Lipotia e se fafine lona to’alua i le fa’asaua

Pago Pago - AMERIKA SAMOA

Ua lokaina nei i le to’ese ia se alii ua molia i le Faatupu Vevesi i totonu o aiga, Fa’ao’olima ma le faia o se tulaga e ono a’afia ai le saogalemu o se tamaitiiti/teineitiiti, ona o se fa’alavelave na tula’i mai i lona aiga i Petesa i le aso 8 o Ianuari, 2024.

(O le a le ta’ua suafa o i la’ua o lo o a’afia i lenei mataupu, ona o le puipuiga i fanau iti).

E tusa ai ma faamaumauga a leoleo, o lo o ta’ua ai e faapea, o le 9:30 i le taeao o le aso 8 o Ianuari, 2024, na fa’afeso’ota’i ai e se tina ia le ofisa a leoleo ma se lipoti e faapea, ua sasa o ia e lona to’alua i le ‘au o se pulumu salu fale, ae o lo o si’i si ana pepe e 11 masina.

Ina ua taunu’u leoleo i Petesa, i le aiga o le tina lea na valaau i le ofisa a leoleo, sa feiloai ai ma lenei tina ma na ia faamatalaina i leoleo, le tula’i mai o se pisa i le va o ia ma lona to’alua, ina ua to’atama’i le tama o le aiga, i le fiu e su’e ni ona lavalava mo le galuega i lena taeao.

Sa faamatala e lenei tina, ina ua ia taumafai e a’apa atu i se uila sa i totonu o le umukuka o le la fale, ae pa’u i lalo le uila, na avea lea ma tulaga na atili ai ona faateteleina le le fiafia o lona to’alua, ma ia taumafai e ta o ia i se meata’alo a se tasi o a la alo matua.  Ona tago lea o lona to’alua ma u’u mai le pulumu salu fale, ma fa’aaoga e sasa ai lona papatua, ma ona o le tiga o lona papatua, na pa’u ai i lalo, ae o le taimi lea o lo o ia si’i le la pepe 11 masina.

Sa ta’ua e lenei tina, e faapea, e le o se taimi muamua lea ua tupu ai se mea faapea, i le va o ia ma lona to’alua.  Sa faamatala e le tina se tasi foi o taimi na o la vevesi ai ma lona to’alua i le tausaga ua mavae, ma i le ita tele o lona toalua, sa ia u’umau ai le la pepe ma o’omi o ia.

O lo o ta’ua foi i faamaumauga a leoleo le le’i iai o le to’alua a lenei tina, i le fale, ina ua taunu’u leoleo, ona ua usu i galuega i Tafuna.

Sa faapea loa ona agai atu leoleo i le fale faigaluega a le tamaloa, ae ina ua taunu’u atu leoleo, sa faailoa ifo iai e le aufaigaluega, o lo o alu le tamaloa e ave sana kiliva.  Ae o lona toe taliu mai i le kamupani, na faapea loa ona lokaina mai ai o ia e leoleo ma aveina atu loa i le ofisa a leoleo i Tafuna mo su’esu’ega.

Sa faamatala e le ua molia e faapea, sa le fiafia o ia i lona to’alua ona ua tuai i lana galuega, ona ua fiu e saili sona la’ei mama, ae fai atu lona to’alua, e na te le toe faia sana tagamea.  Ma ina ua ia taumafai e oso i luga o lana uila vili vae e agai mai i le galuega, sa taofi ai e lona to’alua ia ia, ma faatonu o ia e aua le fa’aaogaina le uila ae savali i lana galuega.  Ma ina ua pa’u le uila, sa ia a’apa atu ai loa i le pulumu ma ta ai le papatua a lona to’alua.

Ua molia nei lenei alii i moliaga o le Faatupu Vevesi i totonu o aiga, lea e mafai ona faafalepuipui ai se tasi i le o’o atu i le tausaga e tasi (1), po o se sala tupe e $1,000; po o fa’asalaga uma e lua. 

Ae le gata i lea ua molia foi lenei tamaloa i le Fa’ao’olima i lona tulaga e tolu, lea e mafai ona nofosala ai se tasi i le falepuipui, i le o’o atu i le tausaga e tasi (1), po o se sala tupe e $1,000; po o fa’asalaga uma e lua.

Faapea ai ma le moliaga, o le faia o se tulaga e ono a’afia ai le saogalemu o se tamaitiiti/teineitiiti, lea e mafai ona nofosala ai se tasi i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

E $1,000 le tinoitupe faatulagaina e mafai ona tatala ai i tua le ua molia, e faatali ai lona faamasinoga.