LIPOTI LATA MAI: Le fa’aaogaina e le Malo ia tupe lotoifale e totogi ai pili a le Medicaid

Pago Pago - AMERIKA SAMOA

O Mati 1, 2024 na taofia ai tautua uma a le ASMSA (American Samoa Medicaid State Agency), ina ua fa’amae’aina vaegatupe lotoifale e totogi ai, ae e foliga mai ua o’o lava i pili a le Medicaid e tatau ona totogi i vaegatupe lotoifale (local match funds) ua mae’a ona vaea i totonu o tala o le tupe a le malo (accounting system), e le o totogia.

E tusa ai ma se lipoti ua o’o mai i le Samoa News, e lua ni pili a le ASMSA  na te’ena lata mai nei, mo le aveina o ni gasegase (medivac) i Niu Sila, ona o pili e le i totogia.  O pili ia sa tatau ona totogia i tupe lotoifale mo le Medicaid.

Sa ta’ua le totogia e le malo o pili Medicaid i tupe feterale, ae le aofia ai pili e tatau ona totogi i tupe lotoifale, e pei o gasegase e ave i fafo ona o gasegase faafuasei (medivac).

O se tasi o nei ‘medivac’ sa talosagaina mo se tagata matua, ae o leisi, e mo se tamaititi/teineititi, e tusa ai ma lipoti ua o’o mai i le Samoa News.

Sa fa’afeso’ota’i e le Samoa News ia le Ofisa o le Kovana ma le ASMSA mo se faamatalaga e tusa ai ma lenei lipoti.

Sa lipotia e le Samoa News i le amataga o le masina ia le faafitauli tula’i mai i vaegatupe lotoifale mo le Medicaid, ina ua taulimaina kopi o tusi (memo) sa fa’ao’oina atu e le Faatonusili a le ASMSA, ia Sandra King Young, i le afioga i le Kovana Lemanu P. S. Mauga ma le Lutena Kovana, Talauega E. V. Ale.

O le tusi muamua sa tusia ia Ianuari 16, 2024, lea na fa’ailoa atu ai i taitai o le malo, le fa’amae’aina o vaegatupe lotoifale (local match) i le faaiuga o le kuata lua o le tausaga faaletupe (FY 2024) ia Mati 31, 2024.

O le taimi lea na talosagaina ai e le ofisa Medicaid ia se tupe fa’aopoopo, mo se iugafono faaopoopo, e fa’aauau ai le latou polokalama, e o’o atu i le faaiuga o le tausaga faaletupe o le 2024.  E $6 miliona le tupe fa’aopoopo sa talosagaina e le faatonusili a le ASMSA.

O Fepuari 16, 2024 na toe auina atu ai e le Medicaid sa latou talosaga lona lua i ta’ita’i o le malo, ma fa’ailoa atu ai le faamutaina uma o tautua a le Medicaid, ia Mati 1, 2024 – e ui ina sa ta’ua muamua, e faamutaina lenei tautua ia Aperila 1, 2024.

Sa fa’ailoa atu foi e King Young, i taitai o le Malo, ona ua toe $200,000 le tupe lotoifale (local matching funds) o totoe mo le kuata muamua ma le kuata lua, o le tausaga faaletupe 2024, ma le $1 miliona o totoe mo le Matagaluega o Tupe ma Paketi, o le a faapea ona faamutaina uma tautua a le Medicaid ia Mati 1, 2024.

Na ta’ua foi e King Young, e tusa ai ma tulafono a le malo, e le mafai ona sili atu le fa’aaoga a se Ofisa po o se Matagaluega, nai lo a latou tupe fa’asoasoa, ma o le tupe faasoasoa a le Medicaid mo le tausaga faaletupe 2024, e $4 miliona.

Ma ua mae’a ona fa’aaogaina e le ASMSA ia le $3 miliona, ae ua toe o le $1 miliona o lo’o totoe mo lenei tausaga faaletupe, lea na ta’ua e King Young, e tasi a le masina e fa’aaoga ai, pe a fuafua atu i le tupe fa’aalu ua iai nei.

O le $1 miliona lea o lo’o talitonu le Samoa News, ua mae’a ona fa’asoasoa i totonu o faamaumauga a le malo (ASG system), ae e le o fa’aaogaina e totogi ai pili i atunu’u i fafo.

Na ta’ua foi e King Young i lana tusi i taitai o le faigamalo, o le a fa’aauau pea ona totogi e le ASMSA ia pili mo gasegase o lo’o faia a latou talavai i le taimi nei ma i latou o lo’o fa’agasolo a latou pepa mo le malaga atu i fafo mo a latou talavai.