Lavelavea se alii i le tulafono ina ua sola ma le taavale a lona tina

Pago Pago - AMERIKA SAMOA

O le amataga o le masina o Setema, na molia ai le susuga ia Marcus Maiava, i lona taumafai e nana pe faaleaga ia ni molimau, faapea ma le tete’e i leoleo a’o taumafai e faatino o latou tiute, ona o se faalavelave na tula’i mai i le vaveao o le aso 4 o Setema, ina ua valaau e lona tina le ofisa a leoleo ma ripotia ai le sola o Maiava ma lana taavale, e aunoa ma sana faatagana.

O moliaga o Maiava, na aofia ai;

Faitauga 1:  Nana pe taumafai e faaleaga ia ni molimau; o se vaega ‘A’ o solitulafono mama, e mafai ona nofosala ai se tasi i le falepuipui, i le le silia ma le tausaga, po o se sala tupe e le silia ma le $1,000; po o faasalaga uma e lua.

Faitauga 2:  Tete’e atu i leoleo a’o latou taumafai e ave faapagotaina le ua molia, o se vaega ‘A’ o solitulafono mama, e mafai ona fa’afalepuipui ai mo le tausaga, po o se sala tupe e le silia ma le $1,000; po o faasalaga uma e lua.

E $3,000 se vaegatupe na faatulagaina e mafai ona tatalaina ai le ua molia, e faatalitali ai lona faamasinoga.

Ina ua valaau le tina a Maiava i le ofisa a leoleo i Fagatogo i le vaveao o le aso 4 o Setema, sa ia talosagaina le fesoasoani a leoleo, e pei ona ta’ua i totonu o faamaumauga a le malo, e saili ma toe fa’afo’i mai sana taavale fou ua ia talitonu, na alu ma le ua molia (lona alo). 

E tusa ai ma le faamatalaga a le tina, na fafaguina o ia e sana ‘granddaughter’ ma faailoa atu ai le o ese o le ua molia ma se tamaitai, i totonu o le taavale, e ui ina sa faatonuina e le tina ia le ua molia, e aua ne’i alu i le taavale.

E le gata i lea, sa ta’ua e le tina, ua mae’a ona o la faatonuina ma lona to’alua ia le ua molia, ina aua ne’i toe tago i so’o sa la meatotino, aemaise ai lava le taavale fou.  ma na fa’ailoa atu e le tina i leoleo, le iai o se faalavelave tuanai, na faaleagaina ai e le ua molia, seisi taavale

Sa faamatala e le tina i leoleo lona valaau atu i le ua molia, i luga o le telefoni, ae ‘e’e mai le alii ma palauvale mai ia te ia.

Ma a’o talanoa le tina ma leoleo, o le taimi foi lea ua agai atu ai i luga o le alatele, e fesoasoani i le sailiga o lana taavale. 

O lea, na aga’i atu loa leoleo e taumafai e saili le taavale a le tina loto mafatia, ma ina ua o latou latalata atu i le falesa Katoliko i Pago Pago, sa o latou fetaui ai ma le tina ma lona ‘granddaughter’ ma o la fa’ailoa mai i leoleo, e la te le’i va’aia le taavale i luga o le alatele.

Ae o lo’o iai so la talitonuga, o lo’o iai le ua molia, i le fale a lana uo teine, i Faga’alu.  O lea na agai atu ai loa leoleo i Faga’alu.  Ae ina ua latalata atu leoleo i le a’oga a Samoana, sa toe maua mai seisi valaau mai i le tina ma lana ‘granddaughter’, ua o la mauaina le taavale i Leloaloa.

Na faapea ai loa ona toe liliu leoleo ma agai atu i Leloaloa.  E taunu’u leoleo ae o le taimi lea, ua vevela ai le mataupu i le va o le tina, o lana granddaughter ma le ua molia.

Ina ua iloa mai e le ua molia ia le agai atu o le taavale a leoleo, sa amata loa ona ia tamo’e agai i se a’ega i tua o le faleoloa tuai a Tutuila ma le fale’aiga a le ‘King’s Pizzeria’.  Ae ina ua va’ai mai le ua molia, o lo’o agai atu le taavale i le mea o tamo’e iai, sa ia toe liliu ma toe tamo’e mai agai i le taavale a lona tina, ma oso i totonu, ma taumafai e sola ai, ae na poloka atu e le taavale a leoleo.

Ona toe oso lea i fafo o le ua molia ma toe taumafai e sola ese, ae peitai, sa pu’eina o ia e leoleo ma lokaina mai o ia.  Ma sa fai sina umi o taumafai leoleo e ave faapagotaina le ua molia, ona sa tete’e mai i gaoiga a leoleo o lo’o fai.

Ina ua mae’a ona lokaina e leoleo ia le ua molia, sa faapea ona faapea mai le alii i leoleo, e latou te faatali i le mea o le a ia faia ia i latou.  Ma lona palauvale mai i leoleo.  Ina ua mae’a ona tu’uina e leoleo ia le ua molia i totonu o le latou taavale, sa faapea loa ona o latou fa’atalanoaina le ‘granddaughter’ a le tina na a’afia.

Ma sa faamatalaina e le ‘granddaughter’ e faapea, sa faatonuina le ua molia, e aua ne’i toe tago i se taavale a le latou aiga, aua sa ia faaleagaina le taavale muamua.  Ae peitai, sa fa’aalia e le ua molia, lona le fa’aaloalo i lona tina matua, e ala i le ‘e’e ma le palauvale i lona tina matua.

Ina ua taunu’u leoleo ma le ua molia i le ofisa a leoleo i Fagatogo, sa faapea ona logoina se auaunaga a le EMS ona o manu’a a le ua molia i le taimi na taumafai ai leoleo e loka mai o ia.

Ma na musu le ua molia, e fai sana molimau tusitusia e tusa ai ma le faalavelavel na tupu.

Ina ua taunu’u le vaega a le EMS i le ofisa a leoleo sa mana’o Maiava e ave lona a’ao lea na fula, e va’ai e se foma’i.  O lea na fa’afeaoina atu ai o ia ma le EMS, e leoleo, i le LBJ ae peitai, ina ua taunu’u le faigamalaga i le LBJ, sa faapea mai le alii, ua le fia vaai i se fomai, ae ave sa’o loa o ia i le to’ese i Tafuna.