Leai se fesoasoani tau tupe Ofisa CJPA mo le Ofisa o le Loia Fautua

A o taumafai ai le maota o sui e tau saili ni isi auala e fesoasoani ai i le Ofisa o le Loia Fautua mo Tagata Lautele i le itu tau tupe, na fa’amanino e le Fa’atonusili o le Ofisa e Puipuia Solitulafono i le atunu’u (CJPA) ia Keith Gebauer i se iloiloga sa fa’ataunu’uina i le taeao ananafi, le leai lea o se auala e mafai ai ona fesoasoani lona Ofisa i le Ofisa o le Loia Fautua.

I le tele ai o Ofisa eseese o le malo o lo o maua atu a latou fesoasoani tau tupe mai le Ofisa o le CJPA, na fa’amanino ai e Gebauer i luma o le Komiti o Mataupu Tau Fa’amasinoga a le maota o sui ananafi e fa’apea, o vaega tupe uma mai le feterale o lo o alu i mataupu tau solitulafono, e le o agava’a ai lava le Ofisa o le Loia Fautua i ia vaega tupe fesoasoani.

“E le mafai e vaega tupe o lo o maua mai e lo’u Ofisa mai le feterale ona ave e fesoasoani ai i tagata o lo o molia i le faia o ni solitulafono fa’asaga i tama’ita’i ma fanau talavou, ae o lo o ave e fesoasoani ai i le tagata na a’afia i le solitulafono”, o le saunoaga lea a Gabauer i luma o le Komiti e na o le to’atolu afioga i Faipule sa i ai.

O Faipule sa i ai i le iloiloga e aofia ai le afioga a Toeaina F. Faufano Autele o le ta’ita’i komiti, Faimealelei A. F. Allen, ma le sui fofoga fetalai ia Fetu Fetui Jr e le i leva ona amata le iloiloga ae tula’i.

O le iloiloga a le Komiti o Mataupu Tau Fa’amasinoga a le maota o sui i le vaiaso na te’a nei, ma le Loia Fautua mo tagata lautele ia Douglas Fiaui, na manino ai le mana’omia e lea Ofisa o le le itu tau tupe, e fesoasoani ai i le fa’atinoina o lana pito laau, aemaise lava i le puipuia lea o aia tatau o tagata lautele i lalo o le tulafono.

Talu ai o le tele o vaega tupe mai le feterale o lo o maua e le Ofisa o le CJPA, e fa’apitoa lea mo tulaga tau solitulafono ma mataupu tau fa’amasinoga, na manatu ai le afioga a Toeaina, o le a maua mai lea Ofisa se fesoasoani mo le Ofisa o le Loia Fautua mo tagata lautele, ae na fa’amanino e Gebauer e fa’apea, o le tele o tupe o lo o maua mai e lona Ofisa mai le Feterale, o lo o ave e fesoasoani ai i le fa’aleleia o tulaga e puipuia ai solitulafono eseese i le atunu’u, e pei o le totogiina lea o Leoleo, fa’atupe ai a’oa’oga fa’a faufautua mo tagata e a’afia i solitulafono ma sauaga mataga, atoa ai ma le fa’atau ai o mea faigaluega e fa’aaoga e le Ofisa o Leoleo ma le Ofisa a le Loia Sili e fa’atino ai galuega mo le tete’e atu i solitulafono.

“O le agaga atoa o vaega tupe o lo o maua mai e le matou Ofisa, e le gata e puipuia ai tagata ua aafia i faiga tau solitulafono, ae fesoasoani ai i le malo i auala e fa’atino ai polokalame e toe fa’aleleia ai olaga o i latou na a’afia i solitulafono, ae le mafai lava ona fa’aaoga se vaega tupe mo i latou o lo o molia i le fa’atinoina o solitulafono”, o le saunoaga lea a Gebauer.

Na fa’amanino e Toeaina i le ali’ fa’atonu e fa’apea, e ui e le o lagolagoina e lona Ofisa le fesoasoani i tagata o lo o molia, ae tatau ona ia silafia, fa’atoa nofosala lava le tagata molia pe afai ae ta’usala e le fa’amasinoga lana solitulafono.