Loka e Leoleo se alii talavou ona o tu’uaiga o le gaoi ma le talepe fale

Pago Pago - AMERIKA SAMOA

E 27 tausaga o se ali’i talavou mai Samoa na pu’e faapagota e Leoleo i le masina na te’a nei, ona o tu’uaiga i lona osofaia lea o se fale o se aiga faapea ai ma se Faleoloa i se pitonu’u o Tafuna i le masina na te’anei. 

E tusa ai ma le tagi a le malo, e 2 fale na osofa’i e le ua molia ma lana uo, faapea ai ma se Faleoloa, ae maua ai loa le isi to’atasi e Leoleo ae sola le isi to’atasi. Ae ina ua saili e Leoleo le tino o le ali’i ua molia, na maua i ai vaega o fualaau fa’asaina.

O le ali’i na maua e Leoleo ma pue faapagota, o ia lea o Faasega Fotu, ae o lo o tau sailia pea i le taimi nei lana uo na sola ese ma Leoleo, le alii e igoa ia “WISKY”. Ua talosagaina e Leoleo le mamalu o le atunu’u ina ia fesoasoani atu i le tau sailia o le alii talepefale e ala i le tuuina atu o ni fa’amatalaga mai soo se tasi na te silafia le tulaga o lenei fa’aalavelave.

Ina ua fesiligia e Leoleo le susuga a Fotu e tusa ai o le fa’alavelave e pei ona tu’uaia ai o ia, sa ia ta’ua ai e fa’apea, sa la fuafua ma lana uo la te osofaia fale o aiga ma faleoloa i le po, ina ia maua ai tupe e faatau ai fualaau fa’asaina. 

O le po o le aso 13 o Setema na te’a nei pe tusa o le itula e 9:20, na talosagaina ai e se Tina mai Tafuna le fesoasoani a Leoleo, ona o ni alii se to’alua na maua o la osofaia se faleoloa, ua sola le to’atasi ae o loo taofia e tagata o le pitonuu le isi to’atasi. 

Na taunuu Leoleo ma latou vaaia ai se alii pe tusa ma le 50 tausaga le matua o loo ia taofia le lima o se alii talavou. O lea ali’i talavou o Faasega Fotu lona igoa, o ia lea o loo molia i lenei mataupu. O le ali’i na sola ese e iloa i le igoa tau valaau ia Wisky, o le uo lea a Fotu sa la to’alua i le taimi o le osofaiga o fale na aafia ma le faleoloa.

Na faamatala e le ali’i lea na ia puea ia Fotu i Leoleo e fa’apea, o ia na alu e momoli lana uo teine i le galuega, peita’i na galo ona tapuni le faitoto’a pito i luma o lona fale. Pe tusa ma le itula le umi na alu ese ai o ia, ae ina ua toe fo’i mai, na ia molimauina sa i ai le tagata i totonu o lona fale, ona o nisi o meatotino sa i totonu ua taape solo.

Na ia siaki lana ato tupe sa i luga o le laulau i totonu o le potu ua gaoia, sa ia iloa fo’i ua aveese lana laptop ma le telefoni sa i luga o le laulau i luma o le potu malolo. O nisi o ato i totonu o le potu malolo ua save’u solo ma tauai i lalo lavalava.

Sa taamilo solo le alii e ana le fale i fafo o lona fale e tau saili le tagata na faatinoina lenei gaioiga le alofa i lona fale, ae tau atu ai loa ma lana vaai i ni alii talavou se to’alua o loo tutu mai i le faitoto’a pito i tua o le faleoloa o loo i luma o lona fale. Sa ia manatu o loo taumafai le au alii talavou nei e to’alua e osofa’i le faleoloa, peita’i na toe manino i lana vaai, ua uma ona osofa’i e le au alii ia e to’alua le faleoloa, ona o loo taatitia i o la tafatafa oloa mai totonu o le faleoloa.

Vave ona iloa mai e le alii o Wisky le aga’i atu o se tagata ia te i laua, ma ia tago ai loa i le ato sa ia tuu i ai oloa na gaoi ma tamo’e ese loa, ae maua ai na o le alii o Fotu i tua o le faleoloa, ma ta’ita’i atu ai loa e le alii lea ia Fotu i luma o lona fale ma fesiligia ai.

Ina ua fesiligia e le alii e ana le fale lea na osofa’i muamua ia Fotu poo laua na osofaia lona fale, na tali Fotu, ioe, o laua na osofaia lona fale, o loo ia te ia lana ato tupe ae o le laptop ma le telefoni o loo alu ma lana uo.

E to’atasi le isi molimau na fesiligia e Leoleo e uiga i lenei mataupu, ma ia taua ai lona vaaia o alii talavou e to’alua o loo tuli oso i totonu o le faamalama o le faleoloa, ma ia faafesootaia ai loa le telefoni o le 911 ma logo i ai le faafitauli.

Na faamaonia e Leoleo, sa i ai le isi tagata na vili atu e faatatau i ni alii se to’alua o loo osofaia le Faleoloa. Pe tusa o le 2 minute talu ona tuana’i lea valaau, ae valaau atu loa ma le isi telefoni e logo atu ua ma’ea ona pu’e e se alii le tasi o alii talavou na osofaia le Faleoloa.

A o le i auina atu Fotu i le Ofisa o Leoleo mo suesuega, na faia muamua se suega faapitoa i lona tino mo aupega ma fualaau faasaina. Ina ua saili e Leoleo le tino o le ua molia, sa latou maua i ai ni paipa tioata se 2 o loo i ai vaega o le pauta faasaina o le aisa. Na toe saili e Leoleo le isi taga o le ofu a Fotu ma maua i ai sikaleti mariuana e 2 ua mae’a ona taai ua sauni e ula ma fa’aaoga.

Na malie Fotu e talanoa i Leoleo e faatatau i le faalavelave e pei ona pu’e faapagota ai o ia. Sa ia taua i Leoleo e faapea, o le autu o le la osofaiga, o le sailia lea o ni meatotino mai totonu o fale o aiga ma faleoloa e faatau atu ina ia maua ai tupe e faatau ai fualaau faasaina mo i laua.

Sa ia ioeina lo la osofaia ma lana uo o ni fale se 2 faapea ai ma se faleoloa se tasi, ma, o le tele o oloa na gaoia mai fale ia e 2 ma le faleoloa, o loo alu uma lana uo o Wisky. O fualaau faasaina sa maua ia te ia, o meatotino lava a ia na maua mai i lana uo ma le fa’amoemoe e ula ma fa’aaoga e eva ai.

E le i mafai ona faailoa e Fotu i Leoleo le igoa moni o lana uo, se’i vagana ai le igoa tauvalaau o Wisky.

Ua talosagaina e le Ofisa o Leoleo le atunu’u mo soo se tasi na te silafia se faamatalaga e faatatau i le alii e igoa ia Wisky ina ia faafesoota’i vave atu le Ofisa o Leoleo i soo se taimi.

O le masina lava na te’a nei na tula’i ai Fotu i luma o le Faamasinoga Faaitumalo mo lana ulua’i iloiloga. Ua molia o ia e le malo i le moliaga o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o vaega o le laau faasaina o le mariuana, o solitulafono mamafa ia e mafai ona faasala ai se tasi i le toese mai le 5 e oo atu i le10 tausaga, pe faasala i le salatupe e le sili atu i le $20,000, poo le faasala foi i faasalaga uma ia e lua.

O lo o molia fo’i Fotu i moliaga e 3 o le talepe fale i le tulaga muamua; 2 moliaga o le gaoi, o le vaega C lea o solitulafono mamafa, lea e mafai ona faasala ai se tasi si le Toese mo le umi e le silia i le 7 tausaga, pe faasala i le salatupe e le silia i le $5,000, pe faasala fo’i i faasalaga uma ia e lua.

O le vaiaso fou lea ua faatulaga e faia ai le ulua’i iloiloga o lenei mataupu. 

E $15,000 le vaega tupe lea ua fa’atulaga e tatala ai i tua le ua molia. Afai ae tatala o ia i tua, e le mafai ona ia toe taumafai e faafesootai molimau a le malo e aofia ai lona taufafine ma le alii na aafia, e le mafai fo’i ona ia taumafai e tuua faamalosi le atunu’u, a ia avea o ia ma tagatanu’u lelei e tausisi i soo se tulafono a le malo, ma ia auai i soo se taimi e faatulaga ai aso ma taimi o ana iloiloga.

O le tausaga e 2019 na ta’usala ai e le Fa’amasinoga Faaitumalo ia Fotu i le solitulafono mama o le gaoi ma le faaleaga meatotino, ma faasala ai o ia i le faasalaga nofovaavaiaa e 12 masina. O le solitulafono na ta’usala ai Fotu na mafua mai ina ua ia osofaia se fale o se aiga i Taputimu e ala i le talepe o le faitoto’a tioata i le pito i luga ae gaoi lavalava ma seevae.