu vevesi ae maua ai fualaau fa’asaina

O le alii lea na pu’e fa’apagota e Leoleo i le 2 vaiaso talu ai, ona o tu’uaiga i lona faia o ni gaioiga e save’u ai le nonofo filemu o tagata lautele, atoa ai ma lona fa’aoolima i se isi ali’i, ua molia nei i lona umia fa’asolitulafono o fualaau fa’asaina, ina ua maua e Leoleo fualaau fa’asaina ia te ia i le taimi na pu’e faapagota ai o ia.

O le vaiaso na te’a nei na tula’i ai le susuga a Afele Togiaso i luma o le Fa’amasinoga Maualuga mo lana ulua’i iloiloga.

Ua molia Togiaso i le moliaga mamafa o le umia faasolitulafono o vaega o le laau faasaina o le mariuana, faapea ai ma le umia faasolitulafono o vaega o le pauta fa’asaina o le aisa; o vaega ia o solitulafono mamafa, lea e mafai ona faasala ai se tasi i le toese mo le umi e le itiiti ifo i le 5 tausaga ae le sili atu i le 20 tausaga, poo le fa’asala foi i le salatupe e le itiiti ifo i le 5 tausaga ae le ova atu i le 20 tausaga.

O loo molia fo’i Togiaso i le moliaga o le faaoolima i le tulaga lua, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le sili ma le 5 tausaga, pe faasala foi i le salatupe e le silia i le $5,000, poo e fa’asala fo’i i faasalaga uma ia e lua; faapea ai ma moliaga mama e 2 o le faatupu vevesi i nofoaga faitele faapea ai ma le faia o gaioiga e ono lamatia ai le saogalemu o fanau laiti.

E $10,000 le tupe lea ua fa’atulaga e totogi ona fa’atoa mafai lea ona tatala Togiaso i tua mai le toese i Tafuna. O le ulua’i iloiloga o lenei mataupu ua faatulaga e faia ia Tesema 27.

E pei ona taua e le malo i le latou tagi e fa’apea, na faafesoota’i e se Tina le Ofisa o Leoleo i Tafuna mo se fesoasoani, faasaga i se alii sa ia lafo ni upu masoa i lona to’alua ma lana fanau, atoa ai ma lona faaoolima i lona to’alua e ala i lona tu’i o ia ma pau ai i lalo.

Na taunu’u leoleo ma latou vaaia ai le tumu tumu o tagata i luma o le Faleoloa o le JLK Mart i Tafuna, a o taumafai isi tagata e tau fa’atu i luga se ali’i o loo taatia i lalo o le sima e paka ai ta’avale.

Na maua le avanoa e talanoa ai Leoleo i le Tina na ia talosagaina se fesoasoani, ma ia faailoa ai loa i Leoleo le faalavelave atoa sa tupu. Na taua e le Tina i Leoleo e faapea, o le afiafi o le aso lea pe tusa o le itula e 6:12, sa ia telefoni ai i lona to’alua e sau e piki atu o ia ma le la fanau i luma o le faleoloa. E le i umi ae vaaia loa le ta’avale a lona to’alua ua aga’i atu ma paka i luma tonu lava o le faleoloa.

A o taumafai lona toalua e oso mai i fafo ma le latou ta’avale, na fa’afuase’i ona sosolo atu se pikiapu i tafatafa ma so’a le pito i tua o le latou ta’avale, ma sasali atu ai ma le isi itu o le faitoto’a o le ave ta’avale.

Na savali atu lona to’alua e fia talanoa i le ave ta’avale o le pikiapu peita’i na faafuase’i ona ia faalogoina le ee mai o le ave ta’avale o le pikiapu i lona to’alua ma faapea mai, “O oe lena e sese. E le o sa’o le itu o loo paka ai lau ta’avale.” O le ali’i lea na valaau ane i le to’alua o le molimau, o ia lea o Togiaso, le o lo o molia i lenei mataupu.

Na taua e le Tina i Leoleo e faapea, e fai lava tala a le ave taavale ma oso mai i fafo ma lana ta’avale, ma savali mai i le itu o lo o tu atu ai lona to’alua ma amata loa la tauga upu. Na faafuase’i ona tu’i e le ua molia le to’alua a le molimau ma pau ai i lalo, ona ia tago loa ua toe ta tu’i ona foliga ma kiki lona papatua.

O tagata sa i ai i le taimi lea na laga atu ma fesoasoani e vaovao le vevesi, ae o le taimi lea na savali atu ai le ua molia ma oso i totonu o lana ta’avale ma faaola, ma taumafai loa e sola ese. Na vave gaioiga a ni ali’i se to’alua sa i ai, ma la taumafai ai loa e poloka le ta’avale a le ua molia i a laua ta’avale, ina ia le mafai ai ona sola ese o ia mai le nofoaga na tupu ai le fa’alavelave sei taunu’u atu Leoleo.

E to’atele isi molimau na fesiligia e Leoleo e uigai lenei mataupu, e aofia ai ma le ali’i na a’afia, ma latou faamatalaina ai fo’i le fa’amatalaga lava lea e tasi na tuuina atu e le Tina na ia faafesoota’iina Leoleo mo se fesoasoani.

Na taua e se tasi o molimau i Leoleo e fa’apea, i le taimi na oso ai i fafo le ua molia mai lana ta’avale, sa ia vaaia le pau o se tama’i taga pepa iila i fafo o lana ta’avale, e foliga mai o lo o i ai ni pauta papa’e. Na vave le vaai a le ua molia ma ia iloa ai le tama’i pepa iila na pau ese i fafo, o lea na ia tago ai loa ua piki i luga ma toe tuu i totonu o lana ta’avale.

Na pue faapagota e Leoleo le ua molia ma auina atu loa i le Ofisa o Leoleo i Tafuna mo suesuega. Sa taofia ai fo’i e Leoleo ma lana ta’avale ma auina atu mo suesuega.

Ina ua su’e e Leoleo le tino o le ua molia, sa latou maua ai se paipa tioata e fa’aaoga e ula ai le pauta faasaina o le aisa. Sa maua ai fo’i ma ni sikaleti mariuana i totonu o le taga o lona ova lola sa ofu i lea afiafi.

Na faasolo atu le sailiga a Leoleo i totonu o le ta’avale a le ua molia, ma latou maua ai se tama’i taga pepa iila o lo o i ai vaega o le pauta fa’asaina o le aisa, faapea ai ma se paipa tioata ua gau, ae o lo o panu panu ai to’ega o le pauta pa’epa’e o le aisa.

Na faia se suega i pauta ma lau mamago na maua i le tino ma le ta’avale a le ua molia, ma faamaonia ai, o vaega ia o le pauta faasaina o le aisa faapea ai ma le laau faasaina o le mariuana.

Ina ua fesiligia e Leoleo le ua molia e tusa ai o lenei fa’alavelave, sa ia taua ai lona ita tele i le ali’i na a’afia i le sese o le itu na paka ai lana ta’avale, o le mafua’aga lea na ia faaoolima ai ia te ia ao faalogologo lana fanau.

Mo fualaau fa’asaina sa maua ia te ia, na taua e le ua molia e fa’apea, o sikaleti mariuana na avatu i se tasi o ana uo ave pasi e sau mai Malaeimi, ae o aisa na avatu i sana uo e sau mai le nofoaga e taua o le “Filifili”.

MATAUPU TUAI

O le tausaga e 2011 na ta’usala ai e le Fa’amasinoga Maualuga ia Togiaso i le moliaga mamafa o le faaoolima i le tulaga lua, i lalo o se maliliega na latou sainia ma le malo. I le ta’usala ai o ia i lea moliaga, na faanofovaavaaia ai loa o ia mo le 5 tausaga i lalo o poloaiga na te tuliina masina e 20 i le toese i Tafuna, atoa ai ma lona totogiina o le salatupe e $1,000.