Lipoti fa’apitoa mai le Ofisa o le Loia Sili - ta’aloga fa’ameaalofa tupe

Pago Pago, AMERIKA SAMOA

Ia utagia maia le faasalalauga lenei mai le Ofisa o le Loia Sili o lo’o va’ava’alua ma le Ofisa o le Puipuiga o Saogalemu o Tagata Lautele ona o ripoti i taaloga faameaalofa tupe o lo’o fa’atupulaia i totonu o Amerika Samoa nei. 

O nei taaloga faameaalofa tupe tafatolu o lo’o faasalalauina i upega tafailagi e pei ole Facebook ma o lo’o taufa’asese mai i tagata e fa’apea e mauaina se tinoitupe e $4,000 pe a uma ona totogiina le resitala $500 atoa ai ma tagata fa’aopoopo ile tafatolu lea. 

E taua tele le nofo malamalama i taaloga faapenei ina ia laveaina mai ai uo ma aiga ile auai i totonu o nei faalapotopotoga. O folafolaga e faia e malie ile faalogo ae e o’o ile ma’imau o le tupe. E toatele lava tagata ole atunu’u ua lavevea ai ma ma’imau ai latou tupe. 

O nei taaloga faameaalofa tupe fa’atafatolu e faaigoaina o Ponzi Schemes; o le tagata o lo’o pito i luga o le tafatolu e mauaina le tupe tele ona faasolo mai ai laia i lalo ifo ma la’ititi ai le tupe maua. 

O le polomisi taufaasese e faapea e tele lava se tinoitpe e maua mai ise taimi pu’upu’u. O tupe resitala mai tagata fou e alu sa’o lava i le ua pito i luga e penefiti ai o ia ona faatavale ai pea laia o faamealofaina o tupe i totonu o le tafatolu. 

So’o se tagata fou lava ua iai i totonu o le faalapotopotoga po ole tafatolu, e avatu ma nisi tagata toalua e ta’ua o vae. E faamoemoe le lelei o le nei taaloga i le toatele o tagata fou e aumai totonu faatasi ma o latou vae. E o’o loa ina leai ni tagata fou e toe auai, ua leai foi ma se tupe toe sau totonu ona pau lea o le tafatolu. 

O tagata uma o lo’o faatautaia lenei taaloga faamealofa tupe ma e ua maua mai tupe i lalo o lenei tafatolu o le a su’esu’eina i latou i lalo o le tulafono ASCA 46.4129, vasega C ona o faiga taufasese