LEMANU: “Amerika Samoa, ia mau pea le faatuatua i le Atua”

Pago Pago - AMERIKA SAMOA

I le saunoaga a le afioga i le ali’i Kovana Sili o Amerika Samoa i se fonotaga ma Tusitala, faapea ai le Komiti Faapitoa o le KOVITI-19 i le amataga o le vaiaso nei, na fesiligia ai e le afioga a Lemanu Peleti Palepoi Sialega Mauga le avea ai o Amerika Samoa ma atunu’u e faavae lona malo i le Atua, atoa ai ma le soifuaga faa Kerisiano o lo o soifua ma ola ai tagata i aso fai soo.

E mafua lea tulaga ona o le talitonuga o le ali’i Kovana, e tutupu loa faafitauli ona amata loa lea ona fesiligia e le atunu’u le ta’ita’iga a le Atua i ona tagata.

“Ua maitauina pea le atunuu pele e, e o o mai loa faafitauli ma tulaga pagatia i la tatou folauga, ona vaaia loa lea o le popole ma le fememea’i o le atunu’u, ma ua fesiligia ai lo tatou ola faatuatua,” o le saunoaga lea a Lemanu sa faasalalauina i luga o le Alaata a le KVZK-TV i le taeao o le aso Gafua o le vaiaso nei.

Sa ia taua e faapea, o Amerika Samoa e faavae i le Atua, e i ai fo’i le talitonuga e le o tu’u lafoaina e le Atua le atunu’u faapea le lalolagi atoa.

Na faafetai le alii Kovana i le tapuaiga mau a le atunu’u atoa ai ma talosaga momoli i le Atua i aso taitasi e tapuaia ai faiva a ona ta’ita’i, a o galulue ai e faia gaioiga uma e puipuia mai ai le atunu’u mai le pipisi o lenei faama’i.

Sa ia faamalulu foi i le atunu’u pe afai ua i ai se lape o le tautua a le malo ma ona ta’ita’i. I le talitonuga o le alii Kovana, e faigata ona faamalie lagona ma finagalo o tagata taitoatasi, ae o lo o galulue pea taitai e fai le mea sili mo le manuia o tagata uma.

FAAAUAU LE FAAILO MUMU MO LE ISI VAIASO

Ua a’e se tofa i le malo e toe faaauau le i ai pea o le atunu’u i lalo o le Faailo o le Lanu Mumu mo le isi vaiaso, e amata atu i le aso Lua o le vaiaso nei e oo atu i le aso Lua o le vaiaso fou, (aso 9 - 15 o Mati), ae o lo o tumau pea ona i ai le atunu’u i le Taofia ai o fuafuaga uma (lockdown) seia aulia le aso Faraile, aso 1 o Aperila.

O lea fuafuaga e pei ona saunoa Lemanu, na faavae mai lea i le tulaga o lo o maitauina ai le aga’i pea i luga o le aofa’i o le atunu’u ua faamaonia le aafia i lenei faama’i.

(I le aso Gafua na te’a nei i le taimi na fai ai le saunoaga lenei a le alii Kovana, e to’a 229 le aofa’i o i latou ua faamaonia le aafia i le faama’i. Ae o le aso ananafi, Mati 7, na faamaonia ai le isi to’a 49 o i latou ua maua i le faama’i, ma tula’i mai ai loa le aofa’i o i latou ua aafia i le 291).

Na faamanino e Lemanu nisi o suiga laiti ua faamoemoe e faia i lenei vaiaso, a o aga’i atu ai pea le atunu’u i le Faailo o le Lanu Mumu. O ia suiga laiti na mafai ona faamaonia mai e le afioga i le Loia Sili o le malo i lana saunoaga na sosoo ai.

Ae o se tala fiafia mo Amerika Samoa e pei ona saunoa le alii Kovana, o lea ua taunu’u i fanua sui o le Vaega a le Feterale e gafa ma galuega Fesoasoani (FEMA), mo le tuuina mai o le latou tau’au e fesoasoani ma lagolagosua ai i le aufaigaluega o lo o gafa ma le faatautaia o tui puipui mo le KOVITI-19, atoa ai ma le faia o suega mo le Fa’ama’i.

O lo o malaga faatasi mai sui o le FEMA ma sui o isi lala o le Malo Feterale e fesootai la latou auaunaga i tulaga o le pagatia e pei ona i ai Amerika Samoa.

TUI O LE BOOSTER

O lo o faagasolo pea lava i le taimi le faia o le tui lona tolu o le booster i nofoaga eseese i le atunu’u. O lo o faaauau pea fautauga ma lapataiga i le atunu’u atoa ina ia aga’i i nofoaga eseese nei mo le faia o a latou tui ina ia mautinoa ai le puipuia o le atunu’u mai le faama’i.

O le vaiaso nei o lo o faagasolo ai le tui o le booster i nofoaga eseese e 3 i le atunu’u e aofia ai le Fale Taalo o Tupulaga i Pago Pago (DWYA) ma le Maota o le Ekalesia Katoliko i Leone, lea e tatala mai i le itula e 8:00 i le taeao ae tapuni i le itula e 2:00 i le aoauli.

O le nofoaga lona tolu, o le Fale Taalo o Tupulaga Talavou i Tafuna (DWYA), lea e tatala i le itula e 8:00 i le taeao ae tapuni i le itula e 4:00 i le afiafi.

O loo faagasolo tui mo le booster i nofoaga nei mai le aso Lua e oo atu i le aso Faraile o le vaiaso nei.

Ua oo atu nei i le 80.7% le aofa’i o le faitau aofa’i o le atunuu ua mae’a ona faia tui e 2, ae o lo o fautuaina malosi pea lava le atunu’u ina ia aga’i e fai le tui lona tolu o le booster.

FEAU MO I LATOU E LE O FAIA TUI

Na faaaoga fo’i e le alii Kovana le avanoa e momoli ai se feau taua mo ni isi o le atunu’u ua latou filifili e le faia ni o latou tui.

Saunoa Lemanu e faapea, o lo o i ai pea lava nisi o le atunuu e le o manana’o e fai ni o latou tui.

“Atonu e sa’o oe i lou talitonuga, ae o le fesili, o fea o i ai le alofa,” o le saunoaga lea a le alii kovana.

“O se alofa lena. O e silasila i aiga ma le atunu’u ua pagatia. Atonu foi e te tete’e ma faalaua’itele solo ou manatu i lea tulaga, ae ou te lagona, o lena e te finau lava oe mo oe, ae e te le o vaavaai lautele i le atunu’u ma lou aiga. O fea o i ai le alofa,” o le saunoaga lea a le afioga a Lemanu.

“Amerika Samoa, o le faama’i ua pipisi, o se. lagona vaivai, ua tatau ona tatou silasila i lau pito laau tauave, atoa ai ma lou silasila mai fo’i i le pito laau tauave a le malo. Ia tatou soifua fiafia ma soifua maloloina. E talosaga atu, e mana’omia lau lagolago Amerika Samoa.”

Na talosagaina fo’i e le alii Kovana le atunu’u ina ia manatua Toa o Samoa o loo i tafa o taua atoa ai ma i latou o loo tautua i Vaega ‘Au Faaleoleo, ona o loo vevesi le lagolagi i lenei taimi i taua ma faama’i, ma e i ai le talitonuga e i ai le taimi e valaauina ai i latou e tautua i lea faamoemoe.

“Le atunuu e, o fea lava tatou te saili i ai, poo sasa’e, sisifo, o le upu a le at unu’u, a lutia i pu’ava ia mapu i Fagalele. O le to’a ma le manuia, o loo ia te oe, ae lavea’i mai le Atua i ona tagata,” o le faaiuga lea o le saunoaga a le alii Kovana.

SAUNOAGA A UIFAATALI AUMUA AMATA

Na maua foi le avanoa e tulei saunoa ai le afioga i le Tamaitai Faipule i le Laumua i Uosigitone, le Tofa a Uifaatali Aumua Amata e faaleo le agaga faafetai i Taitai o le malo ma le atunu’u atoa ona o le galuega fita o loo faatinoina i le taimi nei.

Sa ia taua le tulaga pagatia ua i ai Amerika Samoa, ae o loo maitauina pea le galulue soosoo tau’au o ona Ta’ita’i ma tagata uma e saili se fofo o le faafitauli.

Sa ia faalauiloa lona fiafia tele ina ua maua le avanoa e malaga faatasi mai ai ma sui o le FEMA atoa ai ma isi lala o le malo Feterale, e faatino la latou galuega fesoasoni i le atunu’u.

I lana saunoaga, sa ia ta’utino ai lona galue faamalosi pea e saili tulaga uma e manuia ai Amerika Samoa.

SUIGA LAITI O LE LANU MUMU

E i ai nai suiga laiti na taua e le afioga i le Loia Sili ia Fainuulelei Falefatu Alailima Utu i lana saunoaga, a o i ai le atunuu i le Faailo o le Lanu Mumu.

O ia suiga laiti e aofia ai le sui o le taimi e tapunia ai Pisinisi mai le itula e 4:00 i le afiafi i le itula e 6:00 i le afiafi. O le a i ai foi nisi o suiga mo galuega a le malo e moomia le faataunuu, ona o loo mana’omia e le toatele o le atunuu nisi o auaunaga a le malo.

O lo o faaauau pea le tapunia o aoga i le taimi nei, se’i vagana ai le faaaoga o aoaoga i luga o fesootaiga faaonaponei o lo o faaaogaina.

Mo le Kamupani i’a, ua i ai le faamoemoe o se taimi o i luma ona tuuina mai loa lea o se faaiuga a le malo e tusa ai o le talosaga a le kamupani mo le toe tatalaina o galuega.

Ua mae’a ona asia le nofoaga o loo i ai le kamupani i’a ma ua mae’a fo’i ona faia fautuaga i le auala e faatino ai galuega pe afai ae toe tatala galuega.