Loka e Leoleo i Uosigitone le ali’i na sola ese atu ma AS

O le ali’i sa avea ma Leoleo lea na sola ese atu ma Amerika Samoa i le tausaga na te’a nei, i le mae’a ai lea ona taofia o ia mo le 48 itula, e mafua mai i tu’uaiga o le umia fa’asolitulafono o fualaau faasaina, ua taua mai i ripoti le pu’e fa’apagota o ia e Leoleo i le Setete o Uosigitone, e mafua mai i tu’uaiga i lona fa’ao’olima lea i lona to’alua.

E tusa ai ma ni fa’amatalaga na maua mai e le Samoa News, o le ali’i o Steven Tuatoo na loka e Leoleo ona o tu’uaiga i lona fa’ao’olima i lona to’alua. O le aso 12 Aperila na te’a nei na taofia ai o ia i le falepuipui e taua o le Regional Justice Center Facility, ina ua mae’a lana ulua’i iloiloga i luma o le Fa’amasinoga Maualuga i King County i Seattle i Uosigitone lava.

E $185,000 le tupe lea ua fa’atulaga e tatala ai o ia i tua, ma e le o mautinoa mai i le taimi nei pe ua mafai ona totogi e Tuatoo lea tupe e tatala ai o ia i tua.

E le i finagalo le Sui Konesina o Leoleo, le afioga i le Matua ia Falana’ipupu Taase Sagapolutele e talanoa mai i le Samoa News, ina ua fesiligia o ia e uiga i lenei mataupu. Ae na taua e se molimau fa’atuatuaina e fa’apea, ua mae’a ona logoina le Ofisa o Leoleo i Amerika Samoa nei e tusa ai o le mataupu e pei ona taofia ai Tuatoo i Uosigitone.

E o o mai i le taimi nei, e le manino mai pe ua i ai ni fesootaiga a le Ofisa o Leoleo a le atunu’u atoa ai ma le ofisa o Leoleo i Uosigitone, mo le faia o ni auala e mafai ai ona toe auina mai Tuatoo e tali i moliaga fa’asaga ia te ia.

Ae na taua e le Komesina o Leoleo ia Le’i Sonny Thompson i le Samoa News i le amataga o le tausaga nei e fa’apea, o ripoti ua latou maua o lo o taua ai le vaaia o Tuatoo i le setete o Uosigitone. Sa ia taua atili i le Samoa News i lea feiloaiga e fa’apea, o lo o galulue soosoo tauau pea le Ofisa o Leoleo a le atunu’u atoa ai ma ofisa o leoleo i Amerika, atoa ai ma le vaega a le Feterale, e saili se auala e mafai ai ona toe vave fa’afo’i mai lenei ali’i i le atunu’u, ina ia fa’aauau ai le fa’agasoloina o le tagi fa’asaga ia te ia.

O Tuatoo e to’atolu i ai ali’i na pu’e fa’apagota e Leoleo, ina ua osofaia ni nofoaga se 3 i le masina o Novema o le tausaga na te’a nei. O isi e to’alua e aofia ai Cody Christian Woods lea na pu’e fa’apagota mai i Taputimu, ma Taisia Lemalie, o se ave taxi na pu’e fa’apagota i luga o le auala. O Tuatoo na pu’e fa’apagota mai i lona fale i Alofau.

I lea osofaiga a Leoleo, na maua ai se vaega tele o fualaau fa’asaina e aofia ai le pauta o le aisa ma le mariuana.

E pei ona taua e Leoleo e fa’apea, o le vaega o le aisa sa maua e tusa ma le $50,000 e oo atu i le $55,000 lona tau aofa’i pe a fa’atau atu i tagata lautele, ae o le mariuana e tusa lona tau i le va o le $20,000 ma le $25,000 pe a fa’atau atu.

O isi mea na maua e Leoleo i lea osofaiga e aofia ai fana e 3, le ituaiga o le 12 gauge, o le 357 ma le ituaiga o le pellet gun. O nei fana uma sa tutumu uma i pulu fana i le taimi na maua ai e Leoleo. Sa faapea fo’i ona maua e Leoleo pulu fana e 144 mo le ituaiga fana o le 357, atoa ai ma le tele o meatotino sa ave fa’agaoi mai nofoaga eseese.

E ese mai i fualaau fa’asaina ma fana, sa maua ai fo’i e Leoleo le tinoitupe e $54,003 mai le fale o Woods i Taputimu, e ese mai i le tupe e $459 sa maua i lona tino.

Ina ua mae’a ona pu’e fa’apagota e Leoleo i latou nei, sa auina atu loa i latou ma taofia i le toese i Tafuna, e fa’atali ai le taimi e faila ai moliaga fa’asaga ia te i latou. O le mae’a ai o le 48 itula na taofia ai Tuatoo i le toese i Tafuna, na tatala ai loa o ia i tua. Na taua e se molimau fa’atuatuaina lava i le Samoa News, o le taeao lava lea na tatala mai ai Tuatoo mai tua i le toese, na ia tuua ai loa ma Amerika Samoa i le taimi lava lea.

E na o Woods ma Lemalie na faila e le malo a laua moliaga, ma tutula’i ai loa i luma o le fa’amasinoga.

O Woods o lo o tuuaia i moliaga eseese e aofia ai le umia o fualaau fa’asaina, ae o Lemalie e na o le tasi le moliaga o le umia fa’asolitulafono o mariuana o lo o tuuaia ai o ia. E $200,000 le tupe lea ua faatulaga e tatala ai Woods i tua, ae $5,000 mo Lemalie.

O le masina na te’a nei na toe valaau ai le mataupu a Woods i luma o le fa’amasinoga maualuga, ma fa’ailoa ai lana loia le fa’aauau pea lea o feutanaiga o lo o latou faia ma le malo, mo se maliliega aufa’atasi e fa’amuta ai le mataupu faasaga ia Woods.

Ae mo Lemalie, o lo o taofia pea o ia i le toese e fa’atali ai le aso lea ua fa’atulaga e faia ai lana fa’amasinoga autu, ina ua ia teena le ofa sa tuuina atu e le malo ia te ia.