Loka e Leoleo i le faaoolima ae maua ai fualaau faasaina

Pago Pago, AMERIKA SAMOA

O le ali’i lea na tau saili mai e Leoleo mo le tele o masina i lona faaoo lea o manu’a tuga i se isi ali’i i Happy Valley, ua molia nei i lona umia faasolitulafono o fualaau faasaina, ina ua taofi e Leoleo lana ta’avale i le solitulafono i luga o le alatele ae maua ai fualaau faasaina.

O le ali’i na pu’e faapagota e Leoleo, o le susuga lea a Lafitaga Unasa.

E pei ona taua e le malo i le latou tagi e faapea, o le po o le aso 20 o Aokuso 2020 na maua ai e le Ofisa o Leoleo i Tafuna se telefoni mai se Tama i Iliili, i lona mana’omia lea o se fesoasoani a Leoleo, ona o se ali’i o loo taatia i luma o lona fale o loo aafia lona tino i ni manu’a tuga.

E to’atele Leoleo na tali atu i le valaau ma latou maua atu ai se tagata o loo taatia i luma o se fale i Iliili o loo manu’a lona itu faapea ai ona foliga o loo lilo i le toto. Na molimauina e Leoleo tulaga matuia o manu’a na aafia ai le alii na taatia i luga o le mutia, e le o gaioi lona tino e le o mafai fo’i ona tali mai o ia i fesili a Leoleo.

Talu ai le tulaga matuia o manu’a na aafia ai le tino o le ali’i na aafia, na talosagaina ai loa e Leoleo le fesoasoani a le EMS ma faanatinati atu ai loa le ali’i na manu’a i le Falema’i o le LBJ i Faga’alu mo togafitiga, ae aga’i atu loa Leoleo e amata ona saili ni a latou molimau e tusa ai o lenei faalavelave.

Na taua e le Tama na vili i Leoleo e faapea, e to’alua alii na o atu i lona fale i le afiafi lea, o le alii na manu’a atoa ai ma le alii ua sola ese, o ia lea o Lafitaga Unasa, le ua molia i lenei mataupu. 

Na aga’i Leoleo i le fale o Unasa ma le faamoemoe e tatau ona maua atu ai le ua molia peita’i na faailoa e lana uo tamaitai i Leoleo, e le i oo atu lava Unasa talu mai le afiafi na o ai ma ana uo e tafafao, e le iloa fo’i poo fea na o aga’i i ai ma ana uo.

Na malie le uo tamaitai a Unasa e ulufale Leoleo i totonu o le fale e saili potu pe maua ai le ua molia. Na mae’a ona sailia e Leoleo totonu o le fale ae lei maua ai Unasa. E toe siaki faalua e Leoleo le fale o Unasa ma lana uo tamaitai i le po ma le vaveao na sosoo ai peita’i e le i maua lava se isi. 

Na toe asia fo’i e Leoleo le fale i le vaiaso atoa na sosoo ai peita’i ua le iloa poo fea ua sola aga’i i ai Unasa. 

Na maua le avanoa e fesiligia ai e Leoleo ni isi o molimau e tusa ai o lenei faalavelave. Na taua e se tasi o molimau faatuatuaina i Leoleo e faapea, o le alii na manu’a faapea ai ma le alii o Unasa, e aafia i laua i le tulei atoa ai ma le faatau atu o fualaau faasaina i totonu o le nu’u. O le afiafi na tula’i mai ai le faalavelave, na faia ai se inugapia i le fale o Unasa, lea na i ai Unasa ma le alii ua manu’a. 

O le mae’a ai o le inugapia, na malaga mai ai loa Unasa ma le alii ua manu’a e fia talanoa i se tasi o a laua uo e nofo i le fale lea na tupu ai le faalavealve.

E to’alua isi molimau na fesiligia e Leoleo. Na taua e le molimau muamua e faapea, e fetaui lava le sauni e alu i lona potu e moe ae faalogo loa ua tu’itu’i mai se tagata i le faitoto’a o le fale. 

Na tula’i le molimau muamua a le malo ma savali i luma i le faitoto’a o le fale ma tatala, ma ia vaaia ai Unasa ma le ali’i ua manu’a o loo tutu i fafo o le fale. Na fesili Unasa i le molimau muamua a le malo pe maua atu le ali’i o F.P, o le tausoga lea a le molimau muamua a le malo. 

Na savali le molimau muamua i le potu a lona tausoga ma ta’u i ai Unasa ma le alii ua manu’a o loo i fafo o le fale na o atu ia te ia. 

Na savali mai le tausoga a le molimau muamu a le malo, o ia lea o F.P, lea o loo taua i faamaumauga a le Faamasinoga, o le molimau lona lua lea a le malo ma ia vaaia Unasa ma le ali’i ua manu’a o loo tutu i luma o le faitoto’a o lona fale. 

Na fesili F.P i le ali’i ua manu’a i le mafua’aga ua alu atu ai ma avatu Unasa i lona fale. Na faailoa atili e F.P i le alii ua manu’a, e le mana’o e ulufale Unasa i totonu o lona fale, ae sili ai pe a la o ese ma le fanua manu na te lei faafesootaia Leoleo.

Na avea le tala lea a F.P ma itu na ita ai Unasa ma ia tu’i ina loa ia F.P peita’i na misi lana tu’i ma maua ai le avanoa o F.P e oso ai i totonu o lona fale ma tapuni loa le faitoto’a. O le taimi lea na faliu atu ai loa ma Unasa i le ali’i na manu’a ma fesili i ai i le mafua’aga na le fai sa’o ai ia F.P e faatatau i le tupe na la o mai e avatu.

Na umi se taimi o fai finauga a Unasa ma le ali’i na manu’a ma faafuase’i ai loa ona tu’i e Unasa le ali’i na manu’a ma palasi ai i lalo. Na fa’aauau gaioiga a Unasa e ala i lona ta tu’i ma ta kiki le alii na manu’a ao taatia i luga o le mutia. 

Na taua e F.P i Leoleo lona iloa o le taimi na se’i ai e Unasa le tamaitai na nana i le pito i tua o lona papatua ma ta tui ai loa le itu o le alii na manu’a ma ia vaaia ai loa le taafiti solo o le alii na manu’a ae o loo faaauau pea ona ta tui e Unasa.

Na vave le oso mai i fafo o F.P ma le faamoemoe na te taina Unasa i le au u’amea o le pulumu sa taatia i fafo o le fale, peita’i na vave le tu i luga o Unasa ma alu i le atoa. O le taimi lea na vili ai loa e F.P Leoleo mo se fesoasoani. 

E 3 aso na taofia ai le alii na manu’a i le falema’i i Faga’alu faatoa te’a ai loa o ia i tua, ma maua ai loa le avanoa o Leoleo e fesiligia ai o ia. 

Na taua e le ali’i na manu’a i Leoleo e faapea, ina ua mae’a le la inugapia ma Unasa, na mana’o ai loa Unasa la te o i le fale o F.P e piki mai le la tupe na aitalafu e F.P, peita’i la te o atu ia F.P ae faasaga mai F.P tuli ese laua ma le fale ma lona fanua. 

Na musumusu atu Unasa ia te ia la te fasia F.P ina ua le totogia atua le la tupe peita’i na la finau ma Unasa ma ia fai i ai, e sili pe a le toe fo’i se’i oo i le aso e sosoo ai. O le ita o Unasa ia F.P faapea ai ma lona ova o lona ‘ona na mafua ai loa ona faaoolima Unasa ia te ia. 

Na taua e le ali’i na manu’a lona iloa lelei o le taimi na ta tui ai o ia e Unasa i le tamai naifi peita’i ua faigata sana gaioiga ona ua ova lona ‘ona ma ua faigata fo’i ona ia tete’e atu i gaioiga a Unasa.

Talu mai le faalavelave i le masina o Aokuso o le tausaga nei, ua fiu Leoleo e saili Unasa ua le maua poo fea ua sola aga’i ai o ia. Ae i le masina na te’a nei, na taofi ai e Leoleo se taavale i luga o le alatele i Malaeimi i le ova o maila faatulafonoina na alu ai lea taavale. 

Na taofi e Leoleo le taavale ma iloa ai e na o le toatasi lava le alii o loo i totonu o le ta’avale, o ia fo’i lea o le ave ta’avale. Na iloa mulimuli ane e Leoleo, o le ave taavale, o ia lea o Unasa, le alii o loo tau sailia i le faalavelave na tula’i mai i le masina o Aokuso o le tausaga nei. 

Talu ai e leai se laisene ave taavale a Unasa na i ai, na mafua ai loa ona taofia o ia e Leoleo faatasi ai ma lana taavale. A o le i auina atu Unasa i le Ofisa o Leoleo i Tafuna, na siaki e Leoleo lona tino mo ni aupega poo ni fualaau faasaina. 

Ina ua saili e Leoleo le ofu o Unasa na laei, sa latou maua i ai ni paipa tioata se 2 o loo i ai vaega o le pauta faasaina o le aisa i totonu o le taga taumatau o lona ofu sa fai. Na faaauau le sailiga a Leoleo i totonu o le taavale a Unasa ma latou maua ai se pepa iila sa i ai lau mamago o le laau faasaina o le mariuana.

Na faia se suega i le pauta ma lau mamago na maua ia Unasa ma lana taavale ma faamaonia ai, o vaega ia o le pauta faasaina o le aisa faapea ai ma le laau faasaina o le maruana.

Ina ua fesiligia e Leoleo ia Unasa e tusa ai o le faalavelave na tula’i mai i le masina o Aokuso, na ta’utinoa ai le ua molia, e moni ma faamaonia tu’uaiga i lona faaaoga lea o se tamai naifi e faaoo ai manu’a i le alii na aafia. Na tu’uaia e Unasa lona ‘ona o le mafua’aga o lona faatinoina o le solitulafono. 

Ina ua fesiligia i fualaau faasaina na maua ia te ia ma totonu o lana taavale, na tali ioe fo’i Unasa i Leoleo, o fualaau faasaina na ia faatau mai i sana uo i Vaitogi ma le faamoemoe e fa’aaoga mo ia lava. 

O le masina na te’a nei na tula’i ai Unasa i luma o le Faamasinoga Faaitumalo.

E 2 tagi eseese ua faila e le malo faasaga ia te ia.

I le tagi muamua, ua tu’uaia ai o ia i le moliaga e tasi o le faaoolima i le tulaga muamua, o le vaega A o solitulafono mamafa, lea e mafai ona faasala ai se tasi i le Toese mai le 10 e oo atu i le 30 tausaga, poo le faasala foi i le Toese mo le olaga atoa.

I le tagi lona 2, ua molia ai Unasa i le moliaga o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le maruana.

E $50,000 lea ua faatulaga e tatala ai i tua le ua molia.