Lipotia mai atunu’u i fafo le gaoia o se fale i Ottoville

Pago Pago - AMERIKA SAMOA

O le po o Tesema 12. 2024, e pei ona ta’ua i fa’amaumauga a le faamasinoga, na fa’afeso’ota’i mai ai e se tamaitai e nofo i atunu’u i fafo ia le Ofisa a Leoleo i Tafuna e tusa ai ma le gaoia o lona fale i Ottoville.

Na agai atu leoleo i le nofoaga na tupu ai le faalavelave ma molimauina le pogisa o le fale ona ua tu’ua e le gaoi ia le fale.

O le fale a le tamaitai lea o lo’o fa’amautu i atunu’u i fafo, e siomia i se pa sima ae poloka le pito i luma i se filifili.  Na molimauina le vaneina o le faamalama pito tauagavale o le faitoto’a ma e foliga mai o iina na oso atu ai le gaoi.

Sa fa’atalanoaina e leoleo ia tuaoi ma maua mai ai le numera o le laisene a le taxi lea na alu ese atu mai i le fale, lea na iai ni alii se to’alua faatasi ma le ave taxi.

Na ta’ua e le tuaoi lona va’aia o se tasi o alii nei e to’atolu, o ia la’uina ni ato lavalava i totonu o le taxi, ae e na te le mautinoa po o a mea sa i totonu o ato lavalava.  Na le gata ina fa’amautuina e le tuaoi ia le ituaiga taavale ma lona lua, ae faapea foi le igoa se pipi’i i autafa o le taxi.

Sa fa’ailoa atu e le molimau/tuaoi, i leoleo, e alu ese atu loa le taxi, ae o latou taunu’u atu loa.

Na faapea loa ona agai ese atu leoleo mo le sailiga o le taxi e pei ona fa’amatalaina e le tuaoi.  Sa maua e leoleo ia le taxi i luma o se faleoloa i Fagaima.  Ma na fa’ailoa e le avetaxi i leoleo, le fa’ailoa atu e se tasi o alii na ia aveina i lana taxi, o le fale lea na latou o iai, o le fale a lona ‘uncle’ ma sa fa’ailoa atu e lona ‘uncle’ e alu e aumai ni meatotino mai totonu o le fale.

Sa faapea loa ona agai atu leoleo ma le avetaxi e fa’asino le fale sa ia momoli iai lana pasese.  Ina ua taunuu leoleo i le fale sa faasino iai e le avetaxi, na fa’amatalaina iai e le tina e ana le fale, le o’o atu o le susuga ia Faaiuga Tupuola (lea na molia) i lena afiafi ma fesiligia o ia pe na te fia fa’atauina se fale saina.  Ina ua fesiligia Tupuola po o ai e ana le fala, sa ia tali, o meatotino a lona ‘uncle’ lea e alu e aumai mai Mapusaga.

O le afiafi lena, na toe fo’i atu ai Tupuola ma seisi alii e suafa ia Tali Tauta, lea na ta’ua e le tina, e masani iai.  Sa ta’ua e le tina le fesiligia o ia e Tupuola pe mafai ona tu’u atu ia meatotino a lona ‘uncle’ ma o le a ia pikiina i se aso oi luma.

Na ta’ua foi e le molimau, le aisi atu o le na molia, ia se tupe e totogi ai lana taxi, lea na ia tu’uina iai le $25 ae na toe faapea atu le na molia, e le lava, ona e $45 le tau o le pasese.  Sa faapea ona toe tu’u iai e le molimau ia leisi $20.

Na fa’asino e le molimau i leoleo le fale e nofo ai Tauta, lea e latalata atu i lona fale ma na maua atu ai e leoleo ia Tauta i lona fale ma aveina ai o ia i le ofisa a leoleo mo le faatalanoaina.

I le faamatalaga a Tauta i leoleo, na alu atu Tupuola ma talosagaina lana fesoasoani i le la’uina mai o ni mea totino i totonu o se taxi.  Na musu Tauta ae peitai, sa tauanau pea o ia e Tupuola ona fai mai a ia, e mamafa ia meatotino o lo’o manaomia ona la’u.

Sa ta’ua e Tauta, ina ua o latou taunu’u i Ottoville, na tu’u Tupuola i luma o le fale, ae ona faatali atu i totonu o le taavale.  Ma na iai sona manatu, o lo’o pepelo ia Tupuola.  Ae e fa ato na tumu i taga aluga, ‘ie faamalama, solo ma ipu mata’eta’e sa la’uina i totonu o le taavale.  Ona o latou o lea i le fale ma ia fesoasoani ai i le la’uina i fafo o le uta.

Na mafai ona fa’amaonia e le avetaxi i leoleo, ia le faamatalaga a Tauta.

O le taeao o le aso 13 o Tesema na agai atu ai loa leoleo e saili ia Tupuola i lona fale.  Na mua’i feiloai ia leoleo ma le tuafafine a Tupuola ma na ia faailoa i leoleo ia le iai o Tupuola i totonu o le fale.  Sa fa’ailoa iai e le tuafafine a Tupuola i leoleo, e faatali atu i fafo ae o le a alu i totonu e fai ia Tupuola e sau i fafo.

Ae peitai, na fiu le tuafafine a Tupuola e tu’itu’i le potu a lona tuagane, ae peitai, e na te le’i tatalaina mai, ae o lo’o loka foi le faitoto’a.  Ona fa’aaoga lea e le tuafafine a Tupuola ia se mea e tatalaina ai le faitoto’a ae peitai, ina ua matala le faitoto’a, e leai se Tupuola na Ii totonu o le potu.

Ae ina ua fa’atagaina e le tuafafine a Tupuola ia leoleo e o i totonu o le potu, sa o latou mauaina atu Tupuola o lafi i lalo o lona moega.

Na aveina loa o ia e leoleo i le ofisa a leoleo mo le fa’aauauina o a latou su’esu’ega.  Ae peitai, sa musu le alii e fai sana faamatalaga i leoleo.  O lea na aveina atu ai loa o ia i le to’ese i Tafuna e loka ai, e fa’atalitali ai lana faamasinoga.

O le as 15 o Tesema, na faia ai se faamatalaga tusitusia a le ave taxi ma sa ia ta’ua ai le valaau atu o se tasi mai i Nuuuli mo se taxi, o lea na ia agai atu ai ma piki mai ni alii se to’alua mai luma o se faleoloa.  Ma na agai atu lana taavale ma lana pasese i le auala galue lea o lo’o i tafatafa o le kamupani a le Island’s Choice ma tu i luma o se fale i tua, ma la’uina mai ai e le tasi o lana pasese ia ie lavalava, o ipu, aluga ma palanikeke mai totonu o le fale o le na a’afia, i totonu o le taxi, ae fa’atali atu leisi alii i totonu o le taavale.

Mulimuli ane, na fa’apea loa ona o latou toe agai i le eria a Tago, ona alu lea o le tasi o alii na latou malaga faatasi atu (Tupuola), e talanoa i le aiga ma i lona toe fo’i mai i fafo, sa ia fa’atonuina ai leisi alii (Tauta) e la’u atu ia ato i totonu o le fale o le aiga.

Sa ta’ua e le ave taxi, ina ua o latou aga’i ese mai i lena eria, sa toe faatu le taxi e piki ai se tamaitai i luga o le auala ma ave o ia i le faleoloa.  Ae e le’i oso i fafo le tamaitai, na ia fesiligia e le tamaitai ia le uta na la’uina i totonu o le fale.

Na fa’ailoa atu e le ave taxi i leole, o le tamaitai lea na latou pikiina, o le tuafafine a Tupuola ma sa ia fa’ailoa atu, o lona tuagane o se gaoi ma o lo’o latou manana’o e loka o ia.

O le tamaitai lea na gaoia lona fale, sa avea ma leoleo ma sa ia ta’ua e faapea, o le fale na gaoia, o le fale a ona matua, ae ua maliliu uma i la’ua ae o ia lea o lo’o va’ava’aia le fale.  Ma na ta’ua e le tamaitai na a’afia, o ia o lo’o fa’amautu i atunu’u i fafo ma lana fanau, ae o lo’o iai se tagata, e masani ona alu e asi le fale.

Na ia ta’ua foi le leai o ni mea pu’eata o leoleoina ai le fale ae na ia maua le tala e tusa ai ma le gaoia o lona fale, ona o ona tuaoi, lea na molimauina le faalavelave.

Sa molia Tupuola i le Faomea i lona tulaga e lua ma le Gaoi.  O nei moliaga, o ni vaega ‘C’ i soligatulafono mamafa ma e mafai ona nofosala ai i le falepuipui i le ta’i 7 tausaga, po o se sala tupe e ta’i $5,000 (ae o le moliaga o le Gaoi e mafai ona o’o i le $20,000); po o faasalaga uma e lua.

E $30,000 se vaegatupe na fa’atulagaina e tatalaina ai le na molia, e faatalitali ai lona faamasinoga.