Le lava upu e fai ai le misa, tapa loa i le agaese

Pago Pago - AMERIKA SAMOA

Sa molia i le tulafono i le aso 27 o Setema, 2024 ia le susuga ia Fengtao Yu ina ua masalomia i lona tapa i se agaese e fa’afefe ai lona tuaoi, i se la taugaupu na fai.

E tusa ai ma fa’amaumauga a le malo, o lo’o ta’ua ai le vala’au atu o se alii i le Ofisa a Leoleo i Fagatogo ona o lona tuaoi ua alu atu i le latou fale ma se agaese.

Ina ua taunu’u leoleo i le nofoaga na tupu ai le faalavelave, sa va’aia ai ni alii se toatolu ma se tamaitai o nonofo mai i luma o se faleoloa.  Ma sa faasino e le na a’afia i leoleo ia le tagata lea sa alu atu ma le agaese, o Fengatao Yu, lea ua molia nei.

Sa faamatalaina e le na a’afia, le alu atu o le ua molia ma talanoa atu i lona toalua ona ua le mafai ona o latou (le ua molia) momoe ona o le pisa tele o lona atalii.

Na ta’ua e le na a’afia, ina ua manava atu i lea afiafi, ma faamatalaina ifo e lona to’alua ia te ia le alu atu o le ua molia, sa ia alu loa i le fale o le ua molia ma tula’i mai ai se la taugaupu, ma o iina na oso ai loa le ua molia, ma u’u mai se agaese ma tuli ai le na a’afia.

Sa faapea loa ona aveina e leoleo ia Fengtao Yu i le ofisa a leoleo mo le fa’aauauina o ona suesuega.

Ma na fa’amatalaina e le ua molia, na alu e talosaga ia i latou, tu’utu’u i lalo le pisa ona ua malomaloa tele le pisa.  Ae peitai, ona sa fa’asuaava le tagata na talanoa iai ia le ua molia, sa amata ona ia palauvale mai i le ua molia.

Na faamaonia e Fengtao lona to’atama’i tele, na mafua ai ona ia alu i lona fale ma sau ai ma le agaese.

Ua molia nei ia Fengtao i le Faao’olima i lona tulaga e tolu, o se vaega ‘C’ o solitulafono mama, e mafai ona loka ai i aso e sefululima ma se sala tupe e $300; po o faasalaga uma e lua.

E le’i ta’ua i totonu o faamaumauga pe sa iai se vaegatupe na faatulagaina e tatalaina ai le ua molia, e faatalitali ai lona faamasinoga.