Leai se isi ua molia fa’alavelave na fana ai le ali’i Leoleo

I le lata i le 2 tausaga o fa’atalitali pea le mamalu o le atunu’u aemaise ai le aiga o le ali’i Leoleo ia Tine Loia, lea na manu’a i le fa’alavelave lea na fana ai e se tagata le ta’avale Leoleo sa malaga ai ma ni isi Leoleo i Leone i le masina o Tesema 2014, i se fa’aiuga o su’esu’ega a le Ofisa o Leoleo e uiga i lenei mataupu, o le taeao ananafi na fa’amaonia ai e le Loia a le malo i luma o le Fa’amasinoga Maualuga, le fa’aiuga ua faia e fa’atatau i lenei fa’alavelave, i le leai lea o se isi ua molia fa’asaga i lenei mataupu.

A o fa’agasolo le iloiloga fa’asaga i ali’i se to’afa o lo o tu’uaia i le tafanaina o le Ofisa o Leoleo i Leone i le po o le aso 1 Novema 2014, na taua ai e le ali’i loia ia Gerald Murphy o lo o tula’i mo itu a le malo e fa’apea, ua mae’a le su’esu’ega e uiga i lenei mataupu, e leai se isi ua molia fa’asaga i lenei solitulafono.

Na taua atili e Murphy i luma o le fa’amasinoga e fa’apea, o le to’atele o molimau sa fesiligia e le malo e uiga i lenei fa’alavelave ua latou tuua le atunu’u ma malaga atu i fafo, ma ua faigata ai i le malo ona saili ni mau fa’amaonia se tele e lagolago ai la latou mataupu.

E ui i le leai o se isi ua molia fa’asaga i lenei mataupu, peita’i na taua e Murphy i luma o le fa’amasinoga e fa’apea, o le ripoti a Leoleo e 144 itulau lea sa maua mai i le su’esu’eina o le mataupu fa’asaga i le fa’alavelave lea na manu’a ai le ali’i Leoleo ia Loia, o le a fa’aaoga e le malo i le fa’amasinoga autu o ali’i e to’afa ia o lo o tu’uaia i le tafanaina o le Ofisa o Leoleo i Leone.

O se tasi o le to’afa lea o lo o tu’uaia i le fa’alavelave lea na tafana ai le Ofisa o Leoleo i Leone, o lo o masalomia i le fa’alavelave lea na manu’a ai le ali’i Leoleo ia Loia, e pei ona taua e Murphy i lana fa’afinauga.

O le po o le aso 28 Tesema 2014 e pei ona taua i fa’amaumauga a Leoleo na tula’i mai ai le fa’alavelave na a’afia ai le ali’i Leoleo ia Loia, ma taofia ai o ia i le falema’i i Fagaalu mo togafitiga.

O manu’a na a’afia ai le ali’i Loia e pei ona taua e le Samoa News i se tasi o ana ripoti i le masina o Ianuari 2015, e aofia ai manu’a i se vaega o lona ao ma lona tino, lea na manu’a ina ua salalau i ai vaega o le pulu mai le fana sa fa’aaoga e fa’atino ai le fa’alavelave.

O ni isi o ia vaega o le pulu fana sa mafai ona aveese mai lona tino, ae o vaega o le pulu fana sa a’afia ai lona ao e le i mafai ona aveese i le falema’i i Faga’alu, na mafua ai loa ona auina atu o ia i Hawaii mo ni isi o togafitiga fa’aopoopo i le amataga o le masina o Ianuari 2015.

O le ogaoga o lenei fa’alavelave, na mafua ai ona fa’aleo e le afioga i le ali’i Kovana ia Lolo Matalasi Moliga sana talosaga i lana Kapaneta aemaise le Ofisa o Mataupu Tau Samoa, ina ia galulue ma Ali’i Mautofi o afioaga i Sisifo fa’apea ai ma le Ofisa o Leoleo, mo le tau sailia lea o ni fa’amatalaga e feso’ota’i ma le fa’alavelave sa tula’i mai.