Lavea le tina matua i le misa a se aiga

Pago Pago - AMERIKA SAMOA

O le aso 23 o Novema, 2023 na taunuu ai se ripoti i le ofisa a leoleo i Tafuna, e uiga i se tamaloa sa faaoolima i le toalua a lona tuafafine, ae lavea ai ma lona tama.

Ua molia nei le susuga ia Agape Faumuina i le Faatupu Vevesi i totonu o lona aiga, o se solitulafono e mafai ona faasala ai o ia i le sefululima (15) aso i le falepuipui, pe sala tupe e $300; po o faasalaga tuma e lua.

E le gata i lea, o lo o ua molia foi Faumuina i le Faao’olima i lona tulaga e tolu, lea e mafai ona nofosala ai o ia i le falepuipui, i le tasi tausaga pe sala tupe e $300; po o faasalaga uma e lua.

Faapea ma leisi foi moliaga o le Faao’olima i lona tulaga e tolu, e mafai ona faasala ai o ia i le falepuipu I le sefulu lima aso (15) po o se sala tupe e i le va o le $!50 ma le $300; po o faasalaga uma e lua.

E tusa ai ma faamaumauga a le malo, ua ta’ua ai e faapea, na valaau e se tina e suafa ia Dira ia le ofisa a leoleo, ma ripotia ai le fa’ao’olima o lona tuagane i lona toalua, ma u’una’i ai e lona tuagane lo le tina, a’o ia taumafai e taofiofi mai Agape.

A o agai atu leoleo i Kokoland, i le nofoaga na tupu ai le faalavelave, na o latou va’aia ai le ua molia i luga o le auala pefu e agai atu i le fale o le aiga sa tupu ai le faalavelave, ma o latou ave faapagotaina ai o ia i le ofisa a leoleo mo le fa’aauauina o a latou suesuega.  A o agai atu le taavale leoleo ma Faumuaina, sa faalogoina e leoleo le malosi o le manogi pia i le ua molia.  Ma ina ua o latou taunuu i le ofisa a leoleo i Tafuna, na muai aveina atu Faumuina i le vaega a le EMS mo le togafitia o ona manu’a.

O lo o ta’ua foi i faamaumauga, le agai atu o leoleo e aumai le tina sa valaauina leoleo faapea ma le susuga Maga Mataafa, o ia lea ua a’afia i lenei mataupu, mai i le nofoaga na tupu ai le faalavelave, ae peitai, e taunu’u atu, ua mae’a ona piki mai e le vaega a le EMS i la’ua ma auina sa’o atu i le falema’i i Faga’alu.

Sa mafai ona talanoa leoleo ma se tina matua, le tina a Faumuina, ma o ia foi sa a’afia i lenei i lenei mataupu.

Sa faamatala e lenei tina matua e faapea, na amata ona pisa lona alo, o Faumuina, i totonu o le fale ma fa’ate’ia ai tagata o lona aiga.  Ona savali atu lea o Faumuina ua tatu’i ia Mata’afa – le toalua o lona tuafafine.

Ma na ta’ua e faapea, a’o faia le sauniga a Faumuina ia Mata’afa, ae o le taimi lea o lo o taumafai le tina matua e taofiofi mai Faumuina, ae peitai, na u’una’i ese o ia e Faumuina, ma tau ai le ulu o le tina matua i le faitotoa.  Na fa’aauau ona fasi e le ua molia ia Mata’afa i totonu o le potu, ma taumafai e toso o ia i fafo mai i le fale.

I le taimi sa tupu ai lenei faalavelave, na iai ma afafine laiti e toalua a Mata’afa i le mea na tupu ai le faalavelave.

Ua ripotia mai foi le faaleagaina o faamalama pito i luma o le fale, e Faumuina.

Sa faamatala e le tina a Faumuina e faapea, sa vaaia ia manu’a i le pito a lalo o le vae o Mata’afa lea sa taoto ai, faapea lona lima tauagavale lea o lo o fa’aaogaina mo le faamamaina o lona toto.

Na togafitia uma le tina matua faapea Faumuina, e le EMS, ae peitai, sa musu e ave i la’ua i le falemai i Fagaalu.

E $1,000 le tupe faatulagaina e mafai ona totogi e Faumuina, ona mafai lea ona tatala mai i le falepuipui e fa’atali ai lona faamasinoga.